Asebter amenzawi

Asalay n lɛeskeṛ iga-d tazikkent n tugniwin d yidlisen

LEZZAYER TAMANEɣT – Iga Usalay (mutḥaf) Alemmas n Yigen deg Lezzayer Tamaneɣt ass n lḥedd yiwet n tzikkent n tugniwin d yidlisen i lmend n umulli wis 61 n Tegrawla Tadzayrit.

Tazikkent-a rzan-d fell-as aṭas n medden yerna amur ameqran seg-sen d iskutiyen d yibalmuden ay d-yusan seg twilayin yemgerraden.

Tazikkent-a tesskanay-d isurifen yemgerraden n Tegrawla Tadzayrit d yimenɣiyen imeqranen ay nnuɣen wasaḍen (abṭal) n Tegrawla deg 6 n twilayin timezruyanin n tallit-nni.

Imenɣiyen-a d win n Lǧuṛf (1955), win n Ɛin Zzana (1955), win n Timalawin Uzellagen (1957), win n Ǧbel Bulegṛun (1958), win n Ǧbel Beccaṛ (1960) d win n Ǧbel Tamer (1959).

Tazikkent-a ad teqqim snat n ledwṛ yerna rsent deg-s tugniwin n Tegrawla, ma d tazikkent n yidlisen ad teqqim sin n wussan, yerna rsen deg-s yidlisen uran-ten ama d Idzayriyen, ama d ibeṛṛaniyen, am wakken ay llan kra n yidlisen n ccfawat n kran n wudmawen idzayriyen d yibeṛṛaniyen ay yeddren deg tallit-nni n ṭṭrad n uslelli aɣelnaw, ɣef wakken ay d-yenna umasay (mes’ul) n tnarit n wassaɣen inagduden n usalay-nni, Mokhtar Akkache.

I lmend n waya, rran tajmilt i twacult n umjahed Lyes Derriche imi deg uxxam-nnes ay d-tella temlilit n tegrawt n 22 ay d-yesnekren Tagrawla.