Asebter amenzawi

Aneẓruf Utrim: Iɣlanen Yeddukklen bɣan ad d-sduqqsen lemcawṛat

LEZZAYER TAMANEɣT – Yebda umazun (mabɛut) udmawan n umaru amatu n Yiɣlanen Yeddukklen i Uneẓruf Utrim, Christopher Ross, ass n letniyen, tirzi ɣef temnaḍt akken ad yeɛreḍ ad d-yesduqqes lemcawṛat gar Meṛṛuk d Terni n Polisario.

Deg uḥric amezwaru n terzi-nnes ɣef Lezzayer, yellan d tamurt tamanayt (muraqiba) ɣer yidis n Muriṭanya, yemlal umazun n Yiɣlanen Yeddukklen d uselway n tegduda, Abdelaziz Bouteflika, aneɣlaf n tɣawsiwin n uzɣar, Ramtane Lamamra d uneɣlaf n tɣawsiwin n Lmeɣreb, Abdelkader Messahel.

Tirzi n Mass Ross tella-d deg tegnit aydeg Iɣlanen Yeddukklen la ttgen ussisen (maǧhudat) i ferru n taluft n Uneẓruf Utrim s usduqqes n lemcawṛat gar sin n yidisan ay terza temsalt (Meṛṛuk d Terni n Polisario).

Deg tgara n terzi-nnes, ad d-iqeddem umazun n Yiɣlanen Yeddukklen aṛabul i Useqqamu n Tɣellist (amn) yerna ad d-yili waya uqbel terzi ay yezmer mliḥ lḥal ad tt-yeg umaru amatu n Yiɣlanen Yeddukklen ɣef temnaḍt-a akken ad yesseqneɛ Meṛṛuk d Terni n Polisario akken ad mɛahadent ad bdunt lemcawṛat war ccuruḍ.

Taswiɛt-a, lemcawṛat n ferru ddaw leɛnaya n Yiɣlanen Yeddukklen ḥebsent.

Lemcawṛat tineggura gar Meṛṛuk d Terni n Polisario llant-d deg Meɣres n 2012 deg Manhasset (deg Yiwanaken Yeddukklen n Temrikt).

Tagnit-a tessaweḍ aɣref aṣeḥrawi « ad yesṛuḥ assirem », ɣef wakken ay d-yenna uselway aṣeḥrawi deg yiwet n tebṛat ay yuzen i umaru amatu n Yiɣlanen Yeddukklen, Ban Ki-moon, anda ay d-yenna dakken « taluft-a ur yessefk ara ad tɛeṭṭel ».