Asebter amenzawi

Aqeddem n tedyanin tinaddalin tigraɣlanin ad d-yilin deg Lezzayer

LEZZAYER TAMANEɣT – Deg temlilit ay d-iga Useqqamu Aɣelnaw n Ussewjed d Ussuddes n Tedyanin Tinaddalin Tigraɣlanin ay d-yellan ddaw tselwit n uneɣlaf n yilemẓiyen d waddal, El Hadi Ould Ali, yella-d uqeddem n tedyanin tinaddalin tigraɣlanin ay la ssefrayen ad tent-gen seg-a ɣer sdat deg Lezzayer, ɣef wakken ay d-yenna yiwen n ulɣu (bayan) n uɣlif n yilemẓiyen d waddal.

Dɣa tettwabder-d deg uqeddem-a teẓrigt (ṭabɛa) tis snat n Umaraṭun Agraɣlan n temdint n Lezzayer (27 Nwembeṛ 2015), Tuzzya Tameqrant n Lezzayer n Usnasɣel n 2016, Talɣuɣa n Tefriqt n Yiɣlanen n Uɣerrabu n Usembuk (4 ɣer 11 Dujembeṛ 2015), Telɣuɣa Taɛṛabt n Yilemẓiyen d Telɣuɣa Taɛṛabt n Teɣlamin n Ujudo (19-24 Dujembeṛ 2015).

Dɣa i lmend n waya, iger-d uneɣlaf n yilemẓiyen n waddal tiɣri i wakk wid ay iḥedṛen din akken ad sǧehden amɛawen d umciweṛ i ussefɛel n wahil-a, am wakken ay iga ifadden i wakk wid ad d-yeflen leṛyuy iṣelḥen i usserbeḥ n tedyanin-a tinaddalin tigraɣlanin.

Iger-d daɣ tiɣri Mass El Hadi Ould Ali i wakk tifidiṛaliyin akken « ad d-lemdent seg ttejṛibat ay iɛeddan » deg melmi kan akken ad sselhunt ugar tidyanin ay d-yetteddun, alm wakken ay d-iwekked d akken « tidyanin am ti sɛant dduṛ deg ussebɣes n yilemẓiyen akken ad ttgen addal am wakken ad cebbḥent tugna tagraɣlant n Lezzayer ».

Mi terẓem temlilit n Useqqamu Aɣelnaw n Ussewked d Ussuddes n Tedyanin Tinaddalin Tigraɣlanin, ihenna uneɣlaf wid ay yettekkan deg lecɣal inaddalen yemgerraden ay d-yellan ussan-a ineggura deg Lezzayer d uttekki-nsen igerrzen i usserbeḥ n tedyanin-a.