Asebter amenzawi

Tanzanya-Lezzayer: ur ttekkayen ara Mesbah d Boudebouz

LEZZAYER TAMANEɣT – Nnan-d yimariren n tcirt n uḍar Djamel Mesbah d Ryad Boudebbouz d akken ur ttekkayen ara deg temlilit ad turar Lezzayer mgal Tanzanya ass n ssebt deg Dar es Salaam deg tuzzya tis snat n temliliyin n waffas (taṣfiyat) n Teqbuct n Umaḍal n 2018.

Mesbah (ay yetturaren deg teɣlamt n Sampdoria n Jenwa, Ṭṭalyan) suɛfen-t yerna ur yettekkay ara deg temlilit, ula ma ad yeddu d yimeddukal-nnes n teɣlamt taɣelnawt ɣer Tanzanya. Ma d Boudebouz (ay yetturaren deg Montpellier, Fṛansa), yettunefk-as ttesriḥ ad yeddu seg Lezzayer ɣer Fṛansa akken ad idawi. Ad d-yuɣal ass n ssebt akken ad yessewjed iman-nnes, ɣer yidis n yimeddukal-nnes, i temlilit n wuɣal ad d-yilin ass n 17 Nwembeṛ deg usarir n Mustapha-Tchaker deg Leblida (7s15 n tṣebḥit).

Seg yidis niḍen, Nabil Bentaleb yesleɣma (tadarraba) ass n ttlata i yiman-nnes deg Wammas Atekni Aɣelnaw n Tfidiṛalit Tadzayrit n Tcirt n Uḍar deg Sidi Musa (Lezzayer).

D acu kan, amarir-a ay yetturaren deg Tottenham (Langliz) ur yetḥeqq ara ma ad yurar deg temlilit n Tanzanya.

Aɣabi n yimariren-a ad t-nernu ɣer win n ulemmas n FC Porto, Yacine Bahimi, d Hilal Soudani (ay yetturaren ɣer Dinamo Zagreb, Kṛuwatya), d ulemmas amenṭag n FC Valencia (Spenyul), Sofiane Feghouli. 3-a n yimariren uɣen-tent yerna qqimen ad sgunfun. D acu kan, Brahimi ad d-yas ɣer Lezzayer ass n ssebt akken ad yessewjed iman-nnes i temlilit n wuɣal.

Tebda teɣlamt taɣelnawt assewjed-nnes deg Wammas Atekni Aɣelnaw n Sidi Musa, yerna asleɣmu-nsen (tadrib) aneggaru ad d-yili ass n laṛebɛa ɣef 4s30 n tmeddit, uqbel ma ddan ass n lexmis ɣef 11s30 n tṣebḥit ɣer Tanzanya akken ad uraren mgal « Taifa Stars ».