ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴱⴻⵏⴳⵀⴰⴱⵔⵉⵜ ⵜⵡⴻⴽⴽⴻⴷ-ⴷ ⵖⴻⴼ ⴷⴷⵓⵕ ⵏ ⵢⵉⵎⴰⵙⵡⴰⴹⴻⵏ ⵏ ⵓⵖⴻⵔⴱⴰⵣ
ⵜⴱⴻⵙⵙⴰ – ⵜⵡⴻⴽⴽⴻⴷ-ⴷ ⵜⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴰⴱⵔⵉⵜ, ⴰⵙⵙ ⵏ ⵍⵃⴻⴷⴷ ⴷⴻⴳ ⵜⴱⴻⵙⵙⴰ, ⵖⴻⴼ ⴷⴷⵓⵕ ⵏ ⵢⵉⵙⴻⵇⵇⵓⵎⴰ ⵏ ⵜⵡⵉⵍⴰⵢⵜ ⵏ ⵢⵉⵎⴰⵙⵡⴰⴹⴻⵏ (ⵎⵓⴼⴰⵜⵜⵉⵛⵉⵏ). ⵉ ⵓⵙⵎⴻⴽⵜⵉ, ⵉⵙⴻⵇⵇⵓⵎⴰ-ⴰ ⵏⵏⵓⵍⴼⴰⵏ-ⴷ ⵙⴻⴳ ⵎⴻⵍⵎⵉ ⴽⴰⵏ ⴷⴻⴳ ⵜⵎⴻⵀⵍⵉⵡⵉⵏ (ⵎⵓⴷⵉⵔⵉⵢⵢⴰⵜ) ⵏ ⵓⵙⵙⴻⴳⵎⵉ, ⵢⴻⵔⵏⴰ ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⵙⵄⴰⵏ ⴷⴷⵓⵕ ⵙ ⵡⴰⵣⴰⵍ-ⵏⵏⴻⵙ ⴷⴻⴳ ⵓⴹⴼⴰⵔ ⵏ ⵓⵍⵎⴰⴷ ⴷⴻⴳ ⵢⵉⵖⴻⵔⴱⴰⵣⴻⵏ.
ⵜⴰⵏⴻⵖⵍⴰⴼⵜ ⵜⴻⵃⴷⴻⵕ ⴷⴻⴳ ⵜⴱⴻⵙⵙⴰ ⵙ ⵢⵉⵙⴻⵎ-ⵏⵏⴻⵙ ⴷ ⵜⴰⵙⴻⵍⵡⴰⵢⵜ ⴷⴻⴳ ⵜⴻⵎⵍⵉⵍⵉⵜ ⵏ ⵓⵙⵙⴻⵏⵚⴻⴱ ⵏ ⵢⵉⵎⴰⵙⵡⴰⴹⴻⵏ ⵏ ⵜⵡⵉⵍⴰⵢⵜ ⵏ ⵜⴱⴻⵙⵙⴰ, ⵢⴻⵔⵏⴰ ⵃⴻⴷⵕⴻⵏ ⵖⴻⵔ ⵢⵉⴷⵉⵙ-ⵏⵏⴻⵙ ⵡⵓⴼⵔⵉⵏⴻⵏ ⵉⴷⵉⴳⴰⵏⴻⵏ, ⴷⵖⴰ ⵜⴼⵓⵕⴻⵙ ⵜⵉⵎⵍⵉⵍⵉⵜ-ⴰ ⴰⴽⴽⴻⵏ ⴰⴷ ⴷ-ⵜⵃⴻⵜⵜⴻⵜ ⵖⴻⴼ ⴷⴷⵓⵕ ⴰⵢ ⵢⴻⵙⵄⴰ ⵓⵙⴻⵇⵇⴰⵎⵓ ⵏ ⵢⵉⵎⴰⵙⵡⴰⴹⴻⵏ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴹⴼⴰⵔ ⴷ ⵓⵙⵙⴻⵡⵍⵉⵡⴻⵍ ⵏ ⵢⵉⵖⴻⵔⴱⴰⵣⴻⵏ.
ⵜⴻⵔⵏⴰ-ⴷ ⵎⴰⵙⵙⴰ ⴱⴻⵏⴳⵀⴰⴱⵔⵉⵜ ⴷ ⴰⴽⴽⴻⵏ ⴰⵙⴻⵇⵇⴰⵎⵓ-ⴰ ⵢⴻⵍⵍⴰ-ⴷ ⴷ « ⴰⵍⵍⴰⵍ ⴰⵙⴻⵏⵙⴻⴳⵎⴰⵏ » (ⴰⴷⴰⵜ ⴱⵉⴷⴰⵖⵓⴵⵉⵢⵢⴰ) ⵉ ⵍⵎⴻⵏⴷ ⵏ ⵓⵖⵍⵉⴼ ⵏ ⵓⵙⵙⴻⴳⵎⵉ, ⴰⵎ ⵡⴰⴽⴽⴻⵏ ⴰⵢ ⴷ-ⵜⴳⴻⵔ ⵜⵉⵖⵔⵉ ⵉ ⵢⵉⴽⴰⵜⴰⵔⴻⵏ ⵏ ⵓⵃⵔⵉⵛ ⵏ ⵓⵙⵙⴻⴳⵎⵉ ⵏ ⵜⵡⵉⵍⴰⵢⵜ-ⴰ ⴰⴽⴽⴻⵏ ⴰⴷ ⴷ-ⵀⴻⵢⵢⵉⵏ ⵜⴰⵣⵔⴰⵡⵜ (ⴷⵉⵔⴰⵙⴰ) ⵢⴻⵜⵜⵡⴰⴼⴻⵚⵚⵍⴻⵏ ⵖⴻⴼ ⵢⵉⴳⵎⴰⴹ ⵏ ⵢⵉⴽⴰⵢⴰⴷⴻⵏ ⵏ ⵡⴰⴽⴽ ⵉⵃⵔⵉⵛⴻⵏ ⵏ ⵓⵍⵎⵓⴷ ⴷⴻⴳ ⵡⴰⴽⴽ ⵜⵉⵏⴻⴳⵡⴰ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⵏ ⵡⴰⵎⴻⴽ ⴰⴷ ⵢⴻⵜⵜⵡⴰⵡⴻⵀⵀⵉ ⵓⵙⵙⴻⵍⵎⴻⴷ ⵙⴻⴳ-ⴰ ⵖⴻⵔ ⵙⴷⴰⵜ.
ⵜⵡⴻⴽⴽⴻⴷ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⵜⴻⴹⵎⴻⵄ ⵙⴻⴳ ⵢⵉⵙⴻⵇⵇⵓⵎⴰ-ⴰ ⴰⴷ ⵜⵜⵄⴰⵡⴰⵏⴻⵏ ⵜⴰⵎⴻⵀⵍⴰ ⵏ ⵓⵙⵙⴻⴳⵎⵉ ⴷⴻⴳ ⵓⵙⵙⴻⴼⵄⴻⵍ ⵏ ⵜⵙⵓⴷⴷⴻⵙⵜ (ⵉⵙⵜⵔⴰⵜⵉⴵⵉⵢⴰ) ⵏ ⵓⵙⵙⴻⴳⵎⵉ ⴷⴻⴳ ⵓⵏⵔⴰⵔ ⵓⵇⴱⴻⵍ ⵎⴰ ⵜⴻⵃⴷⴻⵕ, ⴷⴻⴳ ⵜⴱⴻⵙⵙⴰ, ⵉ ⵜⴻⵎⵙⵉⵔⵜ ⵏ ⵜⵙⴻⵏⴳⴰⵎⴰ (ⴼⵉⵣⵢⴰ’) ⴷⴻⴳ ⵓⵖⴻⵔⴱⴰⵣ ⵏ ⵄⵓⵇⴱⴰ ⵉⴱⵏ ⵏⴰⴼⴻⵄ, ⵙⴰⴽⴽⵉⵏ ⵜⴻⵔⵥⴻⵎ ⵢⵉⵡⴻⵏ ⵏ ⵓⵖⴻⵔⴱⴰⵣ ⴰⵍⴻⵎⵎⴰⵙ ⵓⵎⵉ ⵜⴻⴼⴽⴰ ⵉⵙⴻⵎ ⵏ ⵓⵎⴻⵖⵔⵓⵙ (ⵛⴰⵀⵉⴷ) ⵛⵀⴻⵔⵉⴼ ⴰⵣⵣⵧⵓⵏ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⴻⵔⵥⴻⵎ ⵜⵏⴻⵖⵍⴰⴼⵜ ⵢⵉⵡⴻⵏ ⵏ ⵡⴰⵎⵎⴰⵙ ⵏ ⵓⴷⴰⵡⵉ ⵏ ⵢⵉⵅⴻⴷⴷⴰⵎⴻⵏ ⵏ ⵓⵙⵙⴻⴳⵎⵉ ⵓⵇⴱⴻⵍ ⵎⴰ ⵜⴻⵅⵜⴻⵎ ⵜⵉⵔⵣⵉ-ⵏⵏⴻⵙ ⵙ ⵓⵙⵙⴻⴼⵇⴻⴷ ⵏ ⵜⴻⵙⵏⴰⵡⵉⵜ ⵏ ⵣⵧⵓⴱⵉⵔ ⵉⴱⵏ ⴻⵍ ⴰⵧⵓⴰⵎ, ⴷⴻⴳ ⵜⵖⵉⵡⴰⵏⵜ ⵏ ⵍⴻⵄⵡⵉⵏⴰⵜ.
