Asebter amenzawi
27 n yiseggasen seg wasmi ay d-tettwassebded ddula tafalesṭinit deg Lezzayer
LEZZAYER TAMANEɣT – Iɛawed iwekked-d unmahal (safir) afalesṭini deg Lezzayer, Louay Aissa, ass n lḥedd, ɣef tuḍḍfa n uɣref afalesṭini deg uzarug (istiqlal) d lebni n uwanak afalesṭini ad yesɛun lḥeṛma yerna d Lquds ay d tamaneɣt-nnes, am wakken ay yerra tajmilt i lebɣi ay sɛan ass-a Yifalesṭiniyen deg yimenɣi-nsen ay yessmaden imenɣi aserti d udiplumati.
Yenna-d unmahal afalesṭini aya deg yiwen n usarag umi semman « Awanak Afalesṭini… D tarennawt (naṣr) tadiplumatit deg ubrid n uzarug », d asarag ay d-iga uɣmis ayallas n Echaab i lmend n umulli wis 27 n ussebded n uwanak afalesṭini deg Lezzayer Tamaneɣt deg 1988, yerna yeḥka-d unmahal afalesṭini deg usarag-a ɣef yiḥricen yemgerraden ayɣef d-yekka yimenɣi afalesṭini, d yisurifen ay d-yerbeḥ ɣer sdat yimenɣi-a seg yidis adiplumati d yiswi n ussebded n uwanak afalesṭini deg wakal ay yettwaḍḍfen deg 1967.
Asarag-a ḥedṛen deg-s wudmawen isertiyen, imjahden d yigensasen (mumattilin) n tegrawin tifalesṭiniyin yemgerraden deg Lezzayer, am wakken ay d-yella d tagnit i yiriri n tejmilt i yimḍebber afalesṭini Yasser Arafat.
Yesḥassef Mass Louay, deg usarag-nnes, ɣef lexṣara ay yexṣer umɣiwan (muǧtamaɛ) agraɣlan akken ad yefru ugur afalesṭini-isṛayili, am wakken ay d-yebder addud n Yiwanaken Yeddukklen n Marikan ay yessefken, lemmer d lebɣi, ad tili d tabdammast (wasiṭa) yetteddun s ṣṣfa gar snat-a n tmura, maca « tge-aɣ deg lemcawṛat ur yesɛin lfayda deg wakud aydeg la nessewjad iman-nneɣ ad d-nebdu amecwaṛ d amaynu ».
Seg yidis niḍen, yerra udiplumati-a afalesṭini tajmilt i Lezzayer aydeg d-tella temlilit n Useqqamu Aɣelnaw Afalesṭini ay d-yesbedden awanak afalesṭini.
« Deg 1974, d Lezzayer, s taɣect n uneɣlaf-nnes n tɣawsiwin n uzɣar n tallit-nni, Abdelaziz Bouteflika, terẓem abrid i umeɣrus (cahid) Yasser Arafat akken ad d-yessiwel deg Yiɣlanen Yeddukklen », ɣef wakken ay d-yesmekti unmahal afalesṭini.
« Dɣa yella-aɣ-d waya d tagnit akken ad d-nqeddem imenɣi-nneɣ i umaḍal yerna ad d-nessken d akken aql-aɣ ɣer yidis n talwit d urkad yerna yella uɣref yettwaḍelmen yerna yedder ddaw tuḍḍfa », ɣef wakken ay d-yenna Mass Louai.
Sɛeddan-d yiwen n ufetraw (cariṭ) deg usarag-nni ɣef wamek ay d-tella temlilit n Useqqamu Aɣelnaw Afalesṭini deg Lezzayer deg 1988 d usseɣret (iɛlan) s ussebded n uwanak afalesṭini. Sɛeddan-d daɣ iḥricen seg yinaw n umeɣrus Yasser Arafat aydeg ay d-iger tiɣri i uɣref afalesṭini akken ad yewliwel i ḥuddu n tmurt-nnes.
Deg tgara n usarag-nni, tefka tnemhalt (mudira) n uɣrmis ayallas n El Chaab yiwen n udlis n Chems Eddine Chitour isem-nnes « Falesṭin… Anḍerri n Uɣref ».
