Asebter amenzawi

Tamɣunt 1ut n Mobilis: Asettef n yimsiswiyen igerrzen

Tamɣunt 1ut n Mobilis: Asettef n yimsiswiyen igerrzen LEZZAYER TAMANEƔT – Kheiredine Merzougui (MC Ldzayer) d Mohamed El Hadi Boulaouidet (Ilemẓiyen Inaddalen n Leqbayel) d nitni ay d imsiswiyen (haddafin) ay d-yefraren deg wass wis 12 n wurar n Temɣunt 1ut n tcirt n uḍar ay d-yellan ussan n lexmis, ljemɛa d ssebt, yerna qerrben-d, deg usettef, ɣer umarir alibi n MC Wehṛan, Mohamed Zaabiya ay yessadfen 7 n yiswan.

D Merzougui ay yesrebḥen taɣlamt-nnes mi turar mgal MC Wehṛan (1 ɣer 0), ma d Boulaouidet yessadef iswi n tgadda (taɛadul) mi turar teɣlamt-nnes mgal RC Laṛebɛa (1 ɣer 1). Yal yiwen seg yimariren-a yessadef 6 n yiswan, yerna atni deg umkan wis sin ɣer yidis n Benyettou (ES Sḍif) d Djallit (JS Ṣawra).

Imsiswi imxeyyer n tsemhuyt (mawsim) yezrin d Walid Derrardja (17 n yiswan) ay yellan ilindi deg MC Lɛelma. Amarir-a ay la yetturaren, deg tsemhuyt-a, deg MC Ldzayer, werɛad ur yessadef, taswiɛt-a, ula d yiwen n yiswi.

Asettef :

7 n yiswan : Zaâbiya (MC Wehṛan)

6 n yiswan: Benyettou (ES Sḍif), Djallit (JS Ṣawra), Merzougui (MC Ldzayer) d Boulaouidet (Ilemẓiyen Inaddalen n Leqbayel).

5 n yiswan: Diawara (Ilemẓiyen Inaddalen n Leqbayel), Moussi (MC Wehṛan), Bougueche (USM Lḥeṛṛac), Ghislain (RC Laṛebɛa).