ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵓⵇⵇⵏⴰ ⵏ ⵜⵍⵓⴼⴰ ⵏ ⵛⵛⴻⵔⵇ ⴰⵍⴻⵎⵎⴰⵙ ⵖⴻⵔ ⴷⴷⵉⵏ ⴷ ⴰⵢⴻⵏ ⴰⵢ ⵢⴻⵔⵏⴰⵏ ⵛⵛⵡⴰⵍ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⵄⴰⵡⴻⴷ ⵢⵓⵖⴰⵍ ⵓⴳⵎⵓⴹ (ⵛⵛⴻⵔⵇ) ⴰⵍⴻⵎⵎⴰⵙ ⴷ ⴰⵏⵔⴰⵔ ⴰⵢⴷⴻⴳ ⵍⴰ ⵜⵜⵏⴰⵖⴻⵏⵜ ⵜⵎⵓⵔⴰ ⵉⵊⴻⵀⴷⴻⵏ, ⵢⴻⵔⵏⴰ ⵉⵎⴻⵏⵖⵉ-ⴰ ⵢⴻⵍⵍⴰ-ⴷ ⵙ ⵓⵙⵙⴻⵇⴷⴻⵛ ⵏ ⵓⵎⵅⴰⵚⴰⵎ ⵢⴻⵔⵍⵍⴰⵏ ⴳⴰⵔ ⵢⵉⵙⵓⵏⵏⵉⵢⴻⵏ ⴷ ⵢⵉⵛⵉⵄⵉⵢⴻⵏ ⴷ ⵜⴰⵍⵓⴼⵜ ⵏ ⵓⵒⵉⵜⵕⵓⵍ ⴷ ⵓⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⴷⴷⵓⵕ ⵏ ⵉⵕⴰⵏ ⴷⴻⴳ ⵓⵏⵔⴰⵔ ⴰⴳⵔⴰⵖⵍⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⵊⴻⵎⵄⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵓⵎⵙⴻⵏⵙⴻⵔⵜⵉ ⴰⴼⵕⴻⵏⵙⵉⵙ ⴳⵉⵍⵍⴻⵙ ⴽⴻⵒⴻⵍ.
« ⵜⵓⵇⵇⵏⴰ ⵏ ⴷⴷⵉⵏ ⵖⴻⵔ ⵜⵍⵓⴼⴰ, ⵍⴰⴷⵖⴰ ⴷⴻⴳ ⵙⵓⵔⵢⴰ, ⴰⵏⴷⴰ ⴰⵢ ⵎⵙⴻⵄⴷⴰⵡⴻⵏ ⵢⵉⵙⵓⵏⵏⵉⵢⴻⵏ ⴷ ⵢⵉⵛⵉⵄⵉⵢⴻⵏ, ⴷ ⵜⴰⵍⵓⴼⵜ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ, ⴷ ⴰⵢⴻⵏ ⴰⵢ ⵢⴻⵜⵜⴻⴽⴽⴰⵏ ⵎⵍⵉⵃ ⴷⴻⴳ ⵓⴱⴻⴷⴷⴻⵍ ⵏ ⵜⴻⵎⵏⴰⴹⵜ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴽⴻⵒⴻⵍ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⴷ ⵓⵙⴽⴰⵙⵉ (ⵏⵉⵇⴰⵛ) ⴰⵢ ⴷ-ⵢⴻⵍⵍⴰⵏ ⵖⴻⴼ « ⵡⵓⵔⴰⵔ ⴰⵎⴰⵢⵏⵓ ⵏ ⵜⵏⴻⵣⵎⴰⵔⵉⵏ ⵏ ⵓⴳⵎⵓⴹ ⴰⵍⴻⵎⵎⴰⵙ », ⴰⵢ ⴷ-ⵢⴻⵍⵍⴰⵏ ⴷⴻⴳ ⵢⵉⵊⵉⴼⴻⵕ ⵏ ⵜⵎⴻⵙⵔⵉⵜ ⵜⴰⴳⵔⴰⵖⵍⴰⵏⵜ ⵜⵉⵙ 20 ⵏ ⵓⴷⵍⵉⵙ ⵏ ⵍⴻⵣⵣⴰⵢⴻⵔ.
« ⵜⴰⴼⵙⵓⵜ ⵜⴰⵄⵕⴰⴱⵜ ⴰⵢ ⴷ-ⵢⴻⴱⴷⴰⵏ ⵙⴻⴳ ⵜⴻⴼⵔⵉⵇⵜ ⵏ ⵓⴳⴰⴼⴰ, ⴰⵏⴷⴰ ⵓⵍⴰⵛ ⴰⵎⵅⴰⵚⴰⵎ ⵏ ⴷⴷⵉⵏ ⵢⴻⵔⵏⴰ ⵜⴰⴷⴰⵎⵙⴰ ⵓⵔ ⵜⴻⴱⵏⵉ ⴰⵔⴰ ⴰⵍⴰ ⵖⴻⴼ ⵓⵎⴻⴷⵅⵓⵍ ⵏ ⵓⵒⵉⵜⵕⵓⵍ, ⵜⵓⵖⴰⵍ ⴷ ⵜⴰⵍⵓⴼⵜ ⵢⴻⵇⵇⵏⴻⵏ ⵖⴻⵔ ⴷⴷⵉⵏ ⴷⴻⴳ ⵜⵎⵓⵔⴰ ⵏ ⵓⴳⵎⵓⴹ ⴰⵍⴻⵎⵎⴰⵙ, ⴰⵏⴷⴰ ⵓⴳⵓⵔⴻⵏ ⵓⵖⴰⵍⴻⵏ ⵃⵓⵣⴰⵏ ⴰⴽⴽ ⵜⴰⵎⵏⴰⴹⵜ ⵢⴻⵔⵏⴰ ⵎⴰⵛⵉ ⴰⵍⴰ ⴷ ⵜⵉⵎⵓⵔⴰ ⴽⴰⵏ ⵉ ⵢⵉⵎⴰⵏ-ⵏⵙⴻⵏⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵣⵣⴰⴳ-ⴰ (ⵎⵓⵅⵜⴰⵚⵚ) ⴷⴻⴳ ⵍⵉⵙⵍⴰⵎ ⴷ ⵓⵎⴰⴹⴰⵍ ⴰⵄⵕⴰⴱ ⴰⵎⵉⵔⴰⵏ.
ⴰⵢⴻⵏ ⴰⵢ ⵍⴰ ⵉⴹⴻⵔⵔⵓⵏ ⴷⴻⴳ ⵙⵓⵔⵢⴰ, ⵄⵉⵔⴰⵇ, ⵍⵓⴱⵏⴰⵏ ⴷ ⵢⴰⵎⴰⵏ ⵢⴻⵜⵜⴻⴽⴽⴰ ⴷⴻⴳ « ⵜⵓⵖⴰⵍⵉⵏ ⵏⴻⵖ ⴰⵃⴱⴰⵙ ⵏ ⵜⵓⵖⴰⵍⵉⵏ ⵏ ⵉⵕⴰⵏ ⴷⴻⴳ ⵜⵙⵓⴷⴷⴻⵙⵜ (ⵉⵙⵜⵔⴰⵜⵉⴵⵉⵢⵢⴰ) ⵏ ⵓⴳⵎⵓⴹ ⴰⵍⴻⵎⵎⴰⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵉⵕⴰⵏ, ⴰⵢ ⵢⴻⵙⵜⴻⵏⵢⴰⵏ ⴰⵎⵜⴰⵡⴰ ⵖⴻⴼ ⵡⴰⵀⵉⵍ-ⵏⵏⴻⵙ ⵉⵎⵉⵖⴻⵙ (ⵏⴰⵡⴰⵡⵉ) ⴷ ⵜⵎⵓⵔⴰ ⵉⴵⴻⵀⴷⴻⵏ ⵜⵉⵎⴻⵇⵔⴰⵏⵉⵏ, ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵜⵎⵓⵔⴰ-ⴰ ⵏ ⵓⴳⵎⵓⴹ ⴰⵍⴻⵎⵎⴰⵙ ⴰⴽⴽⴻⵏ ⴰⴷ ⴷ-ⵜⵃⴻⵜⵜⴻⵎ ⵉⵎⴰⵏ-ⵏⵏⴻⵙ ⵓⵍⴰ ⴷ ⵏⴻⵜⵜⴰⵜ ⴷⴻⴳ ⵓⵏⵔⴰⵔ ⴰⴳⵔⴰⵖⵍⴰⵏ.
ⵎⴰⵙⵙ ⴽⴻⵒⴻⵍ, ⴰⵢ ⵉⵅⴻⴷⴷⵎⴻⵏ ⴷ ⴰⵙⴻⵍⵎⴰⴷ ⴷⴻⴳ ⵓⵙⵓⴷⵓ (ⵎⴰⵄⵀⴰⴷ) ⵏ ⵜⴻⵣⵔⴰⵡⵉⵏ ⵜⵉⵙⴻⵔⵜⴰⵏⵉⵏ ⵏ ⵒⴰⵔⵉⵙ, ⵢⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ ⴰⵖⴻⵍⵍⵓⵢ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ ⴰⴷ ⵉⵃⴰⵣ ⵓⵍⴰ ⴷ ⵜⵉⵎⵓⵔⴰ ⵏ ⵍⵅⴰⵍⵉⴵ ⴰⵏⴷⴰ ⴰⴷⴰⴱⵓ ⵢⴻⴱⵏⴰ ⵖⴻⴼ ⵢⵉⴷⵔⵉⵎⴻⵏ ⴰⵢ ⴷ-ⵢⴻⵙⵙⴰⴷⴰⴼ ⵓⵒⵉⵜⵕⵓⵍ.
