Asebter amenzawi

Yemlal Sellal iminigen idzayriyen deg uzɣar

LEZZAYER TAMANEɣT – Yemlal uneɣlaf amenzu, Abdelmalek Sellal, ass n ssebt yiwet n tmagla (wafd) n wufrinen d wid yessawalen s yisem n yiminigen idzayriyen ay yellan deg uzɣar, ɣef wakken ay d-yenna yiwen n lbayan n yimeẓla (maṣaliḥ) n uneɣlaf amenzu.

Deg umyager-a, « ssawlen-d kra n yiselwayen n tiddukliwin ɣef yiɣeblan-nsen d wamek ay la tteddunt tɣawsiwin n yiminigen idzayriyen yellan deg uzɣar. Iban-d daɣ d akken Idzayriyen ay izedɣen deg uzɣar ukin mliḥ s yizerfan d lwajeb-nsen ama deg tmurt aydeg ddren, ama deg wayen yerzan tamurt-nsen, am wakken ay bɣan ad ttekkin deg usnefli (tanmiya) n tmurt-nsen », ɣef wakken ay d-yenna lbayan-a.

« Deg tinawt-nnes (kalima), yerna deffir ma yerra tajmilt i uttekki ay la irennun n yiminigen deg usselhu n umciweṛ n Lezzayer d tmura aydeg ddren, yenna-d uneɣlaf amenzu d akken Lezzayer la txeddem akken ad tesselhu assaɣen d tmura-a d umbaddel ad d-yekken seg-sen i lmend n usselhu n tudert n yiminigen idzayriyen deg wakk iḥricen ».

Iwekked-d daɣ uneɣlaf amenzu d akken Lezzayer « ad tkemmel ad d-tettaddam iḥezziben i usselhu n tegnit n yiminigen deg uzɣar d usselhu n ummager-nsen deg Lezzayer ».

Yella-d ummager-a s uḥdaṛ n yimaslaḍen (aɛḍa’) n unabaḍ, imazanen ay d-yettgensisen iminigen deg uzɣar d yimḍebbren n kra n wudusen inagduden, ɣef wakken ay d-yerna lbayan-a.