Asebter amenzawi

Anmager ɣef talwit d laman deg Tefriqt: imenɣi mgal rrebrab

DAKAR – Aḥezzeb d ussefrek n tlufa deg Tefriqt, tabdammast (wasaṭa) d yimenɣi mgal rrebrab d nitenti ay d timsal timeqranin ayɣef d-yella wawal deg Unmager Agraɣlan ɣef Talwit d Tɣellist deg Tefriqt ay ikemmlen ass n ttlata deg Dakar s uttekki n yimdanen n uswir unnig.

Deg teẓrigt-a (ṭabɛa) tis snat n Unmager n Dakar, azal n 800 n yimttekkiyen (gar-asen ula d imḍebbren) d yimasayen n tuddsiwin tigraɣlanen d temnaḍanin, iserdasen d yimnadiyen ay yettekkan deg yisaragen d tnemsal n tedyant-a.

Dɣa deg tegnit-a, iwekked-d Ramtane Lamamra, aneɣlaf adzayri n tɣawsiwin n uzɣar, d akken Lezzayer « terna rrebrab seg yidis asuddsan (istratiǧi) s usfel ay yefka Yigen (ǧayc) Aɣelnaw Aɣerfan ay iṣeggmen iɣallen-nnes yerna iɛewwel ad yennaɣ, am wakken ay d-yella waya s uɛawen d uɛewwel n uɣref adzayri ».

I lmend n waya, iqeddem-d Mass Lamamra ttejṛiba n Lezzayer deg yimenɣi mgal rrebrab am wakken ay d-yenna d akken rrbeḥ-a yella-d s « tsertit n ufus yeẓẓlen i wid ay yettwaɣurren » akken ad d-yili umṣaleḥ, am wakken ay d-tga Lezzayer arkawal (mitaq) n umsuɣal aɣelnaw ay ifuken ccwal, yerna d aselway n tegduda, Abdelaziz Bouteflika, ay d-yessumren aya.

Seg yidis niḍen, iwekked-d uneɣlaf n tɣawsiwin n uzɣar ɣef wussis « yettkemmilen » n Lezzayer deg wayen yerzan tukksa n tiḍḍurfa d yimenɣi mgal waya ama daxel tmurt, neɣ deg temnaḍt, neɣ deg umaḍal, s ussefti deg ussegmi (tarbiya) d usselmed n « wazalen n tidet n Lislam » i yilemẓiyen, ladɣa imi « tirgawin tirebrabin la ɛerrḍent ad cemmtent azalen-a ».