Asebter amenzawi

Tukci n wazal i sselɛa tadzayrit n tuččit deg tzikkent n Djazagro 2016

LEZZAYER TAMANEɣT – Tamesrit (ṣalun) tagraɣlant tis 14 n temguri (ṣinaɛa) n tuččit (Djazagro 2016) ad tettekki deg usseddu n sselɛa tadzayrit, ɣef wakken ay d-yenna ass n ttlata deg Lezzayer unemhal n tmesrit-a, Christophe Painvin.

« Tukci n wazal i ufares (intaǧ) adzayri d yiwet seg tɣawsiwin timaynutin ad d-yilin deg tmesrit-a n Djazagro n 2016 yerna ad d-yili usmal (tarwiǧ) n sselɛa tadzayrit akken ad tettwassiǧew ɣer uzɣar », ɣef wakken ay d-yenna Mass Painvin deg yiwen n usarag n tɣemsa aydeg ay d-ixebber d akken tamesrit-a ad d-tili gar 18 d 21 Yebrir n useggas ay d-yetteddun. Azal n 30 n tmura ad yettekkin deg tmesrit-a yerna yella ussirem ad d-rzun azal n 21.000 n yinerzafen ay ixeddmen deg uḥric n temguri n tuččit.

Imsuddsen (munaḍḍimin) ad d-awin tigrawin n yimectura seg tmura n Lmeɣreb d Tefriqt akken ad ssnen sselɛa tadzayrit yerna ad d-gen assaɣen (ɛalaqat) n ttjaṛa d tkebbaniyin tiɣelnawin.

« Ad nxelleṣ akken ad d-nawi tigrawin n tkebbaniyin seg Benin, Sinigal d Côte d’Ivoire d tmura n Lmeɣreb akken ad d-rzun ɣef tmesrit-a yerna ad ssnen afaris (mantuǧ) ay d-yettwaxedmen deg tmurt yerna ad reẓmen abrid i Yidzayriyen ad ssiǧwen sselɛa-nsen ɣer tmura-a », ɣef wakken ay d-yenna yimḍebber-a.

Taɣawsa tamaynut niḍen ad d-yilin deg tmesrit-a: ad d-tili lumiṛa deg tnefsarin (aǧniḥa) n tkebbaniyin tidzayriyin deg tmesrit-a akken ad ɛeqlen yinerzafen sselɛa tadzayrit. Imsuddsen n tmesrit-a ad xedmen s umciweṛ d Unmager (muntada) n Yiɣfawen n Tkebbaniyin i usmal n sselɛa ay d-yettwaxedmen deg Lezzayer deg tmesrit-a, yerna d Anmager-a ay d amezwaru ay d-iḍebbren deg ussebded n tmesrit-a.