Asebter amenzawi

Abrid Amazzal Agmuḍ-Ataram: akk iḥricen ad reẓmen deg Dujembeṛ

TUBIRET – Yenna-d uneɣlaf n yimahilen inagduden (acɣal ɛumumiyya), Abdelkader Ouali, ass n ssebt deg Tubiret, d akken akk iḥricen n ubrid amazzal Agmuḍ-Ataram ad reẓmen i tiddit « seg-a ɣer tgara n Dujembeṛ ay d-yetteddun », menɣir tamnaḍt-nni aydeg d-iwet usyax deg Djebahia (Tubiret) anda ay mazal la yettkemmil uxeddim n usseǧhed d usserked n wakal.

« Abrid amazzal ad yerẓem i tiddit deg tgara n Dujembeṛ, imi ad faken yixeddimen deg yiḥricen yemgerraden n ugmuḍ (ccerq), talemmast d utaram (lɣerb) seg-a ɣef kra n ledwaṛ, menɣir acanṭi n Djebahia », ɣef wakken ay d-yessefhem uneɣlaf deg yijifeṛ n terzi-nnes n umahil ɣef twilayt n Tubiret.

Aḥric n Djebahia ɣezzif 5 n yikilumitren yerna d tamnaḍt aydeg yettseyyix wakal. Acanṭi n temnaḍt-a lhant-d yid-s kra n tkebbaniyin akken ad bnunt « tileggiyin (ǧusur) yettwameḍlen yerna ad ẓẓunt 1200 n tgusa akken ad sǧehdent yerna ad srekdent akal », ɣef wakken ay d-yenna uneɣlaf ay yesfeqden imahilen n uṣeggem n uḥric-a yeqqnen Tubiret ɣer Lakhdaria (33 n yikilumitren).

I uxdam n tgusa-a d usserked n wakal n temnaḍt-a, yenna-d uneɣlaf d akken yessefk « ad yegget uxeddim yerna ad yettwasseqdec akk ttawil ay yessefken i lmend n ussewjed n usenfar-a seg-a ɣer Yunyu n 2016 ».

Deg ucanṭi-nni (aṣeggem n 33 n yikilumitren) ay d-yebdan deg Mayu n 2013, Mass Ouali iger-d tiɣri i tkebbaniyin n lebni, tinariyin n tezrawt (makatib dirasa) d yiduba idiganen akken « ad ssuggten lmeǧhud yerna mɛawanen akken ifaz. »