Asebter amenzawi
Aneẓruf Utrim: Ad d-yerzu n Christopher Ross ɣer temnaḍt
WASHINGTON – Ad d-yebdu Christopher Ross, amazun (mabɛut) udmawan n umaru amatu n Yiɣlanen Yeddukklen i Uneẓruf Utrim, tirzi-nnes ass n letniyen ɣef temnaḍt yerna ad yeqqim deg-s 10 n wussan akken ad yeɛreḍ ad d-yesduqqes lemcawṛat gar Terni n Polisario d Meṛṛuk.
Abdammas (wasiṭ) n Yiɣlanen Yeddukklen ad yessiwel d yimḍebbren imeṛṛukiyen d wid n Terni n Polisario, yerna ad yerzu daɣ ɣef Lezzayer d Muriṭanya yellan d timura timanayin (muraqiba) deg lemcawṛat n talwit n Uneẓruf Utrim, ɣef wakken ay aɣ-d-yenna Ahmed Boukhari, agensas n Terni n Polisari ɣer Yiɣlanen Yeddukklen, maca ur d-yebdir ara amek ad mseḍfaren yimukan ayɣef ad yerzu Mass Ross.
Boukhari yerna-d d akken amazun n Yiɣlanen Yeddukklen ad yemlil d yimḍebbren iṣeḥrawiyen ass n 27 Nwembeṛ deg Tinduf.
ɣef leḥsab n Mass Boukhari, tirzi n Ross i uheyyi n lemcawṛat timaynutin gar Meṛṛuk d Terni n Polisario yesskanay-d tigʷin ay ugin Yiɣlanen Yeddukklen ayen ay d-yenna uneɣlaf ameṛṛuki n tɣawsiwin n uzɣar, Salehddine Mezouar ay d-iwekkden, seg melmi kan, d akken Meṛṛuk ur tebɣi ara ad texdem d Mass Ross.
Ass n laṛebɛa yezrin, aselway n Useqqamu n Tɣellist (amn) n Yiɣlanen Yeddukklen, Abriṭani Matthew Rycroft, igar-as ifadden i Ross deg ccɣel-nnes yerna yenna-d d akken yeḍmeɛ akk idisan ay terza temsalt ad t-ɛawnen s tidet deg waya.
Rycroft yessemɛen-d deg wawal-nnes ɣef Meṛṛuk ay mazal tugi ad temɛawan d Ross, yerna tewweḍ armi ay d-tenna, deg 2012, d akken tejbed laman-nnes seg umazun-a udmawan n Ban Ki-moon, ɣef wakken ay d-yenna Mass Boukhari. I usmekti, Briṭanya Tameqrant d nettat ay d-tṣaḥ nnuba ad tili d taselwayt n Useqqamu n Tɣellist.
Ayen ay d-yenna uselway n Useqqamu n Tɣellist d d « aɛeyyen i Meṛṛuk akken ad d-tuɣal ɣer ubrid », ɣef wakken ay d-yenna Mass Boukari.
Deffir tuzzya-a, ad yeg umazun n Yiɣlanen Yeddukklen ass n 8 Dujembeṛ timlilit d Useqqamu n Tɣellist i lmend n yiriri s lexbar ɣef temsalt n Uneẓruf Utrim, yerna ad tili temlilit-a d tin n uxebber ɣef wayen ay d-yefrurin seg 3 n terza tineggura ɣef temnaḍt-a.
