ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵟⴻⵀⵔⴰⵏ: ⵙⴻⵍⵍⴰⵍ ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵜⵉⴽⵍⵉ ⵏ ⵍⴻⵣⵣⴰⵢⴻⵔ ⵙⴷⴰⵜ ⵜⴰⵍⵓⴼⵜ ⵏ ⵓⵒⵉⵜⵕⵓⵍ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵟⴻⵀⵔⴰⵏ, ⴷⴻⴳ ⵓⵏⵎⴰⴳⴻⵔ ⵏ ⵜⵎⵓⵔⴰ ⵜⵉⵎⵙⵉⴵⵡⵉⵏ ⵏ ⵍⴳⴰⵣ, ⵜⵉⴽⵍⵉ ⵏ ⵍⴻⵣⵣⴰⵢⴻⵔ ⵉ ⵍⵎⴻⵏⴷ ⵏ ⵓⵎⵙⴻⴼⵀⴰⵎ ⴳⴰⵔ ⵜⵎⵓⵔⴰ ⵜⵉⵎⵙⵉⴵⵡⵉⵏ ⵏ ⵓⵒⵉⵜⵕⵓⵍ ⴰⴽⴽⴻⵏ ⴰⴷ ⵇⴰⴱⵍⴻⵏⵜ ⵜⴰⵍⵓⴼⵜ ⵏ ⵙⵙⵓⵇ ⵏ ⵓⵒⵉⵜⵕⵓⵍ.
« ⵉⵎⵙⵉⴵⵡⴻⵏ ⵉⵎⴻⵇⵔⴰⵏⴻⵏ ⵏ ⵙⵙⵓⵇ ⵏ ⵓⵒⵉⵜⵕⵓⵍ ⵢⴻⵙⵙⴻⴼⴽ ⵢⴻⵔⵏⴰ ⴰⴷⴻⵏⵏⵉⵜ (ⵍⴰⴱⵓⴷⴷ) ⴰⴷ ⵙⵙⵉⵡⴹⴻⵏ ⴰⴷ ⵎⵙⴻⴼⵀⴰⵎⴻⵏ ⵖⴻⴼ ⵍⵖⴻⵍⵍⴰ ⴰⴷ ⵙⵏⵓⵣⵓⵢⴻⵏ ⴰⴽⴽⴻⵏ ⴰⴷ ⵄⴰⵡⴷⴻⵏ ⴰⴷ ⴷ-ⵙⵙⴰⵍⵉⵏ ⵙⵙⵓⵎⴰⵜ ⴰⴷ ⵉⴷⵓⵎⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵙⴻⵍⵍⴰⵍ ⴷⴻⴳ ⵜⵉⵏⴰⵡⵜ-ⵏⵏⴻⵙ (ⴽⴰⵍⵉⵎⴰ) ⴰⵢ ⴷ-ⵢⴻⵏⵏⴰ ⴷⴻⴳ ⵜⵇⴰⵛⵓⵛⵜ ⵜⵉⵙ 3 ⵏ ⵓⵏⵎⴰⴳⴻⵔ ⵏ ⵜⵎⵓⵔⴰ ⵜⵉⵎⵙⵉⴵⵡⵉⵏ ⵏ ⵍⴳⴰⵣ.
ⴰⵏⴻⵖⵍⴰⴼ ⴰⵎⴻⵏⵣⵓ ⵢⴻⵜⵜⴻⴽⴽⴰ ⵙ ⵢⵉⵙⴻⵎ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵙⵙⵓⵇ ⵏ ⵓⵒⵉⵜⵕⵓⵍ ⵓⵔ ⵢⴻⵙⵄⵉⵏ ⴰⵃⴽⵉⵎ ⴰⴷⴻⵏⵏⵉⵜ ⴰⴷ ⵜⴻⵜⵜⴱⴻⴷⴷⵉⵍ ⴷⴻⴳ-ⵙ ⵙⵙⵓⵎⴰ ⵙ ⵜⴻⵇⵙⴻⵃ ⵢⴻⵔⵏⴰ ⴰⵢⴰ ⴰⴷ ⵉⴹⵓⵔⵔ ⵜⵉⵎⵓⵔⴰ ⵜⵉⵎⵙⵉⴵⵡⵉⵏ.
ⵎⴰⵙⵙ ⵙⴻⵍⵍⴰⵍ ⵢⴻⴱⴷⴻⵔ-ⴷ ⵉⵅⴻⵚⵚⴰⵔⴻⵏ ⵏ ⵢⵉⴱⴻⴷⴷⵉⵍⴻⵏ-ⴰ ⴷⴻⴳ ⵙⵙⵓⵎⴰ ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵢⴰ ⴰⴷ ⵢⴻⵙⵡⴰⵖ ⴰⵔⴽⴰⴷ ⵏ ⵙⵙⵓⵎⴰ. ⴷⵖⴰ ⵎⴰ ⵢⴻⵍⵍⴰ-ⴷ ⵛⵛⵡⴰⵍ ⴰⵎ ⵡⴰ, ⴰⵢⴰ ⵓⵔ ⵢⴻⵜⵜⴻⴼⴼⴻⵖ ⵍⴰ ⵖⴻⴼ ⵜⵎⵓⵔⴰ ⵜⵉⵏⴼⴰⵔⴰⵙⵉⵏ (ⵎⵓⵏⵜⵉⴵⴰ), ⵡⴰⵍⴰ ⵖⴻⴼ ⵜⵎⵓⵔⴰ ⵜⵉⵎⴻⵛⵜⵓⵔⴰ, ⵡⴰⵍⴰ ⵖⴻⴼ ⵜⴻⵎⴳⵓⵔⵉ (ⵚⵉⵏⴰⵄⴰ) ⵏ ⵓⵒⵉⵜⵕⵓⵍ ⵙ ⵓⵎⴰⵜⴰ.
ⵏⵏⵉⴳ ⵡⴰⵢⴰ, ⴰⴳⵔⵉⵔⴻⴱ-ⴰ ⴷⴻⴳ ⵙⵙⵓⵎⴰⵜ ⵏ ⵓⵒⵉⵜⵕⵓⵍ « ⵜⴻⴳⵍⴰ-ⴷ ⵙ ⵍⵎⴰⴹⴻⵔⵔⴰ ⵓⵍⴰ ⵖⴻⴼ ⵙⵙⵓⵎⴰⵜ ⵏ ⵍⴳⴰⵣ ⴰⵢ ⵢⴻⵡⵡⴹⴻⵏ, ⴰⵙⵙ-ⴰ, ⵖⴻⵔ ⵓⵙⵡⵉⵔ ⵢⵓⴷⵔⴻⵏ ⵎⵍⵉⵃ, ⵢⴻⵔⵏⴰ ⴰⵢⴰ ⵢⴻⵃⵡⴰⴵ ⴰⴷ ⴷ-ⵏⴻⵔⵔ ⵖⴻⵔ-ⵙ ⵍⵡⴻⵍⵀⴰ-ⵏⵏⴻⵖ ».
ⵙ ⵡⴰⵢⴰ, ⵉⴳⴻⵔ-ⴷ ⵎⴰⵙⵙ ⵙⴻⵍⵍⴰⵍ ⵜⵉⵖⵔⵉ ⵉ ⵜⵎⵓⵔⴰ ⵜⵉⵎⵙⵉⴵⵡⵉⵏ ⵏ ⵍⴳⴰⵣ ⴷⴻⴳ ⵜⵇⴰⵛⵓⵛⵜ-ⴰ ⴰⴽⴽⴻⵏ ⴰⴷ ⵎⵛⵉⵡⵕⴻⵏⵜ. ⵜⵉⵎⵓⵔⴰ-ⴰ ⵍⵍⴰⵏⵜ ⴳⴰⵔ-ⴰⵙⴻⵏⵜ ⴰⵎⴰ ⴷ ⵜⵉⴷ ⵢⴻⵜⵜⴻⴽⴽⴰⵏ ⴷⴻⴳ ⵧⵒⴻⵒ (ⵜⵉⵎⵙⵉⴵⵡⵉⵏ ⵏ ⵓⵒⵉⵜⵕⵓⵍ) ⴰⵎⴰ ⴷ ⵜⵉⴷ ⴰⵢ ⴷ-ⵢⴻⵙⵙⴰⴵⴰⵡⴻⵏ ⴰⵒⵉⵜⵕⵓⵍ ⵎⴰⵛⴰ ⵓⵔ ⵜⵜⴻⴽⴽⴰⵏⵜ ⴰⵔⴰ ⴷⴻⴳ ⵜⵓⴷⴷⵙⴰ-ⴰ, ⵢⴻⵔⵏⴰ ⵢⴻⵏⵛⴻⴷ-ⵉⵜⴻⵏⵜ-ⵉⴷ ⵎⴰⵙⵙ ⵙⴻⵍⵍⴰⵍ ⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵎⵛⵉⵡⴻⵕ ⴳⴰⵔ-ⴰⵙⴻⵏⵜ ⴷⴻⴳ ⵓⴽⴰⵜⴰⵔ (ⵉⵟⴰⵔ) ⵏ ⵕⵕⴰⵢ ⴰⵢ ⵢⴻⴷⴷⴻⵎ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴻⴳ ⵜⴻⵣⵡⴰⵔⴰ ⵏ ⵓⵙⴻⴳⴳⴰⵙ-ⴰ ⵉ ⵓⵙⵙⴻⴵⵀⴻⴷ ⵏ ⵓⵎⵛⵉⵡⴻⵕ ⴳⴰⵔ ⴰⴽⴽ ⵜⵉⵎⵓⵔⴰ ⵜⵉⵏⴼⴰⵔⴰⵙⵉⵏ ⵏ ⵓⵒⵉⵜⵕⵓⵍ.
