Asebter amenzawi

Talɣuɣa taɛṛabt n tcirt n uqecwal: GS Petroliers terna Shabab n Limaṛat

DUBAI – Tɛedda teɣlamt n GS Petroliers ɣer uzgen n tneggarut n telɣuɣa taɛṛabt n teɣlamin tilɣuɣin n tcirt n uqecwal (irgazen) deffir ma terna taxṣimt-nnes n Limaṛat, Shabab, s 88 ɣer 83, deg temlilit ay d-yellan ass n laṛebɛa deg Dubai.

Naqal, deg tezwara n temlilit, d Shabab ay yernan Idzayriyen s 7 n tenqiḍin (12-5) deg 5 n tedqiqin timezwura, maca ssawḍen Yidzayriyen ad d-refden iman-nsen akken ad ssiwḍen agmuḍ ɣer 20-20, uqbel ma xetmen tis 4-nni n wakud s 27 i GS Petroliers ɣer 22 i Shabab.

Deg tis-kuẓet-nni tis snat, ssawḍen yimariren n GS Petroliers ad d-gen agmuḍ n 52 ɣer 43.

Deg tis-kuẓet tis 3, yella-d lexṣaṣ deg temḥaddit n GS Petroliers am wakken ay sṛuḥen tacirt acḥal d tikkelt, dɣa d aya ay yeǧǧan imariren imaṛatiyen ad rebḥen aḥric-a s 67 ɣer 66.

Maca, deg tis-kuẓet tis 4, uɣalen-d Yidzayriyen n GS Petroliers ɣer unrar s wurar adaxli yerna s temḥaddit taweɛṛant, dɣa d aya ay ten-yeǧǧan ad faken timlilit s 88 ɣer 83.

S waya, tessaweḍ GS Petroliers ad tɛeddi ɣer uzgen n tneggarut anda ad tqabel taɣlamt ad irebḥen deg temlilit taneggarut n tis 4 n tneggarut, dɣa tezmer ad tili ya d taɣlamt n Al Rayan neɣ d tin n Al Jaish (deg snat yid-sent seg Qaṭar).

Igmaḍ n tis 4 n tneggarut:

Al Ahly n Ṭrables (Libya) - Itri n Ssaḥel (Tunes) 76-88

Shabab (Limaṛat Taɛṛabin Yeddukklen) - GS Petroliers (Lezzauer) 83-88

US Munastir (Tunes) – Tamsulta [Curṭa] (Ɛiraq) 76-74

Al Rayan (Qaṭar) - Al Jaish (Qaṭar) Werɛad

Ahil n temliliyin n uzgen n tneggarut (Ljemɛa – akud n Lezzauer):

4s00 n tmeddit: Itri n Ssaḥel (Tunes) - US Munastir (Tunes)

4s00 : GS Petroliers (Lezzauer) – Tin ad irebḥen (Al Raya neɣ Al Jaish).