Asebter amenzawi

Asnerni n ubrid n wuzzal d ayen yezwaren

TBESSA – Asnefli (tanmiya) d ussetrer (ɛaṣnara) n ubrid n wuzzal d tuzwirt i lmend n usnefli n tmurt d usseǧhed n umbaddel n ttjaṛa gar twilayin, ɣef wakken ay d-iwekked uneɣlaf n umesni, Boudjemaa Talai, ass n letniyen deg Tbessa.

Abrid n wuzzal yesɛa azal d ameqran mi ad nwali lfayda ayyes ad d-yegli i tdamsa taɣelnawt, ɣef wakken ay d-yenna uneɣlaf deffir ma yeḍfer, deg temnaḍt n tɣiwant n Leɛwinat yiwen n uneskin (ɛarḍ) ɣef usenfar n usseǧhed, tuqqna ɣer trisiti d ussisleg (muḍaɛafa) n ubrid n wuzzal yeqqnen Ǧbel Lɛunq ɣer Ɛennaba (413 n yikilumitren).

Asenfar-a d win ad iḍemnen assiweḍ n wakal n wuzzal d ufusfaṭ seg lminat n temnaḍt-a n Tbessa ɣer lluzinat n Ɛennaba, ɣef wakkenn ay d-yenna uneɣlaf uqbel ma iwekked-d d akken tizrawin (dirasat) ay yessefken uqbel uṣeggem n ubrid-a ad d-wejdent deg Meɣres n 2016.

Ɣef leḥsab n wakken ay as-d-sfehmen yimḍebbren n ANESRIF (Tanegga Taɣelnawt n Tezrawin d Uḍfar n Usseḍru n Yisseftiyen n Ubrid n Wuzzal), ixeddimen ay ssefrayen ad ten-gen yella-d gar-asen uṣeggem n ubrid n wuzzal aqbur d tuqqna-nnes ɣer trisiti, assersi n yigalisen (lafitat) n tafat d ttawilat n laman.

Dɣa yenna-d uneɣlaf d akken aɣellet n ubrid n wuzzal n Ǧbel Lɛunq-Ɛennaba ad yessifses lḥeṛs ɣef yibriden n temnaḍt-a ay yeččuṛen d ikamyunen imaẓayen n sselɛa.