ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵣⵣⴰⵢⴻⵔ ⴷ ⵜⵉⵙ 22 ⴷⴻⴳ ⵜⴻⵍⵖⵓⵖⴰ ⵏ ⵓⵎⴰⴹⴰⵍ ⵏ ⵜⴰⵜⵍⵉⵜⵉⵜ ⵏ ⵢⵉⵎⴻⵄⴷⴰⵕ ⵏ 2015

ⴷⴷⵓⵃⴰ – ⵜⴰⵖⵍⴰⵎⵜ ⵜⴰⴷⵣⴰⵢⵔⵉⵜ ⵏ ⵜⴰⵜⵍⵉⵜⵍⵉⵜ ⵜⴼⵓⴽ ⴷ ⵜⵉⵙ 22 ⴷⴻⴳ ⵜⴻⵥⵔⵉⴳⵜ ⵜⵉⵙ 7 ⵏ ⵜⴻⵍⵖⵓⵖⴰ ⵏ ⵓⵎⴰⴹⴰⵍ ⵏ ⵜⴰⵜⵍⵉⵜⵉⵜ ⵏ ⵢⵉⵎⴻⵄⴷⴰⵕ ⵏ ⴷⴷⵓⵃⴰ ⴰⵢ ⴷ-ⵢⴻⵍⵍⴰⵏ ⴳⴰⵔ 22 ⴷ 31 ⵜⵓⴱⴻⵕ, ⵢⴻⵔⵏⴰ ⵜⴻⵔⴱⴻⵃ-ⴷ, ⵙ ⵓⵊⴻⵎⵎⴰⵍ, 11 ⵏ ⵜⵣⴰⵍⵖⵉⵡⵉⵏ (ⵎⵉⴷⴰⵍⵉⵢⵢⴰⵜ), ⴳⴰⵔ-ⴰⵙⴻⵏⵜ ⵙⵏⴰⵜ ⵏ ⵡⵓⵔⴻⵖ, ⴷⴻⴳ ⵜⵜⵉⵄⴰⴷ-ⴰ ⴰⵢⴷⴻⴳ ⴷ ⵛⵛⵉⵏⵡⴰ ⴰⵢ ⴷ-ⵉⵔⴻⴱⵃⴻⵏ ⴰⵟⴰⵙ ⴰⴽⴽ ⵏ ⵜⵣⴰⵍⵖⵉⵡⵉⵏ (85, ⴳⴰⵔ-ⴰⵙⴻⵏⵜ 41 ⵏ ⵡⵓⵔⴻⵖ).

1300 ⵏ ⵢⵉⵏⴰⴷⴷⴰⵍⴻⵏ ⵙⴻⴳ 90 ⵏ ⵜⵎⵓⵔⴰ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⵜⵉⵄⴰⴷ-ⴰ ⵏ ⴷⴷⵓⵃⴰ ⴰⵢⴷⴻⴳ ⵓⵥⵡⵉⵔⴻⵏ ⴰⴷ ⵜⵜⴻⴽⴽⵉⵏ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵏ ⵢⵉⵎⴻⵄⴷⴰⵕ ⵏ ⵔⵉⵧ (ⴷⴻⴳ ⵛⵜⴻⵎⴱⴻⵕ ⵏ 2016).

ⴷⴻⴳ ⵡⴰⵙⵙ ⴰⵏⴻⴳⴳⴰⵔⵓ ⵏ ⵜⴻⵍⵖⵓⵖⴰ-ⴰ, ⵓⵍⴰ ⴷ ⵢⵉⵡⴻⵏ ⵏ ⵓⴷⵣⴰⵢⵔⵉ ⵓⵔ ⴷ-ⵢⴻⵔⴱⵉⵃ ⴽⵔⴰ, ⵉⵎⵉ ⵎⵧⵀⴰⵎⴻⴷ ⴱⴻⵔⵔⴰⵀⴰⵍ (ⵜⴰⵏⴻⴳⴳⴰⵔⵓⵜ ⵏ 400 ⵏ ⵍⵎⵉⵜⵔⴰⵜ, ⵜⴰⵙⴻⵔⴽⴻⵎⵜ ⵏ ⵜ51) ⴷ ⴽⴰⵎⴻⵍ ⴽⴰⵔⴷⵊⴻⵏⴰ (ⵜⴰⵏⴻⴳⴳⴰⵔⵓⵜ ⵏ ⵓⵣⴻⵍⵍⵉ ⵏ ⵓⴹⴻⴱⵙⵉ, ⵜⴰⵙⴻⵔⴽⴻⵎⵜ ⵏ ⴼ33/34) ⵓⵔ ⵙⵙⴰⵡⴹⴻⵏ ⴰⵔⴰ ⴰⴷ ⴷ-ⴰⵡⵉⵏ ⴰⴳⵎⵓⴹ ⵢⴻⵍⵀⴰⵏ.

ⴽⴰⵔⴷⵊⴻⵏⴰ (ⵜⴰⵙⴻⵔⴽⴻⵎⵜ ⵏ ⴼ33) ⵉⴼⵓⴽ ⴰⵎⵙⵉⵣⵡⴻⵔ ⵏ ⵓⵣⴻⵍⵍⵉ ⵏ ⵓⴹⴻⴱⵙⵉ ⴷⴻⴳ ⵓⵎⴽⴰⵏ ⵡⵉⵙ 8 ⵙ ⵓⵣⴻⵍⵍⵉ ⵏ 24,70 ⵏ ⵍⵎⵉⵜⵔⴰⵜ ⴷⴻⴳ ⵓⵏⴻⵄⵔⵓⴹ-ⵏⵏⴻⵙ ⵡⵉⵙ 5. ⴷ ⴰⵛⵉⵏⵡⴰⵜ ⵡⴰⵏⴳ ⵢⴰⵏⵣⵀⴰⵏⴳ ⴰⵢ ⴷ-ⵢⵓⵙⴰⵏ ⴷ ⴰⵎⴻⵣⵡⴰⵔⵓ (ⴼ34) ⵙ ⵓⵣⴻⵍⵍⵉ ⵏ 41,93 ⵏ ⵍⵎⵉⵜⵔⴰⵜ.

ⵙⴻⴳ ⵢⵉⴷⵉⵙ-ⵏⵏⴻⵙ, ⴰⴷⵣⴰⵢⵔⵉ ⵎⵧⵀⴰⵎⴻⴷ ⴱⴻⵔⵔⴰⵀⴰⵍ ⵢⴻⴼⴼⴻⵖ ⵙⴻⴳ ⵜⴻⵎⵙⵉⵣⵣⴻⵍⵜ ⵏ 400 ⵏ ⵍⵎⵉⵜⵔⴰⵜ ⴷⴻⴼⴼⵉⵔ ⵎⴰ ⵉⴼⵓⴽ ⴷ ⵡⵉⵙ 3, ⴷⴻⴼⴼⵉⵔ ⵓⵎⵉⴽⵙⵉⴽⵉ ⵏⴰⵠⴰⵔⵧ ⵙⴰⵏⵛⵀⴻⵣ (1:24.46 – ⴷ ⵡⵉⵙ ⵙⵉⵏ, ⵜⴰⵣⴰⵍⵖⵉ ⵏ ⵓⵥⵔⴻⴼ) ⴷ ⵓⴱⵉⵍⵊⵉⴽⵉ ⵒⴻⵜⴻⵔ ⴳⴻⵏⵢⵏ (1:22.66, ⵜⴰⵣⴰⵍⵖⵉ ⵏ ⵡⵓⵔⴻⵖ).

ⴷⴻⴳ ⵜⴳⴰⵔⴰ ⵏ ⵜⴻⵎⵙⵉⵣⵣⴻⵍⵜ, ⴽⴽⵙⴻⵏ ⵢⵉⵏⴻⵣⵔⴰⴼⴻⵏ ⴱⴻⵔⵔⴰⵀⴰⵍ ⵉⵎⵉ « ⴰⵢ ⵢⴻⴼⴼⴻⵖ ⵙⴻⴳ ⵓⴳⵏⵉⵔ-ⵏⵏⴻⵙ (ⵔⵉⵡⴰⵇ) ⴰⵛⵃⴰⵍ ⴷ ⵜⵉⴽⴽⴻⵍⵜ, ⴷⵖⴰ, ⵖⴻⴼ ⵍⴻⵃⵙⴰⴱ ⵏ ⵢⵉⵍⵓⴳⴰⵏ ⵏ ⵓⵎⵙⵉⵣⵡⴻⵔ, ⴰⵢⴰ ⴰⴷ ⵜ-ⵢⴻⵙⵙⵓⴼⴼⴻⵖ ⵙⴻⴳ ⵓⵎⵙⵉⵣⵡⴻⵔ », ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵙⴼⴻⵀⵎⴻⵏ.

ⴷⴻⴳ ⵜⵉⴷⴻⵜ, ⴰⵏⴰⴷⴷⴰⵍ-ⴰ ⴰⴷⵣⴰⵢⵔⵉ ⴰⵢ ⵢⴻⵍⵍⴰⵏ ⵉⵀⴻⵢⵢⴰ ⵉ ⵜⴻⵎⵙⵉⵣⵣⴻⵍⵜ-ⴰ ⵜⵃⵓⵣⴰ-ⵜ « ⴷⴷⴻⵄⵡⴻⵙⵙⵓ ». ⵓⵇⴱⴻⵍ ⵎⴰ ⵜⴻⴱⴷⴰ ⵜⴻⵎⵙⵉⵣⵣⴻⵍⵜ, ⵢⴻⵅⵚⴻⵔ ⵓⴽⴻⵔⵙⵉ-ⵏⵏⴻⵙ ⵢⴻⵜⵜⴻⴷⴷⵓⵏ. ⵕⵕⵓⴷⴰ-ⵏⵏⴻⵙ ⵏ ⵙⴷⴰⵜ ⵜⴻⵅⵚⴻⵔ ⵢⴻⵔⵏⴰ ⴰⴳⴻⵍⵍⵓⵙ-ⵏⵏⴻⵙ (ⵎⵉⵃⵡⴰⵔ) ⵏ ⵜⵓⵣⵣⵢⴰ ⵢⴻⵔⵔⴻⵥ ⴷⴻⴼⴼⵉⵔ ⵢⵉⵡⴻⵏ ⵏ ⵓⵙⴻⵀⵡⵓ (ⵃⴰⴷⵉⵜ) ⴰⵢⴷⴻⴳ ⵢⴻⵜⵜⵡⴰⴽⴽⴻⵙ ⴱⴻⵔⵔⴰⵀⴰⵍ ⵙⴻⴳ ⵜⴻⵎⵙⵉⵣⵣⴻⵍⵜ ⵢⴻⵔⵏⴰ ⵢⴻⵙⵕⵓⵃ ⵜⴰⵣⴰⵍⵖⵉ-ⵏⵏⴻⵙ.

« ⵓⵔ ⴼⵀⵉⵎⴻⵖ ⴰⵔⴰ ⴷ ⴰⵛⵓ ⴰⵢ ⵉⵢⵉ-ⵢⴻⴹⵔⴰⵏ. ⴰⵙⴻⵀⵡⵓ-ⴰ ⵢⴻⵍⵍⴰ-ⴷ ⴽⵔⴰ ⴽⴰⵏ ⵏ ⵜⴻⴷⵇⵉⵇⵉⵏ ⵓⵇⴱⴻⵍ ⵜⵏⴻⴳⴳⴰⵔⵓⵜ ⴰⵢⴷⴻⴳ ⵍⵍⵉⵖ ⵣⴻⵎⵔⴻⵖ ⴰⴷ ⴷ-ⵔⴻⴱⵃⴻⵖ ⵜⴰⵣⴰⵍⵖⵉ. ⵏⴻⵄⵔⴻⴹ ⵏⴻⴽⴽ ⴷ ⵓⵙⵍⴻⵖⵎⴰⵢ-ⵉⵏⵓ ⴰⴷ ⵏⵚⴻⴳⴳⴻⵎ ⵓⴳⵓⵔ-ⵏⵏⵉ, ⵎⴰⵛⴰ ⵓⵔ ⵏⴻⵙⵙⴰⵡⴻⴹ ⴰⵔⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴱⴻⵔⵔⴰⵀⴰⵍ.

ⵜⴼⵓⴽ ⵜⴻⵍⵖⵓⵖⴰ-ⴰ ⵏ ⵓⵎⴰⴹⴰⵍ ⵏ ⵜⴰⵜⵍⵉⵜⵉⵜ ⵏ ⵢⵉⵎⴻⵄⴷⴰⵕ ⵙ ⵍⴻⵃⵣⴻⵏ ⴳⴰⵔ ⵡⵉⴷ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵖⵍⴰⵎⵜ ⵜⴰⴷⵣⴰⵢⵔⵉⵜ, ⵉⵎⵉ ⴰⵢ ⵙⵙⴰⵔⵎⴻⵏ ⴰⴷ ⴷ-ⵢⴻⵔⴱⴻⵃ ⴱⴻⵔⵔⴰⵀⴰⵍ ⵜⴰⵣⴰⵍⵖⵉ ⵏⵉⴹⴻⵏ ⴷⴻⴳ ⵜⵏⴻⴳⴳⴰⵔⵓⵜ-ⵏⵏⵉ ⵏ 400 ⵏ ⵍⵎⵉⵜⵔⴰⵜ.

ⵜⴰⵖⵍⴰⵎⵜ ⵜⴰⴷⵣⴰⵢⵔⵉⵜ ⴰⴷ ⴷ-ⵜⵓⵖⴰⵍ ⵖⴻⵔ ⵍⴻⵣⵣⴰⵢⴻⵔ ⴰⵙⵙ ⵏ ⵍⵃⴻⴷⴷ.