ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵕⴰⵍⵉ ⴰⴳⵔⴰⵖⵍⴰⵏ ⵏ ⵍⴻⵣⵣⴰⵢⴻⵔ: ⵓⵔ ⵉⵣⴰⴷ ⵡⴰⵔⴰ ⴷⴻⴳ ⵜⴻⵥⵔⵉⴳⵜ-ⴰ ⵜⴰⵎⴻⵣⵡⴰⵔⵓⵜ

ⵍⴻⵖⵡⴰⵟ - ⵡⵉⴷ ⵢⴻⵜⵜⴻⴽⴽⴰⵏ ⴷⴻⴳ ⵓⵕⴰⵍⵉ ⵏ ⵍⴻⵣⵣⴰⵢⴻⵔ ⴰⵢ ⵉⴼⵓⴽⴻⵏ ⴰⵙⵙ ⵏ ⵙⵙⴻⴱⵜ ⵙ ⵓⵃⵔⵉⵛ ⵡⵉⵙ 6 ⴳⴰⵔ ⵍⴻⵖⵡⴰⵟ ⴷ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵇⵔⵉⴱ ⴰⴽⴽ ⵏⵏⴰⵏ-ⴷ ⴷ ⴰⴽⴽⴻⵏ « ⵜⴰⴷⵢⴰⵏⵜ-ⴰ ⵓⵔ ⵉⵣⴰⴷ ⵡⴰⵔⴰ ⴷⴻⴳ-ⵙ », ⵉⵎⵉ ⴰⵢ ⴷ-ⵎⵍⴰⵍⴻⵏ ⴷ ⵡⴰⵟⴰⵙ ⵏ ⵢⵉⵄⴻⵡⵡⵉⵇⴻⵏ ⴷⴻⴳ ⵓⴱⵔⵉⴷ ⵙⴻⴳ ⵡⴰⵙⵎⵉ ⴰⵢ ⵢⴻⴱⴷⴰ ⵓⵎⵙⵉⵣⵡⴻⵔ-ⴰ.

« ⵉⵎⵙⵓⴷⴷⵙⴻⵏ (ⵎⵓⵏⴰⴹⴹⵉⵎⵉⵏ) ⵏ ⵓⵕⴰⵍⵉ-ⴰ ⵢⴻⵍⵍⴰ ⵢⴻⵙⵙⴻⴼⴽ ⴰⴷ ⴼⴽⴻⵏ ⵉ ⵢⵉⵎⴰⵏ-ⵏⵙⴻⵏ ⵓⴳⴰⵔ ⵏ ⵡⴰⴽⵓⴷ ⴰⴽⴽⴻⵏ ⴰⴷ ⴷ-ⵀⴻⵢⵢⵉⵏ ⵜⴰⴷⵢⴰⵏⵜ-ⴰ ⵢⴻⵔⵏⴰ ⵢⴻⵍⵍⴰ ⵢⴻⵙⵙⴻⴼⴽ ⴰⴷ ⵛⵉⵡⵕⴻⵏ ⵉⴱⴻⵕⵕⴰⵏⵉⵢⴻⵏ ⴰⵢ ⵢⴻⵙⵄⴰⵏ ⵜⵜⴻⵊⵕⵉⴱⴰ ⴷⴻⴳ ⵡⴰⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⴽⵔⴰ ⵏ ⵢⵉⵎⵜⵜⴻⴽⴽⵉⵢⴻⵏ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⴰⵃⵔⵉⵛ ⴰⵎⴻⵣⵡⴰⵔⵓ ⵏ ⵓⵕⴰⵍⵉ-ⴰ ⴰⵢ ⴷ-ⵢⴻⵍⵍⴰⵏ ⴰⵙⵙ ⵏ ⵍⴻⵜⵏⵉⵢⴻⵏ ⵢⴻⵣⵔⵉⵏ ⴳⴰⵔ ⵍⴻⵣⵣⴰⵢⴻⵔ ⴷ ⵍⴻⵖⵡⴰⵟ (380 ⵏ ⵢⵉⴽⵉⵍⵓⵎⵉⵜⵔⴻⵏ) ⵜⴻⵜⵜⵡⴰⴱⵟⴻⵍ ⵖⴻⴼ ⵍⴵⴰⵍ ⵏ « ⵍⴰⵎⴰⵏ » ⴷⴻⴳ ⵓⴱⵔⵉⴷ, ⵉⵎⵉ ⴰⵢ ⵍⵍⴰⵏ ⴰⵟⴰⵙ ⵏ ⵢⵉⴽⴰⵎⵢⵓⵏⴻⵏ ⴰⵢ ⵢⴻⵜⵜⴻⴷⴷⵓⵏ ⴷⴻⴳ ⵓⴱⵔⵉⴷ-ⵏⵏⵉ ⵢⴻⵔⵏⴰ ⴰⵢⴰ ⵢⴻⵍⵍⴰ ⵢⴻⵣⵎⴻⵔ ⴰⴷ ⵉⴹⵓⵔⵔ ⵉⵏⴻⵀⵀⴰⵕⴻⵏ, ⵍⴰⴷⵖⴰ ⵉⵎⵓⵟⴰⵔⴻⵏ.

ⴰⵃⵔⵉⵛ ⵡⵉⵙ 3 ⵏ ⵓⵕⴰⵍⵉ-ⴰ, ⴳⴰⵔ ⵍⴻⵎⵏⵉⵄⴰ ⴷ ⵜⵉⵎⵉⵎⵓⵏ, ⵢⴻⵜⵜⵡⴰⴱⵟⴻⵍ ⴷⴰⵖ, ⵢⴻⵔⵏⴰ ⵏⵏⴰⵏ-ⴷ ⵢⵉⵎⵙⵓⴷⴷⵙⴻⵏ ⴷ ⴰⴽⴽⴻⵏ ⵢⴻⵍⵍⴰ-ⴷ ⵡⴰⵢⴰ ⵖⴻⴼ « ⵙⵙⴻⴱⴱⴰⵜ ⵜⵉⵜⴻⴽⵏⵉⵢⵉⵏ », ⵡⴰⵔ ⵎⴰ ⴼⴽⴰⵏ-ⴷ ⵜⵜⴼⴰⵚⵉⵍ.

ⴰⵍⴰ ⴰⵃⵔⵉⵛ ⵡⵉⵙ 2 ⵏ ⵓⵕⴰⵍⵉ-ⴰ ⴰⵢ ⴷ-ⵢⴻⵍⵍⴰⵏ ⵢⴻⵍⵀⴰ ⵢⴻⵔⵏⴰ ⵖⵉⵍⴻⵏ ⵢⵉⵎⵜⵜⴻⴽⴽⵉⵢⴻⵏ ⴷ ⴰⴽⴽⴻⵏ ⵜⵉⵖⴰⵡⵙⵉⵡⵉⵏ ⴰⴷ ⴽⴻⵎⵎⵍⴻⵏⵜ ⴰⴽⴽⴻⵏ ⵉⵡⴰⵜⴰ ⴷⴻⴼⴼⵉⵔ ⵓⵃⵔⵉⵛ-ⵏⵏⵉ, ⵎⴰⵛⴰ ⵎⴰⵛⵉ ⴰⴽⴽⴻⵏ ⴰⵢ ⵢⴻⵍⵍⴰ ⵍⵃⴰⵍ.

ⴰⵃⵔⵉⵛ ⵡⵉⵙ 4 ⵢⴻⵍⵍⴰ-ⴷ ⴷⴻⴳ ⵜⴻⴳⵏⵉⵜ ⵏ ⴷⵉⵔⵉ ⴰⵢⴷⴻⴳ, ⵙⴻⴳ ⵡⴰⴽⴽⴻⵏ ⵔⵡⵉⵏⵜ ⵜⵖⴰⵡⵙⵉⵡⵉⵏ, ⴰⵔⵎⵉ ⵓⵍⴰ ⴷ ⵉⵎⵜⵜⴻⴽⴽⵉⵢⴻⵏ ⵓⵔ ⵥⵔⵉⵏ ⴰⵔⴰ ⴰⵏⴷⴰ ⵜⴻⵍⵍⴰ ⵜⴻⵏⵇⵉⴹⵜ ⵏ ⵡⴰⵡⵡⴰⴹ ⴷⴻⴳ ⵜⴻⵎⵙⵉⵣⵣⴻⵍⵜ-ⵏⵙⴻⵏ.

ⵓⵍⴰ ⴷ ⵉⵏⴻⵖⵎⴰⵙⴻⵏ ⴰⵢ ⵢⴻⵍⵍⴰⵏ ⴷⵉⵏ ⴰⴽⴽⴻⵏ ⴰⴷ ⴹⴻⴼⵔⴻⵏ ⴰⵕⴰⵍⵉ ⵎⵍⴰⵍⴻⵏ-ⴷ ⵓⴳⵓⵔⴻⵏ ⵍⴰⴷⵖⴰ ⴷⴻⴳ ⵓⵍⵇⴰⴹ ⵏ ⵢⵉⴳⵎⴰⴹ, ⵜⵓⴽⵛⵉ ⵏ ⵢⵉⵙⴰⵍⴰⵏ ⴷ ⵜⵓⵇⵇⵏⴰ ⵖⴻⵔ ⵉⵏⵜⴻⵔⵏⴻⵜ.