Asebter amenzawi
Atɛeddi ɣef Ɣezza: fkan Yifalesṭiniyen ttbut niḍen i Ccṛeɛ Agraɣlan
LA HAYE – Yefka udabu afalesṭini i Ccṛeɛ n Uɛaqeb Agraɣlan iferdisen (ɛanaṣir) niḍen ayyes ad yeɛreḍ ad icaṛeɛ Isṛayil ɣef utɛeddi aneggaru ay tga mgal yimezdaɣen n Ɣezza yerna akken ad ikemmel uḥtac ɣef wayen ay tga Isṛayil deg unebdu n 2014 deg temnaḍt-a.
Mi d-yeffeɣ uneɣlaf afalesṭini n tɣawsiwin n uzɣar, Riyadh al Maliki, seg Ccṛeɛ n Uɛaqeb Agraɣlan, yenna-d d akken « akaram-a (milaff) amaynu », d netta ay d wis 3 ay yefka aseggas-a « yerna yella deg-s ttbut n tmenɣiwt yeffɣen i ccṛeɛ, assedrem n yixxamen d uɛaqeb n medden s ujemmal ».
« Neddem daɣ imedyaten (amtila) n liḥalat ay d-yellan deg 40-a n wussan ineggura n utɛeddi isṛayili ɣef Yifalesṭiniyen ur igin acemma », ɣef wakken ay d-yenna uneɣlaf i tɣemsa deffir yiwet n temlilit d timwekkelt n Ccṛeɛ n Uɛaqeb Agraɣlan, Fatou Bensouda.
Yerẓem Ccṛeɛ Agraɣlan yiwet n tsestant (taḥqiq) ɣef tejrimin ay gan yiɣallen n tuḍḍfa tisṛayilin deg utɛeddi-nni n 50 n wussan ay yenɣan 2100 n Yifalesṭiniyen deg unebdu n 2014 deg tesfift n Ɣezza. Amur ameqran seg wid yemmuten d iɣarimen.
Imḍebbren n Ccṛeɛ n La Haye werɛad ur ddin ara ɣer umkan aydeg d-llant tejrimin-a imi ay asen-tegdel (temneɛ) Isṛayil aya.
« Ṛeggmen-aɣ d akken ad kemmlen aneɛruḍ-nsen akken ad d-awin ttesriḥ (…) i terzi (ɣef Falesṭin). Nekkni neqbel ad d-rzun yerna mazal-aɣ la nettṛaju idis isṛayili ad yeqbel aya », ɣef wakken ay d-yenna Mass al Maliki.
Ccṛeɛ n Uɛaqeb Agraɣlan yennulfa-d deg 2002 yerna yettcaṛaɛ imḍebbren unnigen ay yettekkan deg ussenger n yiɣerfan, tijrimin mgal talsa (bacariyya) d tejrimin n ṭṭrad.
