Asebter amenzawi

Taluft n Sudan n Unẓul: msefhamen yixṣimen ɣef temsalt n laman

ADDIS ABEBA – Msefhamen yixṣimen n taluft n Sudan n Unẓul ass n ttlata deg Addis Abeba ɣef temsalt n tɣellist (amn) ay d-yeddan deg umtawa n talwit ay yettwastenyan deg Ɣuct akken ad ifak ṭṭrad ay yefkan axeṣṣar i tmurt-a seg Dujembeṛ n 2013, ɣef wakken ay d-tenna tɣemsa n tmurt-a ass n laṛebɛa.

Yiwen seg ccuruḍ imeqranen akk n umtawa-a (ittifaq) n talwit netta d tukksa n yiserdasen seg tmaneɣt n tmurt, Juba, ay yellan ass-a ddaw leḥkem n unabaḍ. Seg yidis niḍen, amtawa-a yebder-d uɣal n unmazul (na’ib) n uselway aqbur Riek Machar, ɣer tmaneɣt Juba, yerna ad yecrek adabu d uselway Salva Kiir arma d asmi ad d-ilint tefranin. I usmekti, Riek Machar d netta ay d axṣim ameqran akk n uselway Kiir.

Yettwastenya umtawa-a n talwit gar Massaw Salva Kiir d Riek Machar ass n 26 Ɣuct akken ad msefhamen ɣef uḥbas n yimenɣi d beḍḍu n udabu. D acu kan, mazal la yettwarkaḍ umtawa-a s yimenɣi ay yezgan yettili-d gar sin-a n yixṣimen.

Yemsefham unabaḍ ass n ttlata d yiɣewwaɣen (mutamarridin) ɣef ufraq n yiserdasen ad yesɛun ttesriḥ ad qqimen deg Juba asmi ad ttwakksen seg-s yiɣallen imsellḥen.

S ujemmal, 4.830 n yiserdasen ad yesɛun ttesriḥ ad qqimen deg Juba. Azal n sin n yimuren seg-sen ɣef 3 (3420 n yirgazen) ad ilin seg yiɣallen n unabaḍ, ma d 1410 n yirgazen ad ilin seg yiɣallen iɣewwaɣen.

Iɣallen-a ad uɣalen ad ttɛassan tamdint ddukli, neɣ ad ttwabḍun d tigrawin ad ixeddmen deg temsulta (curṭa) taserdasant d tɣellist (amn) n daxel tmurt.