ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵒⴰⵙⵒⵓⵕ ⴰⴱⵢⵓⵎⵉⵜⵔⵉ: ⵙⵄⴻⴷⴷⴰⵏ 60% ⵙⴻⴳ ⵢⵉⴷⵓⵚⵉⵢⴻⵏ ⵏ ⵢⵉⵎⵉⵏⵉⴳⴻⵏ

ⵒⴰⵔⵉⵙ – ⵓⴳⴰⵔ ⵏ ⵓⵎⴻⵍⵢⵓⵏ ⵏ ⵢⵉⴽⴰⵔⴰⵎⴻⵏ (ⵎⵉⵍⴰⴼⴼⴰⵜ) ⵏ ⵓⵙⵙⵓⵜⴻⵔ ⵏ ⵓⵒⴰⵙⵒⵓⵕ ⴰⴱⵢⵓⵎⵉⵜⵔⵉ (ⵙⴻⴳ ⴳⴰⵔ 1.868.210 ⵏ ⵢⵉⴷⵣⴰⵢⵔⵉⵢⴻⵏ ⴰⵢ ⵢⴻⵜⵜⵡⴰⵎⵎⴻⵕⴽⴰⵏ ⴷⴻⴳ ⴼⵕⴰⵏⵙⴰ) ⴰⵢ ⵢⴻⵜⵜⵡⴰⵙⵄⴻⴷⴷⴰⵏ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⴱⴷⴰ ⵓⵒⴰⵙⵒⵓⵕ-ⴰ ⴰⵔⵎⵉ ⴷ 14 ⵏⵡⴻⵎⴱⴻⵕ 2015, ⵢⴻⵔⵏⴰ ⴰⵢⴰ ⵢⴻⵜⵜⴳⴻⵏⵙⵉⵙ-ⴷ 60% ⵙⴻⴳ ⵓⵎⴹⴰⵏ ⵏ ⵢⵉⴷⵣⴰⵢⵔⵉⵢⴻⵏ ⵢⴻⵜⵜⵡⴰⵎⵎⴻⵕⴽⴰⵏ ⴷⴻⴳ ⴼⵕⴰⵏⵙⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⵜⴰⵎⴻⴷⴷⵉⵜ ⵎⴰⵙⵙ ⴰⵎⴰⵔ ⴱⴻⵏⴷⵊⴰⵎⴰ, ⴰⵏⵎⴰⵀⴰⵍ (ⵙⴰⴼⵉⵔ) ⵏ ⵍⴻⵣⵣⴰⵢⴻⵔ ⴷⴻⴳ ⴼⵕⴰⵏⵙⴰ.

ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵅⵅⴰⵎ ⵏ ⵜⵎⴰⵀⴻⵍⵜ (ⵙⴰⴼⴰⵔⴰ), ⵢⴻⵏⵏⴰ-ⴷ ⵎⴰⵙⵙ ⴱⴻⵏⴷⵊⴰⵎⴰ ⴷ ⴰⴽⴽⴻⵏ ⴰⵣⴻⵎⵣ (ⵜⴰⵔⵉⵅ) ⴰⵏⴻⴳⴳⴰⵔⵓ ⵉ ⵓⵒⴰⵙⵒⵓⵕ ⴰⴱⵢⵓⵎⵉⵜⵔⵉ ⵏⴻⵜⵜⴰ ⴷ ⴰⵙⵙ ⵏ 24 ⵏⵡⴻⵎⴱⴻⵕ 2015 ⵖⴻⴼ ⵡⴰⴽⴽⴻⵏ ⴰⵢ ⵜ-ⵉⴷ-ⵜⵃⴻⵜⵜⴻⵎ ⵜⵓⴷⴷⵙⴰ ⵜⴰⴳⵔⴰⵖⵍⴰⵏⵜ ⵏ ⵜⴻⵎⵙⴰⴼⴳⴰ ⵜⴰⵖⴰⵔⵉⵎⵜ, ⵢⴻⵔⵏⴰ 1.109.699 ⵏ ⵢⵉⴽⴰⵔⴰⵎⴻⵏ ⴰⵢ ⵢⴻⵜⵜⵡⴰⵙⵄⴻⴷⴷⴰⵏ ⴰⵔⵎⵉ ⴷ ⴰⵙⵙ-ⵏⵏⵉ (59,4%), ⵢⴻⵔⵏⴰ ⵇⵇⵉⵎⴻⵏ-ⴷ 758.511 ⵏ ⵢⵉⴽⴰⵔⴰⵎⴻⵏ ⵏ ⵢⵉⴷⵣⴰⵢⵔⵉⵢⴻⵏ ⵢⴻⵜⵜⵡⴰⵎⵎⴻⵕⴽⴰⵏ ⵎⴰⵛⴰ ⵡⴻⵔⵄⴰⴷ ⵓⵔ ⵜⵜⵡⴰⵙⵄⴻⴷⴷⴰⵏ ⴰⵔⴰ.

ⴷ ⴰⵛⵓ ⴽⴰⵏ, ⵢⴻⵙⵃⴰⵙⵙⴻⴼ ⴷⴰⵖ ⵎⴰⵙⵙ ⴱⴻⵏⴷⵊⴰⵎⴰ ⵉⵎⵉ 154.447 ⵏ ⵢⵉⴷⵣⴰⵢⵔⵉⵢⴻⵏ ⵡⴻⵔⵄⴰⴷ ⵓⵔ ⴷ-ⵓⵙⵉⵏ ⴰⴷ ⴰⵡⵉⵏ ⵉⵒⴰⵙⵒⵓⵕⴻⵏ-ⵏⵙⴻⵏ ⴰⵢ ⵉⵡⴻⵊⴷⴻⵏ ⴷⴻⴳ ⵜⵇⴻⵏⵚⵓⵍⵉⵢⵉⵏ ⵜⵉⴷⵣⴰⵢⵔⵉⵢⵉⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ 11.600 ⵏ ⵢⵉⴽⴰⵔⴰⵎⴻⵏ ⴰⵢ ⵢⴻⵜⵜⵡⴰⴳⵉⵏ ⴷⴻⴳ ⵡⴰⵎⵎⴰⵙ ⵏ ⵃⴰⵎⵉⵣ ⵖⴻⴼ ⵍⴵⴰⵍ ⵏ « ⵙⵙⴻⴱⴱⴰⵜ ⵢⴻⵎⴳⴻⵔⵔⴰⴷⴻⵏ », ⵢⴻⵔⵏⴰ 80% ⵙⴻⴳ ⵙⵙⴻⴱⴱⴰⵜ-ⴰ ⵔⵣⴰⵏⵜ ⵜⵓⴳⵏⵉⵡⵉⵏ « ⵓⵔ ⵉⵡⴰⵜⴰⵏ ⴰⵔⴰ » ⵉⵍⵓⴳⴰⵏ ⴰⵢ ⴷ-ⵜⴻⵛⵔⴻⴹ ⵜⵓⴷⴷⵙⴰ ⵜⴰⴳⵔⴰⵖⵍⴰⵏⵜ ⵏ ⵜⴻⵎⵙⴰⴼⴳⴰ ⵜⴰⵖⴰⵔⵉⵎⵜ.

ⵉ ⵓⵙⵎⴻⴽⵜⵉ, ⴰⵒⴰⵙⵒⵓⵕ ⴰⴱⵢⵓⵎⵉⵜⵔⵉ ⴷ ⵏⴻⵜⵜⴰ ⴰⵢ ⴷ ⵜⴰⵙⵓⵜⴰ ⵜⵉⵙ 3 ⵏ ⵓⵒⴰⵙⵒⵓⵕ ⵢⴻⵙⵄⴰⵏ ⴰⴳⴱⵓⵔ ⴷ ⵓⵎⴹⵉⵏ (ⵔⴰⵇⵎⵉ), ⵢⴻⵔⵏⴰ ⵢⴻⵏⵏⵓⵍⴼⴰ-ⴷ ⴷⴻⴼⴼⵉⵔ ⵓⵒⴰⵙⵒⵓⵕ ⵏ ⵜⵖⵓⵔⵉ ⵜⴰⵙⴻⴽⴷⴰⵏⵜ ⴷ ⵓⵒⴰⵙⵒⵓⵕ ⴰⵍⵉⴽⵜⵕⵓⵏⴰⵏ.

ⴰⵒⴰⵙⵒⵓⵕ ⴰⴱⵢⵓⵎⵉⵜⵔⵉ ⵢⴻⵙⵄⴰ ⵜⴰⵛⴻⵕⵕⵓⵏⵜ ⵏ ⵔⴼⵉⴷ (ⵔⴰⴷⵉⵧ ⴼⵔⴻⵇⵓⴻⵏⵛⵢ ⵉⴷⴻⵏⵜⵉⴼⵉⵛⴰⵜⵉⵧⵏ – ⴰⵄⵇⴰⵍ ⵏ ⵓⵙⵏⵉⴳⴻⵔ ⵏ ⵕⵕⴰⴷⵢⵓ) ⴰⴷ ⵢⴻⴵⴵⴻⵏ ⵜⵉⵎⴰⵛⵉⵏⵉⵏ ⴰⴷ ⵖⵔⴻⵏⵜ ⵜⵉⵍⵖⴰ (ⵎⴰⵄⵍⵓⵎⴰⵜ) ⵏ ⴱⴰⴱ-ⵏⵏⴻⵙ ⵙⴻⴳ ⵎⴻⴱⵄⵉⴷ.

ⵜⵓⴷⴷⵙⴰ ⵜⴰⴳⵔⴰⵖⵍⴰⵏⵜ ⵏ ⵜⴻⵎⵙⴰⴼⴳⴰ ⵜⴰⵖⴰⵔⵉⵎⵜ (ⵟⴰⵢⴰⵔⴰⵏ ⵎⴰⴷⴰⵏⵉ) ⵜⴻⵏⵏⴰ-ⴷ ⴷ ⴰⴽⴽⴻⵏ ⴷⴻⴼⴼⵉⵔ 24 ⵏⵡⴻⵎⴱⴻⵕ 2015, ⵉⵒⴰⵙⵒⵓⵕⴻⵏ ⵓⵔ ⵣⴻⵎⵎⵔⴻⵏⵜ ⴰⵔⴰ ⴰⴷ ⵜⴻⵏ-ⵖⵔⴻⵏⵜ ⵜⵎⴰⵛⵉⵏⵉⵏ ⴰⴷ ⵓⵖⴰⵍⴻⵏ ⵓⵔ ⵚⵍⵉⵃⴻⵏ ⴰⵔⴰ.

ⴰⵙⵙⴻⵇⴷⴻⵛ ⵏ ⵓⵒⴰⵙⵒⵓⵕ ⵏ ⵜⵖⵓⵔⵉ ⵜⴰⵙⴻⴽⴷⴰⵏⵜ ⵢⴻⴱⴷⴰ ⵢⴻⵜⵜⵡⴰⵙⵙⴻⵇⴷⴰⵛ ⴷⴻⴳ 2013, ⵢⴻⵔⵏⴰ, ⵖⴻⴼ ⵍⴻⵃⵙⴰⴱ ⵏ ⵓⵏⵎⴰⵀⴰⵍ, ⴰⵢⴰ ⵢⴻⴵⴵⴰ ⵍⴻⵣⵣⴰⵢⴻⵔ ⴰⴷ ⵜⵚⴻⴳⴳⴻⵎ ⵍⴻⴽⵡⴰⵖⴻⴹ ⵏ ⵡⴰⴷⴷⴰⴷ-ⵏⵏⴻⵙ ⴰⵖⴰⵔⵉⵎ (ⵃⴰⵍⴰ ⵎⴰⴷⴰⵏⵉⵢⵢⴰ) ⵉⵎⵉ ⵣⵉⴽ ⵍⵍⴰⵏⵜ ⴰⵟⴰⵙ ⵏ ⵜⵓⵛⵛⴹⵉⵡⵉⵏ ⴳⴰⵔ ⵡⴰⵢⴻⵏ ⵢⴻⵔⵙⴻⵏ ⴷⴻⴳ ⵢⵉⵣⵎⴰⵎⴻⵏ ⴷ ⵍⴻⴽⵡⴰⵖⴻⴹ ⵏ ⵜⵍⴰⵍⵉⵜ ⴰⵢ ⴷ-ⵢⴻⵜⵜⴻⴼⴼⵖⴻⵏ ⵉ ⵍⵖⴰⵛⵉ.