Asebter amenzawi

Twekked-d Tdukli Tuṛufit abdad-nnes ɣer tifrat i lfayda n uɣref aṣeḥrawi

BRUXELLES – Tenna-d Tgensast (mumattila) Tunnigt n Tdukli Tuṛufit i Tɣawsiwin n Uzɣar, Federica Mogherini, d akken tecɣeb-itt temsalt n yizerfan n umdan deg Uneẓruf Utrim, am wakken ay tɛawed twekked-d abdad n Tdukli Tuṛufit ɣer yidis n tifrat « tuɣdimt » (ɛadila) ad iḍemnen azref n uɣref aṣeḥrawi akken ad tt-id-yefru ɣef uzekka-nnes, ɣef wakken ay d-tenna tnegga n Europa Press ass n ssebt.

« Tebded Tdukli Tuṛufit ɣer yidis n umaru amatu n Yiɣlanen Yeddukklen i lmend n ferru uɣdim, aduman ad qeblen sin-nni n yidisan ay terza taluft, d tifrat ad iqadren agguccelman (taqrir al-maṣir) n uɣref n Uneẓruf Utrim s uqader n yimtawayen (ittifaqat) yeddan d yimenzayen d yiswan n Urkawal n Yiɣlanen Yeddukklen », ɣef wakken ay d-tenna Massa Mogherini deg yiwet n tririt ay tefka i tmazant tuṛufit Paloma Lopez.

Igensasen n ukabar aspenyuli n Podemos yellan deg Umni (barlaman) Uṛufi gren-d tiɣri i Massa Mogherini akken « Tadukli Tuṛufit ad teg tiɣawsiwin n tidet yerna war leɛḍil i lmend n yiriri n lemcawṛat » gar Terni n Polisario d Meṛṛuk i lmend n ferru n temsalt n Uneẓruf Utrim, am wakken ay d-gren tiɣri i Tdukli Tuṛufit akken ad d-tsemmi amazun uzzig (mabɛut xaṣṣ) i Uneẓruf Utrim.

Deg wayen yerzan arkaḍ n yizerfan n umdan d ugdal (manɛ) n tegrawin tibeṛṛaniyin akken ad adfent ɣer Uneẓruf Utrim, tenna-d Massa Mogherini d akken Tadukli Tuṛufit mazal-itt tesɛa anermis (ittiṣal) d tuddsiwin n tmetti taɣarimt d tid yekkaten ɣef yizerfan n umdan.

Aneẓruf Utrim d netta ay d tahrest (mustaɛmara) taneggarut deg Tefriqt yerna 40 n yiseggasen aya seg wasmi ay tella ddaw tuḍḍfa tameṛṛukit yeffɣen i lqanun.