Asebter amenzawi

Tigrawin tisertiyin tispenyuliyin ɛawdent wekkdent-d abdad ɣer Yiṣeḥrawiyen

MADRID – Ɛawdent wekkdent-d kra n tuddsiwin tisertiyin tispenyuliyin abdad-nsent ɣer yidis n uɣref aṣeḥrawi deg yimenɣi-nnes i lmend n tlelli d uzarug (istiqlal), am wakken ad beddent daɣ ɣer yidis n yizrazaɣen (laǧi’in) ay iḥuza ugeffur-nni ameqran ay d-iwten deg Tinduf, deg Lezzayer.

Dɣa, i lmend n waya, iɛawed Ukabar Aɣerfan Aknaṛi iwekked-d tamsetlelt-nnes (taḍamun) d yizrazaɣen iṣeḥrawiyen ay yenḍerren mliḥ seg yigefran-nni imeqranen ay yefkan axeṣṣar i waṭas n yimaziren n yizrazaɣen deg temnaḍt n Tinduf.

S waya, tanmazult (na’iba) n uselway n umni amnaḍan n Tegzirin Tiknaṛiyin, Massa Christina Tabio tessenfali-d « tamsetlelt n Ukabar Aɣerfan d uɣref aṣeḥrawi deffir yiḥemmalen-nni ay iḥuzan tagara-a imaziren n yizrazaɣen iṣeḥrawiyen yerna ssegran-d ixeṣṣaren d imeqranen », ɣef wakken ay d-tebder tnegga n yisalan taṣeḥrawit n SPS.

Dima deg temsalt-a, yenna-d unabaḍ (ḥukuma) alemmas n tnebḍit n Valencia d akken ad yefk « 125.000 n wuṛuten i uɛawen n yizrazaɣen iṣeḥrawiyen ay ḥuzan yiḥemmalen ineggura ».

« Lemɛawna-a ad tettunefk i lmend n ferru n wuguren n llsas ay d-yellan seg yixeṣṣaren-nni ayyes ay d-yegla ugeffur ɣef yizrazaɣen iṣeḥrawiyen », ɣef wakken ay d-yenna unemhal (mudir) amatu n umɛawen d temsetlelt n tnebḍit-a, Mass Federico Buyolo Garcia, deg yiwen n umyager d ugensas n Terni n Polisario deg Valencia, Mass Saad El Mami.

Iwekked-d daɣ yimḍebber-a abdad-nnes ɣer yidis n uɣref aṣeḥrawi deg yimenɣi-nnes uzrif (carɛi).