Asebter amenzawi

Aṛali Agraɣlan n Lezzayer: Ur izad wara deg teẓrigt-a tamezwarut

LEɣWAṬ - Wid yettekkan deg Uṛali n Lezzayer ay ifuken ass n ssebt s uḥric wis 6 gar Leɣwaṭ d Lezzayer Tamaneɣt, qrib akk nnan-d d akken « tadyant-a ur izad wara deg-s », imi ay d-mlalen d waṭas n yiɛewwiqen deg ubrid seg wasmi ay yebda umsizwer-a.

« Imsuddsen (munaḍḍimin) n uṛali-a yella yessefk ad fken i yiman-nsen ugar n wakud akken ad d-heyyin tadyant-a yerna yella yessefk ad ciwṛen ibeṛṛaniyen ay yesɛan ttejṛiba deg waya », ɣef wakken ay d-nnan kra n yimttekkiyen i Tnegga n Yisalan n Lezzayer.

Aḥric amezwaru n uṛali-a ay d-yellan ass n letniyen yezrin gar Lezzayer d Leɣwaṭ (380 n yikilumitren) tettwabṭel ɣef lǧal n « laman » deg ubrid, imi ay llan aṭas n yikamyunen ay yetteddun deg ubrid-nni yerna aya yella yezmer ad iḍurr inehhaṛen, ladɣa imuṭaren.

Aḥric wis 3 n uṛali-a, gar Lemniɛa d Timimun, yettwabṭel daɣ, yerna nnan-d yimsuddsen d akken yella-d waya ɣef « ssebbat titekniyin », war ma fkan-d ttfaṣil.

Ala aḥric wis 2 n uṛali-a ay d-yellan yelha yerna ɣilen yimttekkiyen d akken tiɣawsiwin ad kemmlent akken iwata deffir uḥric-nni, maca maci akken ay yella lḥal.

Aḥric wis 4 yella-d deg tegnit n diri aydeg, seg wakken rwint tɣawsiwin, armi ula d imttekkiyen ur ẓrin ara anda tella tenqiḍt n wawwaḍ deg temsizzelt-nsen.

Ula d ineɣmasen ay yellan din akken ad ḍefren aṛali mlalen-d uguren ladɣa deg ulqaḍ n yigmaḍ, tukci n yisalan d tuqqna ɣer Internet.