Asebter amenzawi
Benghabrit twekked-d ɣef dduṛ n yimaswaḍen n uɣerbaz
TBESSA – Twekked-d tneɣlaft n ussegmi aɣelnaw, Nouria Benghabrit, ass n lḥedd deg Tbessa, ɣef dduṛ n yiseqquma n twilayt n yimaswaḍen (mufatticin). I usmekti, iseqquma-a nnulfan-d seg melmi kan deg tmehliwin (mudiriyyat) n ussegmi, yerna tenna-d tneɣlaft d akken sɛan dduṛ s wazal-nnes deg uḍfar n ulmad deg yiɣerbazen.
Taneɣlaft teḥdeṛ deg Tbessa s yisem-nnes d taselwayt deg temlilit n ussenṣeb n yimaswaḍen n twilayt n Tbessa, yerna ḥedṛen ɣer yidis-nnes wufrinen idiganen, dɣa tfuṛes timlilit-a akken ad d-tḥettet ɣef dduṛ ay yesɛa useqqamu n yimaswaḍen, ladɣa deg wayen yerzan aḍfar d ussewliwel n yiɣerbazen.
Terna-d Massa Benghabrit d akken aseqqamu-a yella-d d « allal asensegman » (adat bidaɣuǧiyya) i lmend n uɣlif n ussegmi, am wakken ay d-tger tiɣri i yikataren n uḥric n ussegmi n twilayt-a akken ad d-heyyin tazrawt (dirasa) yettwafeṣṣlen ɣef yigmaḍ n yikayaden n wakk iḥricen n ulmud deg wakk tinegwa akken ad yettwassen wamek ad yettwawehhi usselmed seg-a ɣer sdat.
Twekked-d tneɣlaft d akken teḍmeɛ seg yiseqquma-a ad ttɛawanen tamehla n ussegmi deg ussefɛel n tsuddest (istratiǧiya) n ussegmi deg unrar uqbel ma teḥdeṛ, deg Tbessa, i temsirt n tsengama (fizya’) deg uɣerbaz n Ɛuqba Ibn Nafeɛ, sakkin terẓem yiwen n uɣerbaz alemmas umi tefka isem n umeɣrus (cahid) Cherif Azzoun.
Seg yidis niḍen, terẓem tneɣlaft yiwen n wammas n udawi n yixeddamen n ussegmi uqbel ma textem tirzi-nnes s ussefqed n tesnawit n Zoubir Ibn El Aouam, deg tɣiwant n Leɛwinat.
