Asebter amenzawi

Apruṭukul n umsefham gar Tdukli n Yixeddamen d yimḍebbren n tkebbaniyin

LEZZAYER TAMANEɣT – Ur yettɛeḍḍil ara ad yettwastenyi yiwen n upruṭukul n umsefham i lmend n umciweṛ gar Tdukli Tamatut n Yixeddamen Idzayriyen d tuddsiwin (munaḍḍamat) n yimḍebbren n tkebbaniyin, ɣef wakken ay d-yenna ass n lexmis deg Lezzayer Tamaneɣt umaru amatu n Tdukli n Yixeddamen, Abdelmadjid Sidi Said.

Ixebber-d Sidi Said s waya deg yiwet n temlilit n ussemyuddes (tansiq) n tfidiṛaliyin tiɣelnawin n Tdukli-a, yerna ḥedṛen deg temlilit-a uneɣlaf n uxeddim, Mohamed El Ghazi, d uselway n Unmager n Yimḍebbren n Tkebbaniyin, Ali Haddad.

Apruṭukul-a yettwagem-d seg « Urkawal (mitaq) adamsan anmetti yerna ad yuɣal d netta ad yessedayen assaɣen (ɛalaqat) deg uxeddim », ɣef wakken ay d-yenna Sidi Said, war ma yerna-d ugar n ttfaṣil ɣef upruṭukul-a.

Deg wayen yerzan timlilit n 3 n yidisan ay d-yellan deg Tbeskert, yenna-d d akken llan-d deg-s yisurifen ɣer sdat deg uxeddim n Tdukli n Yixeddamen yerna ula d « anemhal (mudir) amatu n Tnarit Tagraɣlant n Uxeddim yebded ɣer yidis n yisurifen-a deg temlilit-nni aydeg yeḥdeṛ i tikkelt tamezwarut », ɣef wakken ay d-yenna Sidi Said s tumert.

Nnig waya, yumar (yefṛeḥ) daɣ Sidi Said deffir ma yettwastenya urkawal n urkad d tezdeg n uxedim gar uɣlif n ussegmi aɣelnaw d yinmula (naqabat), yerna d aya ad d-yesbedden tagnit n « lɛafya deg uḥric n ussegmi », ɣef wakken ay d-yenna.

Seg yidis niḍen, yenna-d Sidi Said d akken « Tadukli Tamatut n Yixeddamen Idzayriyen la tessefray ad d-teg ass n tezrawt (yawm dirasi) ɣef temsal tinmettiyin d lqanun n yinmula », yerna iswi-nnes netta d aḍman n urkad n tmurt d urẓam n tewwura akken ad yerbeḥ uxeddam.