Asebter amenzawi

Ugur n uxeddim yeqqen ɣer tdamsa

QSENṬINA – Tifrat i wugur n umahil (ɛamal) ur telli ara gar yifassen n tedbelt, wanag attan deg uḥric n tdamsa ay yessefken ad tennerni akken ad d-tesnulfu imukan n umahil, ɣef wakken ay d-yenna uneɣlaf n umahil, Mohamed El Ghazi, ass n ssebt deg Qsenṭina.

Deg yiwen n umyager d tɣemsa ay d-yellan deg yijifeṛ n terzi n uneɣlaf ɣef Qsenṭina, iger-d uneggaru-a tiɣri i yilemẓiyen akken « ad d-rren lwelha-nsen ɣer tdamsa akken ad d-afen amahil, ladɣa deg yinurar n tfellaḥt, tamguri (ṣinaɛa) d tmerrit », yerna tadbelt attan « teččuṛ », ɣef wakken ay d-yenna.

Seg yidis niḍen, yenna-d uneɣlaf d akken « d igiman (alaf) n yimukan n umahil ay yellan deg uḥric n lebni, maca ulac anwa ad ixedmen », am wakken ay d-yerna d akken « ixeddamen ay la yettawin lantrit, ur la d-ttawin ara wiyaḍ deg umkan-nsen acku tadbelt tesɛa ixeddamen s waṭas ».

Yenna-d uneɣlaf d akken yumar (yefṛeḥ) s yigmaḍ yelhan ay d-yefrurin seg temlilit n 3 n yidisan ay d-yellan ayyur yezrin, d tin aydeg d-yella « umciweṛ ay d-yewwin lfayda, d amciweṛ aydeg yella laman gar yicriken yemgerraden », am wakken ay d-yesmekti d akken yiwen seg yiwehhiyen imeqranen n umciweṛ-a netta d assefti i lmend n usnerni n tdamsa taɣelnawt.

Yerna-d daɣ uneɣlaf d akken « anabaḍ (ḥukuma) ur la yettcuḥḥu ara ɣef yidrimen, wanag atan iɛewwel akken ad d-yawi tikli tuṛcidt deg uṣerref ». Nnig waya, iwekked-d d akken « ulac aḥṛas deg uṣerref deg wayen yerzan lecɣal ay la yetteg uɣlif n umahil, am wakken ay ulac cceḥḥa deg lecɣal yerzan srid medden am udawi, isafaren d ussegmi ».