Asebter amenzawi

Tamesgida n Paris tger-d tiɣri n Yinselmen akken ad d-sseknen urfan-nsen

PARIS – Tger-d Tmesgida Tameqrant n Paris tiɣri, ass n letniyen, deg yiwen n ulɣu (bayan), i Yinselmen n Fṛansa akken ad d-sseknen urfan-nsen « ilqayanen » ɣef « tiwweḥcit »-nni n txazzabiyin n wass n ljemɛa tameddit.

« Tger-d Tmesgida Tameqrant n Paris tiɣri i wakk inselmen n Fṛansa akken ad d-sseknen, deg wakk tilemmiẓin d tegnatin ad ten-id-iṣaḥen, urfan-nsen ilqayanen mgal tiwweḥcit ur yesɛin ṛṛeḥma n txazzabiyin-nni yessazzlen idammen ass n ljemɛa 13 Nwembeṛ 2015 », ɣef wakken ay d-yenna yiwen n ulɣu ay yestenya yimḍebbren n tmesgida-a, Dalil Boubakeur.

Tger-d daɣ Tmesgida Tameqrant n Paris tiɣri i yinselmen n Fṛansa akken ad d-sseknen tamsetlelt-nsen (taḍamun) d twaculin n wid yemmuten d wid yenḍerren, « ad ten-ɛezzin, ad bedden ɣer yidis-nsen yerna ad asen-d-sseknen tagmat-nsen deg teswiɛt-a taweɛṛant aydeg llan ».

Sdat « tiwweḥcit n txazzabiyin-a timelɣunin (ǧabana) » ay yesḥeznen Fṛansa, Tamesgida Tameqrant n Paris « tessenfalay-d (tuɛabbiru) urfan d uɣanfu ay ɣunfan Yinselmen n Fṛansa taɣawsa-a turxist ay gan yirebraben i ddin-nsen », ɣef wakken ay d-yebder ulɣu-a.

Ad d-tili tejmilt d ddeɛwa i wid yenḍerren seg txazzabiyin-a ass n ljemɛa-a deg Tmesgida-nni.