Asebter amenzawi
Amulli wis 11 n tmettant n Arafat: tuɣal-as tejmilt deg Lezzayer
LEZZAYER TAMANEɣT – Yenna-d unmahal (safir) afalesṭini deg Lezzayer Tamaneɣt, Louai Aissa, ass n ttlata, deg yiḍ n umulli wis 11 n tmettant n Yasser Arafat, d akken ameṛḥum-a « yella d argaz n talwit yerna d amdan ay yesseḥsaben i uzekka », am wakken ay d-iṛebba acḥal d imḍebber afalesṭini, iga Lintifaḍa yerna iwet-d deg tɣennant tisṛayilit ay yugin talwit.
Deg yiwen n usarag ay d-yellan deg unmager (muntada) n uɣmis ayallas n El Moudjahid, yerna tga-t tiddukla n Machaal el Chahid d uɣmis-a s umɛawen d tmahelt (safara) tafalesṭinit deg Lezzayer, yenna-d unmahal afalesṭini dakekn « ayyur n Nwembeṛ yesmektay-d s temɣer n Tegrawla Tadzayrit ay as-ibeddlen i umezruy tiddit, maca ayyur-a yesmektay-aɣ-d daɣ s ccfawat-nni tuqriḥt n lufeq n Balfour ».
« Awanak (dawla) afalesṭini imzireg (mustaqil) yettwasseɣret-d deg Lezzayer », ɣef wakken ay d-yesmekti unmahal afalesṭini ay d-iwekkden d akken ulac tamurt aydeg ḍemɛen Yifalesṭiniyen aɛawen ameqran am wa menɣir Lezzayer.
Deg wayen yerzan tidyanin tineggura deg yikalen ifalesṭiniyen, iwet-d unmahal afalesṭini deg tsertit n taṣehyunit n utɛeddi mgal uɣref afalesṭini i lmend n « uḍman » n uḥuddu n Yisṛayiliyen, akken ay d-yenna Benyamin Netanyahu.
Yasser Arafat yellan d azamul deg yimenɣi afalesṭini, d netta ay d-yesḥesben i tegrawla yerna d netta ay d-yebnan tamagit (huwiyya) taɣelnawt tafalesṭinit ay teddem Tuddsa n Uslelli n Falesṭin d tegrawin-nnes ay yessedday umussu n Fatah.
Yennuɣ Arafat i lmend n Falesṭin deg unrar agraɣlan, yerna yebda-d waya s yinaw-nnes (xiṭab) deg Yiɣlanen Yeddukklen deg 1974, anda ay d-yenna i wid iḥedṛen: « usiɣ-d s ubeckiḍ deg yiwen n ufus d tseḍḍa n uzemmur deg wayeḍ, ihi ur ttaǧǧat ara taseḍḍa-nni ad teɣli seg ufus-inu ».
Amulli n usseɣret (iɛlan) n Uwanak n Falesṭin ad d-yili ass n 15 Nwembeṛ.
« Aseqqamu Aɣelnaw Afalesṭini yesseɣret-d assebded n Uwanak n Falesṭin ɣef wakal-nneɣ afalesṭini, yerna Lquds d tamaneɣt-nnes », ɣef wakken ay d-yenna deg 1988 deg Lezzayer.
105 n tmura ay yesteɛṛfen s Falesṭin yerna Falesṭin tsemma-d 70 n yinmahalen (sufara’) deg tmura n umaḍal.
Arafat yudef ɣer tegrawin timsellḥin tifalesṭiniyin asmi ay yesɛa 17 n yiseggasen, yerna yettekka deg yimenɣiyen n ṭṭrad n 1948, akken kan ay d-yennulfa uwanak aṣehyuni.
Deg 1965, yessebded-d Arafat amussu afalesṭini n Fatah ay d-yesnekren imenɣi imselleḥ mgal Iṣrayil. Sakkin, yuɣal d imḍebber n imḍebber n Tuddsa n Uslelli n Falesṭin yellan d tagensast (mumattila) tusḍift (qanuniyya) tawḥidt n uɣref afalesṭini.
Anmager-a ttekkan deg-s daɣ aṭas n yinmahalen yellan deg Lezzayer, kra n yimjahden d yigensasen n tegrawin tifalesṭiniyin yemgerraden yellan deg Lezzayer.
