ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵄⵊⴻⵍ ⵏ ⵓⵙⵙⴻⴼⵜⵉ ⵉ ⵓⵇⴰⴱⴻⵍ ⵏ ⵓⵖⴻⵍⵍⵓⵢ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴷⴻⴳ ⵡⴰⵙⵙ ⵡⵉⵙ ⵙⵉⵏ ⵏ ⵓⵙⴽⴰⵙⵉ (ⵏⵉⵇⴰⵛ) ⵖⴻⴼ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⵏ 2016, ⴳⵔⴻⵏ-ⴷ ⵜⵉⵖⵔⵉ ⴽⵔⴰ ⵏ ⵢⵉⵎⴰⵣⴰⵏⴻⵏ (ⵏⵓⵡⵡⴰⴱ) ⵏ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⴵⵀⴻⴷ « ⵙ ⵜⵖⴰⵡⵍⴰ » ⵓⵙⵙⴻⴼⵜⵉ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵉⴷⵔⵉⵎⴻⵏ ⴰⴽⴽⴻⵏ ⴰⴷ ⵜⵇⴰⴱⴻⵍ ⵜⵎⵓⵔⵜ ⵜⴰⵍⵓⴼⵜ-ⴰ ⵏ ⵓⵖⴻⵍⵍⵓⵢ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ ⵢⴻⵔⵏⴰ ⴰⴷ ⵜⴻⵙⵙⵉⵡⴻⴹ ⴰⴷ ⴷ-ⵜⴻⴼⴼⴻⵖ ⵙⴻⴳ ⵜⴰⵍⵍⵉⵜ-ⴰ « ⵜⴰⵡⴻⵄⵕⴰⵏⵜ ».
ⵖⴻⴼ ⵍⴻⵃⵙⴰⴱ ⵏ ⵢⵉⵎⴰⵣⴰⵏⴻⵏ ⵏ ⵢⵉⴽⴰⴱⴰⵔⴻⵏ ⵢⴻⵎⴳⴻⵔⵔⴰⴷⴻⵏ, ⴰⵡⴰⵏⴰⴽ (ⴷⴰⵡⵍⴰ) ⵢⴻⵙⵙⴻⴼⴽ ⴰⴷ ⵢⴻⵙⵙⴻⵄⵊⴻⵍ ⴰⵙⴷⵓⵇⵇⴻⵙ ⵏ ⵓⵙⵙⴻⴼⵜⵉ ⴷⴻⴳ ⵢⵉⵃⵔⵉⵛⴻⵏ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵉⴷⵔⵉⵎⴻⵏ ⴷ ⵡⴰⵣⴰⵍ ⵢⴻⵔⵏⴰⵏ ⴰⴽⴽⴻⵏ ⴰⴷ ⵉⵇⴰⴱⴻⵍ ⵜⴰⵍⵍⵉⵜ-ⴰ ⴰⵢⴷⴻⴳ ⴰⵎⴻⴷⵅⵓⵍ ⵏ ⵜⵎⵓⵔⵜ ⵢⴻⵏⵇⴻⵙ ⵙ ⵓⵣⴳⴻⵏ ⴷⴻⴳ ⵇⴻⵍⵍ ⵏ ⵓⵙⴻⴳⴳⴰⵙ ⵖⴻⴼ ⵍⴵⴰⵍ ⵏ ⵓⵖⴻⵍⵍⵓⵢ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ.
ⴰⵙⵙ-ⴰ, ⵢⴻⵙⵙⴻⴼⴽ ⴰⴷ ⵢⴻⴷⴷⴻⵎ ⵓⵏⴰⴱⴰⴹ (ⵃⵓⴽⵓⵎⴰ) « ⵉⵃⴻⵣⵣⵉⴱⴻⵏ ⴷ ⵓⵄⵊⵉⵍⴻⵏ » ⴰⴽⴽⴻⵏ ⴰⴷ ⵢⴻⵙⵡⴰⵜⵉ ⵜⴰⵙⴻⵔⵜⵉⵜ ⵜⴰⴷⴰⵎⵙⴰⵏⵜ ⵢⴻⵔⵏⴰ ⴰⴷ ⴷ-ⵢⴻⵙⵙⵓⴼⴼⴻⵖ ⵜⴰⵎⵓⵔⵜ ⵙⴻⴳ ⵜⴻⴳⵏⵉⵜ-ⴰ ⴰⵢⴷⴻⴳ ⵜⴻⵜⵜⴽⴻⵍ ⵖⴻⴼ ⵓⵎⴻⴷⵅⵓⵍ ⵏ ⵓⵒⵉⵜⵕⵓⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵀⵧⵓⴷⴰ ⵜⴻⵍⵀⴰ ⵏ ⵓⵎⵙⴻⴳⵔⴰⵡ ⴰⵖⴻⵍⵏⴰⵡ ⴰⵎⴰⴳⴷⴰⵢ.
ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵍⴻⵣⵣⴰⵢⴻⵔ ⵢⴻⵙⵙⴻⴼⴽ ⴰⴷ ⵜⴻⵙⵙⴻⴼⵜⵉ ⴰⵟⴰⵙ ⵏ ⵢⵉⴷⵔⵉⵎⴻⵏ ⴷⴻⴳ ⵢⵉⵃⵔⵉⵛⴻⵏ ⴰⵢⴷⴻⴳ ⵜⴻⵍⵍⴰ ⵜⴻⵣⵎⴻⵔⵜ ⴷ ⵜⴰⵎⴻⵇⵔⴰⵏⵜ ⵏ ⵔⵔⴱⴻⵃ ⴰⵎ ⵜⴻⵎⴳⵓⵔⵉ ⵜⴰⵒⵉⵜⵕⵓⴽⵔⵓⵔⴰⵏⵜ (ⵚⵉⵏⴰⵄⴰ ⴱⵉⵜⵔⵓⴽⵉⵎⵢⴰⵡⵉⵢⵢⴰ) ⵢⴻⵔⵏⴰ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⵜⴻⵇⵇⴻⵏ ⴽⴰⵏ ⵜⴷⴰⵎⵙⴰ ⵖⴻⵔ ⵓⵙⵙⵉⴵⴻⵡ ⵏ ⵓⵒⵉⵜⵕⵓⵍ ⴷ ⵍⴳⴰⵣ.
ⵎⴰ ⴷ ⵎⵧⵀⴰⵎⴻⴷ-ⵜⴰⵀⴰⵔ ⴽⴰⴷⴷⵧⵓⵔ ⵏ ⵓⵎⵙⴻⴳⵔⴰⵡ ⴰⵖⴻⵍⵏⴰⵡ ⴰⵎⴰⴳⴷⴰⵢ ⵢⴻⵏⵏⴰ-ⴷ, ⵙⴻⴳ ⵢⵉⴷⵉⵙ-ⵏⵏⴻⵙ, ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵉⵍⵉ ⵜⵙⵓⴷⴷⴻⵙⵜ (ⵉⵙⵜⵔⴰⵜⵉⴵⵉⵢⵢⴰ) ⵏ « ⵓⵙⵙⵓⴼⴼⴻⵖ ⵙⴻⴳ ⵜⴰⵍⵓⴼⵜ » ⴰⴷ ⵢⴻⴵⴵⴻⵏ ⵜⴰⴷⴰⵎⵙⴰ ⵜⴰⵖⴻⵍⵏⴰⵡⵜ ⴰⴷ ⵜⵜ-ⵉⴷ-ⵢⵓⵖⴰⵍ ⵍⴵⴻⵀⴷ-ⵏⵏⴻⵙ.
ⴷⵖⴰ ⴷⴻⴼⴼⵉⵔ ⵎⴰ ⵢⴻⵛⴽⴻⵕ-ⴷ ⵉⵃⴻⵣⵣⵉⴱⴻⵏ ⵉⵎⴰⵢⵏⵓⵜⴻⵏ ⵏ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⵏ 2016 ⵉ ⵓⵙⵙⴻⴱⵖⴻⵙ (ⵜⴰⵛⴵⵉⵄ) ⵏ ⵓⵙⵙⴻⴼⵜⵉ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵉⴷⵔⵉⵎⴻⵏ, ⵢⴻⵏⵏⴰ-ⴷ ⴽⴰⴷⴷⵧⵓⵔ ⵢⴻⵙⵙⴰⵔⴻⵎ ⵍⴻⵎⵎⴻⵔ ⵜⵉⴽⴻⴱⴱⴰⵏⵉⵢⵉⵏ ⴰⴷ ⴳⴻⵏⵜ ⵓⴳⴰⵔ ⵏ ⵡⵓⵙⵙⵉⵙⴻⵏ (ⵍⵎⴻⴵⵀⵓⴷ) ⴰⴽⴽⴻⵏ ⴰⴷ ⵙⵔⴻⴱⵃⴻⵏⵜ ⵉⵙⴻⵏⴼⴰⵔⴻⵏ-ⵏⵙⴻⵏⵜ ⵢⴻⵔⵏⴰ ⴰⴷ ⵜⵜⴻⴽⴽⵉⵏⵜ ⴷⴻⴳ ⵓⵙⴷⵓⵇⵇⴻⵙ ⵏ ⵜⴻⵎⴳⵓⵔⵉ.
