Asebter amenzawi

Tuṛuft: taluft n Uneẓruf Utrim d tamsalt n tukksa n listiɛmaṛ

BRUXELLES – Taluft n Uneẓruf Utrim d tamsalt n tukksa n ussehres (istiɛmar), ɣef wakken ay ɛawden wekkden-d yimazzayen n lqanun agraɣlan ay yemlalen ass n ttlata deg Umni (barlaman) n Tdukli Tuṛufit deg Bruxelles i lmend n Usarag ɣef « yizerfan n umdan d uqader n lqanun agraɣlan deg Uneẓruf Utrim ».

« Ula ma Meṛṛuk tebɣa ad terr taluft-a d tamsalt n beḍḍu n tmurt, tamsalt-a tban d akken d tin n tukksa n ussehres. Aya ur yezmir ad yettwankeṛ », ɣef akken ay d-wekkden akk wid ay yettekkan deg usarag-a ay d-yellan s ṛṛay n tiddukla tagraɣlant n yimazzayen (xubara’) n lqanun i lmend n Uneẓruf Utrim s lemɛawna n tegrawt tazelmaḍt d Tegrawt Tucrikt i lmend i Uneẓruf Utrim n Umni Uṛufi.

« Aneẓruf Utrim werǧin yelli ddaw tnaya (siyada) tameṛṛukit, dɣa d awezɣi ad neḥseb aya d tamsalt n beḍḍu n tmurt », ɣef wakken ay d-sfehmen, am wakken ay d-wekkden d akken Aneẓruf Utrim d yiwen seg 17 n yikalen ur yesɛin tafulmant (ḥukm dati) ayyes steɛṛfen Yiɣlanen Yeddukklen.

« Ass-a, tifrat tawḥidt i ferru n taluft-a nettat d tukci n uzref ur yettwankaṛen i uɣref aṣeḥrawi akken ad tt-id-yefru ɣef uzekka-nnes », ɣef wakken ay d-yenna uselmad aspenyuli n lqanun agraɣlan, Raul Rodriguez Magdalino.

Deg tezwara n yiseggasen n 1990, Meṛṛuk d Polisario qudrent aḥbas-nsent n yimenɣi, yerna tettwassebded-d Tuɣdaḍt n Yiɣlanen Yeddukklen akken ad d-teg tasefrant (istifta’) deg Uneẓruf Utrim, maca ar ass-a ur tessaweḍ ara ad teg aya.