ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵍⵎⵓⴷ ⵏ ⵚⵚⴻⵏⵄⴰ: ⵔⵏⴰⵏ ⵢⵉⵏⴻⵍⵎⴰⴷⴻⵏ ⵙ 14% ⴰⵙⴻⴳⴳⴰⵙ-ⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵓⵙⵙⵉⵍⴻⵖ (ⵜⴰⴽⵡⵉⵏ) ⴷ ⵓⵍⵎⵓⴷ ⴰⵙⴰⴷⵓⵔⴰⵏ, ⵎⵧⵀⴰⵎⴻⴷ ⵎⴻⴱⴰⵔⴽⵉ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴷ ⴰⴽⴽⴻⵏ ⵉⵏⴻⵍⵎⴰⴷⴻⵏ ⴰⵢ ⴷ-ⵢⴻⵎⵎⴻⵕⴽⴰⵏ ⴰⴽⴽⴻⵏ ⴰⴷ ⵍⴻⵎⴷⴻⵏ ⵚⵚⴻⵏⵄⴰ ⴷⴻⴳ 2015-2016 ⵔⵏⴰⵏ ⵙ 14% ⵖⴻⴼ ⵍⴻⵃⵙⴰⴱ ⵏ ⵓⵙⴻⴳⴳⴰⵙ ⵢⴻⵣⵔⵉⵏ.

ⴷⴻⴳ ⵓⵙⴰⵔⴰⴳ ⴰⵖⴻⵍⵏⴰⵡ ⵏ ⵢⵉⵏⴻⵎⵀⴰⵍⴻⵏ (ⵎⵓⴷⴰⵔⴰ’) ⵏ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ, ⵢⴻⵏⵏⴰ-ⴷ ⵓⵏⴻⵖⵍⵎⴰⴼ ⴷ ⴰⴽⴽⴻⵏ ⵔⵏⴰⵏ-ⴷ ⴰⵙⴻⴳⴳⴰⵙ-ⴰ ⵓⴳⴰⵔ ⵏ 51.000 ⵏ ⵢⵉⵏⴻⵍⵎⴰⴷⴻⵏ ⵖⴻⴼ ⵍⴻⵃⵙⴰⴱ ⵏ ⵢⵉⵍⵉⵏⴷⵉ (14%) ⵢⵉⵍⵉ ⴷⴻⴳ ⵢⵉⵙⴻⴳⴳⴰⵙⴻⵏ ⵢⴻⵣⵔⵉⵏ, ⵜⴰⵍⴻⵎⵎⴰⵙⵜ ⵏ ⵜⵎⴻⵔⵏⵉⵡⵜ ⵜⴻⵍⵍⴰ ⵙ 5% ⴽⴰⵏ.

ⵎⴰⵙⵙ ⵎⴻⴱⴰⵔⴽⵉ ⵢⴻⵔⵏⴰ-ⴷ ⴷ ⴰⴽⴽⴻⵏ ⴰⵙⴻⴳⴳⴰⵙ-ⴰ, ⵓⴳⴰⵔ ⵏ 377.000 ⵏ ⵢⵉⵏⴻⵍⵎⴰⴷⴻⵏ ⴰⵢ ⵢⴻⵍⵍⴰⵏ, ⴳⴰⵔ-ⴰⵙⴻⵏ 139.380 ⵏ ⵢⵉⵏⴻⵍⵎⴰⴷⴻⵏ ⵙⴻⴳ ⵡⵉⴷ ⴰⵢ ⵢⴻⵇⵇⴰⵔⴻⵏ ⵢⴻⵔⵏⴰ ⵙⵙⴻⵅⴷⴰⵎⴻⵏ ⴰⵢⴻⵏ ⵖⵔⴰⵏ ⴷⴻⴳ ⵓⵏⵔⴰⵔ, ⵎⴰ ⴷ 103.941 ⵏ ⵢⵉⵏⴻⵍⵎⴰⴷⴻⵏ ⵙⴻⴳ ⵡⵉⴷ ⴰⵢ ⵉⵍⴻⵎⵎⴷⴻⵏ ⴽⴰⵏ.

ⵡⵉⴷ ⴰⵢ ⴷ-ⵢⴻⵎⵎⴻⵕⴽⴰⵏ ⴷ ⵉⵎⴰⵢⵏⵓⵜⴻⵏ ⴰⵙⴻⴳⴳⴰⵙ-ⴰ ⵔⵏⴰⵏ ⵖⴻⵔ 266.255 ⵏ ⵢⵉⵎⴰⵏⵓⵏⴻⵏ (ⵎⵓⵜⴰⵔⴰⴱⴱⵉⵚⵉⵏ) ⴷ ⵢⵉⵏⴻⵍⵎⴰⴷⴻⵏ ⴰⵢ ⵢⴻⵍⵍⴰⵏ ⵢⴰⴳⵉ, ⵢⴻⵔⵏⴰ ⵍⵍⴰⵏ ⴷⴰⵖ ⴷⴻⴳ ⵍⴻⵣⵣⴰⵢⴻⵔ 1143 ⵏ ⵢⵉⵎⴰⵏⵓⵏⴻⵏ ⵉⴱⴻⵕⵕⴰⵏⵉⵢⴻⵏ ⴰⵢ ⴷ-ⵢⵓⵙⴰⵏ ⵙⴻⴳ ⵜⵎⵓⵔⴰ ⵢⴻⵎⴳⴻⵔⵔⴰⴷⴻⵏ. ⵙ ⵡⴰⵢⴰ, ⵍⴻⵣⵣⴰⵢⴻⵔ ⵜⴻⵙⵄⴰ, ⵙ ⵓⵊⴻⵎⵎⴰⵍ 643.700 ⵏ ⵢⵉⵎⴰⵏⵓⵏⴻⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵍⵎⵓⴷ ⴰⵙⴰⴷⵓⵔⴰⵏ (ⵎⵉⵀⴰⵏⵉ), ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⵉⵏⴻⵍⵎⴰⴷⴻⵏ ⴰⵢ ⴷ-ⵢⴻⵎⵎⴻⵕⴽⴰⵏ ⵖⴻⵔ-ⵙ ⵡⵡⴹⴻⵏ ⵖⴻⵔ 1200, ⴳⴰⵔ-ⴰⵙⴻⵏ 522 ⵏ ⵢⵉⵏⴻⵍⵎⴰⴷⴻⵏ ⵉⵎⴰⵢⵏⵓⵜⴻⵏ. ⵉⵏⴻⵍⵎⴰⴷⴻⵏ-ⴰ ⴰⴷ ⵖⵔⴻⵏ ⴷⴻⴳ 5 ⵏ ⵢⵉⵙⵓⴷⴰ (ⵎⴰⵄⴰⵀⵉⴷ) ⵏ ⵓⵍⵎⵓⴷ ⴰⵙⴰⴷⵓⵔⴰⵏ ⴷⴻⴳ ⵜⵡⵉⵍⴰⵢⵉⵏ ⵏ ⵜⴱⴰⵜⴻⵏⵜ, ⵜⵉⴱⴻⵙⴽⴻⵔⵜ, ⵍⴻⴱⵏⵉⴷⴰ, ⵇⵙⴻⵏⵟⵉⵏⴰ ⴷ ⵙⴹⵉⴼ.

«ⴰⵟⴰⵙ ⵏ ⵢⵉⵍⴻⵎⵥⵉⵢⴻⵏ ⴰⵢ ⵢⴻⴱⵖⴰⵏ ⴰⴷ ⵎⵎⴻⵕⴽⵉⵏ ⵖⴻⵔ ⵓⵙⵙⵉⵍⴻⵖ ⵏⴻⵖ ⴰⵍⵎⵓⴷ ⴰⵙⴰⴷⵓⵔⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵎⴰⵙⵙ ⵎⴻⴱⴰⵔⴽⵉ.