ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴰⵣⵓⵏ ⴰⵎⴰⵢⵏⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴷ ⵢⴻⵔⵣⴰ ⵖⴻⴼ ⵍⵉⴱⵢⴰ

ⵟⵔⴰⴱⵍⴻⵙ – ⵢⴻⵔⵣⴰ ⵓⵎⴰⵣⵓⵏ ⴰⵎⴰⵢⵏⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵍⵉⴱⵢⴰ, ⵎⴰⵔⵜⵉⵏ ⴽⵧⴱⵍⴻⵔ, ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⵖⴻⴼ ⵜⵎⵓⵔⵜ-ⴰ ⴰⴽⴽⴻⵏ ⴰⴷ ⵢⴻⵄⵔⴻⴹ ⴰⴷ ⵢⴻⵙⵙⴻⵇⵏⴻⵄ ⵙⵉⵏ-ⵏⵏⵉ ⵏ ⵢⵉⴷⵉⵙⴰⵏ ⴰⵢ ⵢⴻⵎⵅⴰⵚⴰⵎⴻⵏ ⴰⴽⴽⴻⵏ ⴰⴷ ⴷ-ⵙⴱⴻⴷⴷⴻⵏ, ⵙ ⵜⵖⴰⵡⵍⴰ, ⴰⵏⴰⴱⴰⴹ (ⵃⵓⴽⵓⵎⴰ) ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ.

ⵙⴻⴳ ⵡⴰⵙⵎⵉ ⴰⵢ ⵢⴻⵖⵍⵉ ⵓⵏⵀⵉⵍ (ⵏⵉⴹⴰⵎ) ⵏ ⵎⴰⴰⵎⵎⴰⵔ ⴻⵍ ⴳⵓⴻⴷⴷⴰⴼⵉ ⴷⴻⴳ 2011, ⵍⵉⴱⵢⴰ ⵜⴻⵣⴷⴻⵔ ⴷⴻⴳ ⵛⵛⵡⴰⵍ ⴷ ⵢⵉⵎⴻⵏⵖⵉ ⴳⴰⵔ ⵜⴻⵎⵍⵉⵛⵉⵏ ⵜⵉⵎⵙⴻⵍⵍⵃⵉⵏ ⵢⴻⵔⵏⴰ ⵜⵓⵖⴰⵍ, ⴰⵙⵙ-ⴰ, ⵜⴻⵙⵄⴰ 2 ⵏ ⵢⵉⵏⴰⴱⴰⴹⴻⵏ ⴰⵢ ⵍⴰ ⵢⴻⵜⵜⵏⴰⵖⴻⵏ ⵖⴻⴼ ⵓⴷⴰⴱⵓ.

ⵢⴻⴷⴷⴰ ⵎⴰⵙⵙ ⴽⵧⴱⵍⴻⵔ, ⴰⵙⵙ ⵏ ⵙⵙⴻⴱⵜ, ⵖⴻⵔ ⵟⵓⴱⵔⵓⵇ, ⴷⴻⴳ ⵓⴳⵎⵓⴹ (ⵛⵛⴻⵔⵇ) ⵏ ⵜⵎⵓⵔⵜ, ⴰⵏⴷⴰ ⴰⵢ ⵢⴻⵍⵍⴰ ⵓⵎⵏⵉ (ⴱⴰⵔⵍⴰⵎⴰⵏ) ⴰⵍⵉⴱⵉ ⴰⵢⵢⴻⵙ ⵙⵜⴻⵄⵕⴼⴻⵏⵜ ⵜⵎⵓⵔⴰ ⵏ ⵍⴻⴵⵏⴰⵙ, ⵙⴰⴽⴽⵉⵏ ⵢⴻⴷⴷⴰ, ⴰⵙⵙ ⵏ ⵍⵃⴻⴷⴷ, ⵖⴻⵔ ⵟⵔⴰⴱⵍⴻⵙ ⴰⵏⴷⴰ ⴰⵢ ⵢⴻⵎⵍⴰⵍ ⴷ ⵢⵉⵎⴹⴻⴱⴱⵔⴻⵏ ⵏ ⵓⵙⵡⵉⵔ ⴰⵎⴰⵜⵓ ⴰⵖⴻⵍⵏⴰⵡ.

ⵎⴰⵙⵙ ⴽⵧⴱⵍⴻⵔ ⵢⴻⵙⵎⴻⴽⵜⵉ-ⴷ ⵉ ⵙⵉⵏ-ⴰ ⵏ ⵢⵉⴷⵉⵙⴰⵏ ⵢⴻⵎⵅⴰⵚⴰⵎⴻⵏ ⴷ ⴰⴽⴽⴻⵏ ⵛⵛⵖⴻⵍ-ⵏⵏⴻⵙ ⴷ ⴰⴽⴻⵎⵎⴻⵍ ⵏ ⵛⵛⵖⴻⵍ ⵏ ⵓⴷⵉⵒⵍⵓⵎⴰⵜⵉ-ⵏⵏⵉ ⴰⵢ ⵜ-ⵢⴻⵣⵡⴰⵔⴻⵏ, ⴱⴻⵔⵏⴰⵔⴷⵉⵏⵧ ⵍⴻⵧⵏ, ⵢⴻⵔⵏⴰ ⵉⵙⵡⴰⵏ ⵏ ⵛⵛⵖⴻⵍ-ⴰ ⵏⵉⵜⵏⵉ ⴷ ⴰⵙⵜⴻⵏⵢⵉ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵙⴻⵔⵜⵉ ⴳⴰⵔ ⴰⴽⴽ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴷ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ.

ⴷⴻⴼⴼⵉⵔ ⵡⴰⵣⴰⵍ ⵏ ⵓⵙⴻⴳⴳⴰⵙ ⵏ ⵍⴻⵎⵛⴰⵡⵕⴰⵜ, ⵢⴻⵙⵙⴰⵡⴻⴹ ⵎⴰⵙⵙ ⵍⴻⵧⵏ, ⴷⴻⴳ ⵜⴻⵣⵡⴰⵔⴰ ⵏ ⵜⵓⴱⴻⵕ, ⴰⴷ ⵢⴻⵙⵙⴻⵇⵏⴻⵄ ⵉⴷⵉⵙⴰⵏ ⴰⴷ ⵎⵙⴻⴼⵀⴰⵎⴻⵏ ⵖⴻⴼ ⵓⵎⵜⴰⵡⴰ ⵉ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ, ⵎⴰⵛⴰ, ⴷⴻⴳ ⵜⴳⴰⵔⴰ, ⴰⵎⵜⴰⵡⴰ-ⴰ ⵓⴳⵉⵏ-ⵜ ⵢⵉⵎⵏⴰⵏ-ⵏⵏⵉ ⵉⵅⵚⵉⵎⴻⵏ ⴷⴻⴳ ⵙⵉⵏ ⵢⵉⴷ-ⵙⴻⵏ.

« ⵓⵔ ⵜⵜⴱⴻⴷⴷⵉⵍⴻⵖ ⵓⵍⴰ ⴷ ⵢⵉⵡⴻⵏ ⵏ ⵡⴰⵡⴰⵍ ⴷⴻⴳ ⵓⴹⵔⵉⵙ (ⵏⴰⵚⵚ) ⵏ ⵓⵎⵜⴰⵡⴰ-ⵏⵏⵉ, ⵎⴰⵛⴰ ⵜⴻⵣⵎⴻⵔ ⴰⴷ ⴷ-ⵜⵉⵍⵉ ⵜⴻⵎⵍⵉⵍⵉⵜ ⵉ ⵓⵙⵇⴻⵔⴷⴻⵛ ⵖⴻⴼ ⵡⵓⴳⵓⵔⴻⵏ ⴰⵢ ⵡⴻⵔⵄⴰⴷ ⴼⵔⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴽⵧⴱⵍⴻⵔ.

ⵎⴰⵙⵙ ⴽⵧⴱⵍⴻⵔ ⵉⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⴰⴳⵏⵉⵜ « ⵜⵃⴰⵔ ». « ⵙⵉⵎⴰⵍ ⵏⴻⵜⵜⵕⴰⵊⵓ, ⵙⵉⵎⴰⵍ ⵢⴻⵜⵜⵉⵎⵖⵓⵔ ⴱⴻⴹⴹⵓ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⵉ ⵙⵉⵏ-ⴰ ⵏ ⵢⵉⴷⵉⵙⴰⵏ ⴷ ⴰⴽⴽⴻⵏ ⵍⴻⵎⵎⴻⵔ ⵓⵔ ⵜⵜⴻⵎⵙⴻⴼⵀⴰⵎⴻⵏ ⴰⵔⴰ, ⴰⴷ ⵜⵜⴻⴽⴽⵉⵏ ⴷⴻⴳ ⵓⵔⵡⴰⵢ ⵏ ⵜⵎⵓⵔⵜ-ⴰ ⵢⴻⵍⵍⴰⵏ ⴷⴻⴳ ⵛⵛⵡⴰⵍ ⴷ ⴰⵎⴻⵇⵔⴰⵏ 5 ⵏ ⵢⵉⵙⴻⴳⴳⴰⵙⴻⵏ ⴰⵢⴰ.