Asebter amenzawi
Aneẓruf Utrim d yiwen seg yimukan aydeg ndint aṭas akk n lminat
MADRID – Nnan-d ass n ssebt deg Madrid yimttekkiyen n Usarag Uṛufi n Udhal d Temsetlelt d Uɣref Aṣeḥrawi (EUCOCO) d akken Aneẓruf Utrim d yiwet seg temnaḍin aydeg ndint aṭas akk n lminat deg umaḍal deffir uẓdam ay ẓedmen fell-as yiserdasen imeṛṛukiyen deg 1975, am wakken ay d-gren yimttekkiyen-a tiɣri i Meṛṛuk akken ad tḥezzeb deg wayen yerzan wid yenḍerren seg lminat-a.
« Ad ilint ugar 7 n yimelyunen n lminat deg yikalen iṣeḥrawiyen ɣer yidis n waṭas n lbumbat ay werɛad ur ṭṭerḍqent ara », ɣef wakken ay d-sḥassfen yimttekkiyen tnemselt (warca) n « Aɣrab, Lminat d teɣtas n lminat », am wakken ay d-sfehmen d akken amur ameqran seg lminat-a ttwameḍlent deg temnaḍt ay d-yezgan deg ccerq n uɣrab-nni n beḍḍu n wakal aṣeḥrawi (aɣrab n lɛaṛ) ay bnan yiserdasen imeṛṛukiyen deg Uneẓruf Utrim deg yiseggasen n 1980 yerna ɣezzif 2720 n yikilumitren, yerna llan wid ay yettwalin d akken tamnaḍt n uɣrab-a d nettat ay d iger ameqran akk n lminat yellan deg umaḍal.
Lminat d lbumbat ay werɛad ur ṭṭerḍqent swaɣent aṭas tameddurt n yimezdaɣen iṣeḥrawiyen, ɣef wakken ay d-nnan yimttekkiyen, yerna aya iḥuza ama d wid yeddren deg yikalen ay teḍḍef Meṛṛuk neɣ deg yikalen yellan beṛṛa i uɣrab-nni. Nnig waya, iger-a n lminat yesseḥṛes tiddit n yimdanen d tkessawt n lmal.
S waya, nnan-d yimttekkiyen d akken « ugar n 2500 n yimdanen seg wakk leɛmaṛ ay yenḍerren seg lminat-a seg 1975 », yerna ɛeyynen-d d akken ulac leḥsab imdeqqeq ad d-yefken akk wid yenḍerren seg-sent, ladɣa deg wayen yerzan wid ay izedɣen deg yikalen ay teḍḍef Meṛṛuk.
« Meṛṛuk mazal tugi ad d-tessuffeɣ isalan ɣef waya akken ur tetteg ara lwajeb-nnes deg wayen yerzan tiɣtas (ḍaḥaya) tiṣeḥrawiyin », ɣef wakken ay d-nnan yimttekkiyen.
Nnig waya, wekkden-d daɣ wid yettekkan deg usarag-a d akken ad d-yili ccɣel i uḥṛas n Meṛṛuk akken ad teg lwajeb-nnes sdat umɣiwan (muǧtamaɛ) agraɣlan.
S waya, ad d-ilint tezrawin (dirasat) ɣef yixeṣṣaren ayyes d-yegla uɣrab-nni d lminat, am wakken ad d-ilin yisenfaren i uɛawen n teɣtas-nni yenḍerren seg lminat-a, d ussebɣes n yisenfaren yeqqnen ɣer wugur-a n lminat s usḥulfu n yidisan ay terza temsalt akken ad d-lhun d tukksa n lminat-a.
