Asebter amenzawi

Yettwassebded ttawil n laman d ameqran i uḥaṛeb n rrebrab deg Fṛansa

PARIS - Yettwassebded yiwen n ttawil n tɣellist d ameqran, ass n ssebt, deffir txazzabiyin-nni ay iḥuzan ass n ljemɛa deg yiḍ tamaneɣt tafṛensist ay yeglan, ɣef wakken d-yeffeɣ taswiɛt-a, 128 n yimdanen d 237 n yimejraḥ, gar-asen aṭas deg tegnit n diri.

I lmend n waya, yenna-d uneɣlaf afṛensis n tɣawsiwin n daxel, Bernard Cazeneuve, d akken akk iɣallen n tɣellist ttwaheyyan-d akken ad qablen tagnit-a n txazzabiyin tirebrabin.

Aṭas n yimsulta (riǧal curṭa), imestulen, ixeddamen ifessin lbumbat, iseɣsayen d yiserdasen ay d-yeffɣen akken ad ɛassen tamnaḍt n Paris, am wakken ay d-ttwernant 5 n tkebbaniyin n Tfekka Tagdudant n Tɣellist i usseǧhed n tɛessast.

Tuɣal-d daɣ tɛessast ɣef tlisa aydeg tettwasseḥṛes tɛessast ɣef 61 n yimukan igejdanen n uɛeddi n tkeṛṛusin. Nnig waya, tessuter Fṛansa seg yicriken-nnes uṛufiyen « ad sǧehden taɛessast n yimsiklen (musafirin) ay la d-yetteddun ɣer Fṛansa s tmacint neɣ s usafag », neɣ s ubrid.

Tegget daɣ tɛessast ɣef teɣsar (maḥaṭṭat) n tmacinin n temdinin, n tlisa d teɣsar tigraɣlanin, am wakken ay yettwasseǧhed ussefqed deg yisugan (mawani’) d yibriden imeqranen, ladɣa ibriden imazzalen.

Ugar n 200 n yimestulen (darakiyyin) ay yettwaḥazen akken ad ɛawnen tamsulta (curṭa) n Paris, yerna snat n tgezmiwin n Tegrawt n Tgermant n Temsetla Taɣelnawt n Fṛansa ay yettwaheyyan akken ad d-grent iman-nsent deg unrar, ɣef wakken ay d-yessefhem uneɣlaf, ay d-yernan d akken 1000 n yiserdasen ay yernan ttwaheyyan-d, ladɣa deg temnaḍt n Ile-de-France, akken ad ttezzin yerna ad ttɛassan Paris deg wussan ay d-yetteddun, deg ukatar n temhelt n Sentinelle, ɣef wakken ay d-yerna Mass Cazeneuve.

Ttawil-a n tɣellist sǧehden-t s 30.000 n yimsulta, imestulen d yiserdasen ay d-yelhan, acḥal n wayyuren aya s uḥuddu n 5000 n yimukan aydeg yezmer ad d-yili wayen n diri deg wakk timnaḍin n Fṛansa, deg ukatar n uɣawas (muxaṭṭaṭ) n Vigipirate.