Asebter amenzawi

Ad bdun 2500 n yisenfaren n tmerrit deg 2016

LEZZAYER TAMANEɣT – Yenna-d uneɣlaf n uheyyi n wakal d tmerrit, Amar Ghoul, ass n letniyen deg Lezzayer Tamaneɣt, d akken ad bdun 2500 n yisenfaren n tmerrit deg 2016 akken ad yili umnekni (tawazun) gar ussuter d tukci deg uḥric-a.

Aya yella-d d aḥric seg « wahil amaynu n usmal (tarqiya) n lbenyanat d yimukan n tmerrit, ɣer yidis n uḍman n uheyyi n 500.000 n wusuten s lbeɛ alemmas », ɣef wakken ay d-yenna uneɣlaf deg temlilit n usarag aɣelnaw n tneggiwin n ussikel (wakalat as-safar).

Dɣa yebder-d uneɣlaf 1000 n yisenfaren n tmerrit ay la yettwabnayen aseggas-a deg wakk timnaḍin n tmurt, gar-asen isensa (fanadiq), isuddisen, tallunin d tuddar n tmerrit, yerna isenfaren-a ad d-swejden s ujemmal 120.000 n wusuten seg-a ɣer 2017.

Seg yidis niḍen, iger-d uneɣlaf tiɣri i ussemyuddes (tansiq) gar yiḥricen ay terza temsalt d tkebbaniyin ay ixeddmen deg unrar-a akken ad d-sduqqsen tamerrit s lǧehd, ladɣa imi aḥric-a yezmer ad yettekki mliḥ deg lebni n tdamsa iǧehden beṛṛa i upitṛul.

Akken ad yili umnekni gar ussuter d tukci, yenna-d Mass Ghoul d akken yessefk ad ttwabnunt ugar n temṣukiwin (hayakil), maca yessefk daɣ ad d-yili waya s uqader n ṣṣifat n tmetti tadzayrit, am wakken ay d-iwekked d akken aḥric-a yeḥwaǧ imir-a 100 n yisensa n 5 n yitran d 2000 n yisensa n 1 d 2 n yitran.