Asebter amenzawi
95% seg tkeṛṛusin n Renault Symbol nzant i medden
WEHṚAN – 95% seg tkeṛṛusin n Renault Symbol ay yenzan i medden n menwala, deg wakud aydeg ala 5% ay yenzan i tkebbaniyin tinagdudin (ɛumumiyya) ɣef wakken ay d-yenna, ass n ttlata deg Wehṛan, unemhal amatu n tegrawt n « Renault Algerie », Guillaume Josselin.
Deg yiwen n usarag ay iga ɣer yidis n uselway-anemhal amatu n tkebbanit n « Renault Algerie Production », Bernard Solhinac, i lmend n usfugel n umulli amezwaru n urẓam n lluzin n Wad Tlilat d wuffuɣ n tkeṛṛust tamezwarut seg-s, yenna-d Mass Josselin d akken lluzin-a tga-d igmaḍ yelhan.
« Renault d nettat ay d takeṛṛust ay yettnuzun aṭas akk deg Lezzayer. Deg kraḍ-a (3) n wayyuren ineggura, nuɣal d imezwura deg ssuq s tkeṛṛust n Symbol », ɣef wakken ay d-yenna s tumert (lfeṛḥ) unemhal amatu n tegrawt n « Renault Algerie », am wakken ay d-iwekked d akken takeṛṛust n Symbol « terbeḥ deg yikayaden (ixtibarat) n tɣara d laman ».
« Newweḍ ɣer uswir-nni n tɣara (ǧawda) wuɣur neḍmeɛ ad naweḍ, yerna tikeṛṛusin-nneɣ watant akk ilugan d tegna (maɛayir) », ɣef wakken ay d-yerna.
Deg wayen yerzan lebni n lluzin n tkebbanit tafṛensist n Peugeot ad ibeɛden 10 kan n yikilumitren ɣef tin n Renault, yenna-d Josselin d akken « aya ad d-yesduqqes ṛṛuḥ n umsizwer ɣer Renault ay yebɣan ad teḍḍef amkan amezwaru deg ssuq », am wakken ay d-yenna d akken Renault tseɛɛu yal aseggas 100.000 n yimectura imaynuten.
Deg wayen yerzan awekked n lecɣal i tkebbaniyin niḍen, ,nnan-d yimasayen (mas’ulin) n Renault xeddmen d tkebbalit n « Joktal », yerna rnan gan leɛqudat d 3 n tkebbaniyin niḍen akken ad d-aɣen ticeqqufin seg ssuq adzayri. « Martur Algerie » ad tuɣal ad aɣ-d-tesnuzuy ikersiyen seg Yennayer d asawen. « Sitel » ad aɣ-d-tesnuzuy iguta (kablat) n trisiti seg tgara n 2016 d asawen, ma d « Sarel » ad aɣ-d-tesnuzuy azal n 30 n tceqqufin n uplastik seg tezwara n 2017 d asawen.
