Asebter amenzawi
Taqbuct n Tefriqt n Yiɣlanen: Ur yettekkay ara Bensebaini
LEZZAYER TAMANEɣT – Asleɣmay n teɣlamt tulimpit tadzayrit n tcirt n uḍar, Andre Pierre Schurmann, yekcef-d ass n laṛebɛa ismawen n 21 n yimariren ay d-yettwafernen i Teqbuct n Tefriqt n Yiɣlanen n ddaw 23 n yiseggasen, ad d-yilin seg 28 Nwembeṛ ɣer 12 Dujembeṛ n 2015 deg Sinigal, yerna tiɣlamin ad d-yilin d timezwura deg-s ad ɛeddint ɣer Wuraren Ulimpiyen n Rio n 2016.
Umuɣ-a (qa’ima) ddan-d deg-s yimariren n USM Lezzayer Oussama Derfalou d Oussama Chita (MC Lezzayer) ay yellan, naqal, deg ccek akken ad ttekkin ɣef lǧal n tiɣin ay tent-uɣen.
Seg yidis niḍen, imariren isaduranen (muḥtarifin) Ramy Bensebaini (Montpellier, Fṛansa) d Rachid Ait Amrane (Gijon, Spenyul) ur d-ddin ara gar yismawen n wid ad yettekkin. I usmekti, Bensebaini yurar deg temliliyin n waffas mgal Sierra Leone, deg wakud aydeg Ait Amrane ɣran-as-d ad yettekki deg wannan (tarabbuṣ) aneggaru.
Yessefk daɣ ad d-nesmekti d akken Taqbuct n Tefriqt n Yiɣlanen n ddaw 23 n yiseggasen ur telli ara d aḥric seg wahil agraɣlan n Tfidiṛalit Tagraɣlant n Tcirt n Uḍar.
I lmend n ttiɛad-a yesɛa azal, imariren n teɣlamt taɣelnawt n ddaw 23 n yiseggasen ad kemmlen assewjed-nsen deg wannan aneggaru ad d-yebdun ass n 21 Nwembeṛ. Taɣlamt taɣelnawt tulimpit turar, ass n letniyen, yiwet n temlilit tammidwant (wuddiyya) mgal teɣlamt tulimpit tatunsit deg Tunes, d tin ay ifuken s 0 ɣer 2. Ass n laṛebɛa ay d-yetteddun, ad teddu ɣer Sinigal deg usafag uzzig (xaṣṣ) n tkebbanit taɣelnawt « Air Algerie ».
Deg tuzzya tamezwarut n Teqbuct n Tefriqt n Yiɣlanen, ad turar Lezzayer mgal Maṣer ass n 28 Nwembeṛ 2015, sakkin ad ternu ad turar mgal Mali deg 2 Nwembeṛ 2015 uqbel ma turar d Nijirya ass n 5 Dujembeṛ 2015. 3 n teɣlamin timezwura n telɣuɣa-a ad ɛeddint ɣer Wuraren Ulimpiyen n Rio de Janeiro 2016.
Umuɣ n 21 n yimariren ay d-yettwafernen: Salhi Abdelkadir (ASO Cclef), Methazem Oussama, (RC Arbaa), Chaal Farid (USM Lḥeṛṛac), Salah Nour Islam (ASO Cclef), Rebiai Miloud (ES Sḍif), Abdellaoui Ayoub (USM Lezzayer), Kenniche Ryad Kamar Eddine (ES Sḍif), Cherifi Redouane (USM Sidi Belɛebbas), Ferhani Houari (RC Laṛebɛa), Halamia Mohamed Reda (MC Wehṛan), Ferhat Zineddine (USM Lezzayer), Smahi Khalil (ASO Cclef), Gagaa Ahmed (Ilemẓiyen Inaddalen n Leqbayel), Draoui Zakaria (CR Belouizdad), Benkhemassa Mohamed (USM Lezzayer), Benguit Raouf (Paradou AC), Chita Oussama (MC Lezzayer), Meziane Bentahar Abderrahmane (RC Laṛebɛa), Haddouche Zakaria (ES Sḍif), Amokrane Abdelhakim (DRB Taǧnant), Darfalou Oussama (USM Lezzayer).
