ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴻⵔⵏⴰ ⵜⴷⵓⴽⵍⵉ ⵜⵓⵕⵓⴼⵉⵜ 10 ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ ⵏ ⵍⴻⵎⵄⴰⵡⵏⴰ ⵉ ⵢⵉⴼⴰⵍⴻⵙⵟⵉⵏⵉⵢⴻⵏ
ⴱⵔⵓⵅⴻⵍⵍⴻⵙ – ⵜⴻⵔⵏⴰ ⵜⴷⵓⴽⵍⵉ ⵜⵓⵕⵓⴼⵉⵜ 10 ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ ⵏ ⵍⴻⵎⵄⴰⵡⵏⴰ ⵉ ⵓⴷⵉⵡⴰⵏ ⵏ ⵓⵙⵙⵓⴽⴽⴻⵙ ⴷ ⵢⵉⵅⴻⴷⴷⵉⵎⴻⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵢⵉⵣⵔⴰⵣⴰⵖⴻⵏ ⵏ ⴼⴰⵍⴻⵙⵟⵉⵏ ⴷ ⵓⴳⵎⵓⴹ ⴰⵍⴻⵎⵎⴰⵙ (ⵓⵏⵔⵡⴰ) ⴰⴽⴽⴻⵏ ⴰⴷ ⵉⴽⴻⵎⵎⴻⵍ ⵓⴷⵉⵡⴰⵏ-ⴰ ⵍⴻⵛⵖⴰⵍ-ⵏⵏⴻⵙ ⵏ ⵓⵙⵙⴻⵍⵎⴻⴷ ⵉ ⵡⴰⵔⵔⴰⵡ ⵏ ⵢⵉⵣⵔⴰⵣⴰⵖⴻⵏ (ⵍⴰⴵⵉ’ⵉⵏ) ⵢⴻⵔⵏⴰ ⴰⴷ ⴰⵙⴻⵏ-ⵢⴻⴹⵎⴻⵏ ⵜⵉⴳⵏⴰⵜⵉⵏ ⵉⴳⴻⵔⵔⵣⴻⵏ ⴰⴽⴽ ⴰⴽⴽⴻⵏ ⴰⴷ ⴽⴻⵎⵎⵍⴻⵏ ⴰⵍⵎⴰⴷ-ⵏⵙⴻⵏ ⴷ ⵓⴷⴰⵡⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵙⴻⵇⵇⴰⵎⵓⵜ ⵜⵓⵕⵓⴼⵉⵜ ⴰⵙⵙ ⵏ ⵍⴻⵜⵏⵉⵢⴻⵏ.
« ⵜⴻⵔⵏⴰ ⵜⴷⵓⴽⵍⵉ ⵜⵓⵕⵓⴼⵉⵜ ⵜⴰⵊⴻⵍⵍⴰⴱⵜ ⵏ 10 ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ ⵉ ⵓⵄⴰⵡⴻⵏ ⵏ ⵓⵏⵔⵡⴰ ⴰⴽⴽⴻⵏ ⴰⴷ ⵇⵇⵉⵎⴻⵏ ⵢⵉⵖⴻⵔⴱⴰⵣⴻⵏ ⵔⴻⵥⵎⴻⵏ ⵢⴻⵔⵏⴰ ⴰⴷ ⴽⴻⵎⵎⵍⴻⵏ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵍⵍⵙⴰⵙ ⵉ ⵍⴼⴰⵢⴷⴰ ⵏ ⵢⵉⵣⵔⴰⵣⴰⵖⴻⵏ ⵉⴼⴰⵍⴻⵙⵟⵉⵏⵉⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵙⴻⵇⵇⴰⵎⵓⵜ ⴷⴻⴳ ⵢⵉⵡⴻⵏ ⵏ ⵍⴱⴰⵢⴰⵏ.
ⵜⵉⵎⴻⵔⵏⵉⵡⵜ-ⴰ ⵜⴻⵍⵍⴰ-ⴷ ⴷ ⴰⵙⵙⵎⴰⴷ ⵉ 10-ⵏⵏⵉ ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ ⴰⵢ ⵢⴻⵜⵜⵓⵏⴻⴼⴽⴻⵏ ⵢⴰⴳⵉ ⴷⴻⴳ ⵜⵓⴱⴻⵕ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵙⴻⵇⵇⴰⵎⵓⵜ, ⴷⵖⴰ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⴰⵊⴻⵎⵎⴰⵍ ⵏ ⵍⴻⵎⵄⴰⵡⵏⴰ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴷⴻⴳ 2015 ⵉ ⵓⵙⴻⵏⴷⵓⵇ ⵏ ⵓⵏⵔⵡⴰ ⵖⴻⵔ 102 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ.
ⵓⵏⵔⵡⴰ ⵍⴰ ⵢⴻⵙⵙⴻⴼⵄⴰⵍ ⴰⵀⵉⵍⴻⵏ ⵏ ⵓⵄⴰⵡⴻⵏ ⵉ ⵍⴼⴰⵢⴷⴰ ⵏ 3,6 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵣⵔⴰⵣⴰⵖⴻⵏ ⵢⴻⵜⵜⵡⴰⵎⵎⴻⵕⴽⴰⵏ, ⵢⴻⵔⵏⴰ ⵢⴻⵜⵜⵄⴰⵡⴰⵏ-ⵉⵜⴻⵏ ⵙ ⵜⵏⴻⴳⴳⵉⵡⵉⵏ-ⵏⵏⴻⵙ (ⵡⴰⴽⴰⵍⴰⵜ) ⵢⴻⵍⵍⴰⵏ ⴷⴻⴳ Ɣⴻⵣⵣⴰ ⴷ ⵄⴻⵎⵎⴰⵏ, ⴷ ⵜⵏⴰⵔⵉⵢⵉⵏ-ⵏⵏⴻⵙ (ⵎⴰⴽⴰⵜⵉⴱ) ⵢⴻⵍⵍⴰⵏ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ, ⵜⴰⵙⴼⵉⴼⵜ ⵏ Ɣⴻⵣⵣⴰ, ⵍⵓⵕⴷⵓⵏ, ⵍⵓⴱⵏⴰⵏ ⴷ ⵙⵓⵔⵢⴰ.
ⵓⵏⵔⵡⴰ ⵜⴻⵙⵙⴻⵍⵎⴰⴷ ⴰⵎⴰ ⴷ ⵉⵏⴻⵍⵎⴰⴷⴻⵏ ⵉⵎⴻⵥⵢⴰⵏⴻⵏ, ⴰⵎⴰ ⴷ ⵉⵙⴷⴰⵡⴰⵏⴻⵏ, ⴰⵎ ⵡⴰⴽⴽⴻⵏ ⴰⵢ ⵜⴻⵜⵜⴻⴳ ⴰⵙⵙⵉⵍⴻⵖ (ⵜⴰⴽⵡⵉⵏ) ⴷⴻⴳ ⵚⵚⴻⵏⵄⴰ ⴷ ⵓⵙⵙⴻⵍⵎⴻⴷ ⵉ ⵢⵉⵣⵔⴰⵣⴰⵖⴻⵏ ⵉⴼⴰⵍⴻⵙⵟⵉⵏⵉⵢⴻⵏ. ⵏⵏⵉⴳ ⵡⴰⵢⴰ, ⵜⴻⵜⵜⵄⴰⵡⴰⵏ ⵉⵎⴻⵥⵍⴰ ⵏ ⵓⴷⴰⵡⵉ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴷⴰⵡⵉ ⵏ ⵍⵍⵙⴰⵙ ⴰⵢ ⵃⵡⴰⴵⴻⵏ ⵢⵉⴼⴰⵍⴻⵙⵟⵉⵏⵉⵢⴻⵏ.
