Asebter amenzawi

Ad terẓem Peugeot lluzin deg Lezzayer (Bouchouareb)

LEZZAYER TAMANEɣT – Yenna-d uneɣlaf n temguri (ṣinaɛa), Abdesselam Bouchouareb, ass n ttlata deg Lezzayer Tamaneɣt, d akken Peugeot la tessefray ad terẓem lluzin deg Lezzayer ɣer yidis n ufurk-nnes n Faurecia.

« Ad d-tas Peugeot ɣer Lezzayer d ufurk-nnes n Faurecia akken ad as-twekkel kra n lecɣal. Dɣa d aya ad yeǧǧen takebbanit-a ad tesɛu annummed (indimaǧ) yelhan seg wasmi ad tebdu axeddim da », ɣef wakken ay d-yenna Mass Bouchouareb i tɣemsa deg yijifeṛ n umyager adamsan adzayri-aswisi.

Deg wayen yerzan asenfar n uṛekkeb n tkeṛṛusin n Peugeot deg Lezzayer, yenna-d uneɣlaf d akken atan yedda mliḥ ɣer sdat.

« Qrib ad d-yewjed usenfar-a. Ggrant-d kan kra n ledwaṛ », ɣef wakken ay d-iwejkked, am wakken ay d-yerna d akken yemsefham yidis adzayri d yidis afṛensis akken lluzin-nni tamaynut n Peugeot ad tuɣal ad d-txeddem 4 n tmudmin (ṭirazat) n tkeṛṛusin, gar-asent takeṛṛust n sselɛa d tkamyunt, deg tazwara-a.

Mi yettwatter ɣef yisenfaren niḍen n ticcurka deg unrar n tkeṛṛusin deg Lezzayer, yenna-d Mass Bouchouareb d akken asenfar n Peugeot d netta ay d asenfar awḥid ayɣef d-yella uxeddim deg unrar, taswiɛt-a.

Deg wayen yerzan ssuq n tkeṛṛusin tiqburin, yenna-d uneɣlaf d akken tettwassebded-d yiwet n tegrawt n uxeddim 5 n wayyuren aya akken ad d-swejden leqwanin ad iṣeggmen ssuq-a.