ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵎⴰⵣⴰⵏⴻⵏ ⴱⵖⴰⵏ ⴰⴷ ⵜⴻⵜⵜⵡⴰⵃⵔⴻⵣ ⵜⴻⵣⵎⴻⵔⵜ ⵏ ⵜⵉⵖⵉⵏ ⵏ ⵎⴻⴷⴷⴻⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴳⵔⴻⵏ-ⴷ ⵢⵉⵎⴰⵣⴰⵏⴻⵏ ⵜⵉⵖⵔⵉ ⴷⴻⴳ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ ⴰⵙⵙ ⵏ ⵜⵜⵍⴰⵜⴰ ⴰⴽⴽⴻⵏ ⴰⴷ ⵜⵜⵡⴰⴷⴷⵎⴻⵏ ⴰⴽⴽ ⵢⵉⵃⴻⵣⵣⵉⴱⴻⵏ ⵉ ⵓⵃⵔⴰⵣ ⴷ ⵓⵙⵙⴻⴵⵀⴻⴷ ⵏ ⵜⴻⵣⵎⴻⵔⵜ ⵏ ⵜⵉⵖⵉⵏ ⵏ ⵎⴻⴷⴷⴻⵏ ⴷ ⵓⵃⵓⴷⴷⵓ-ⵏⵙⴻⵏ ⵙⴻⴳ ⵍⴻⵖⵍⴰ ⵙ ⵓⵃⴱⴰⵙ ⵏ ⵓⵖⴻⵍⵍⵓⵢ ⵏ ⵡⴰⵣⴰⵍ ⵏ ⵓⴷⵉⵏⴰⵕ.
ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵏ ⵓⵎⵏⵉ ⴰⵢ ⴷ-ⵢⴻⵍⵍⴰⵏ ⵉ ⵍⵎⴻⵏⴷ ⵏ ⵓⵙⵙⵓⴽⴽⵓ ⵏ ⵜⵉⵟ ⵏ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⵏ 2016, ⵏⵏⴰⵏ-ⴷ ⵢⵉⵎⴰⵣⴰⵏⴻⵏ (ⵏⵓⵡⵡⴰⴱ) ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵙⵙⴻⵜⵔⴻⵔ (ⵄⴰⵚⵔⴰⵏⴰ) ⵏ ⵜⴱⴰⵏⴽⵉⵡⵉⵏ ⴰⵢ ⵢⴻⵍⵍⴰⵏ ⴰⵙⵙ-ⴰ ⴷⴻⴳ ⵜⴻⴳⵏⵉⵜ ⴰⵢ ⵉⵄⴻⴷⴷⴰ ⵣⵣⵎⴰⵏ ⵖⴻⴼ ⵍⴻⵃⵙⴰⴱ ⵏ ⵡⴰⴽⴽⴻⵏ ⵜⴻⵍⵍⴰ ⵜⴷⴰⵎⵙⴰ, ⵢⴻⵔⵏⴰ ⴰⵙⵙⴻⵜⵔⴻⵔ-ⴰ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⴰⴽⴽⴻⵏ ⴰⴷ ⵣⴻⵎⵔⴻⵏⵜ ⵜⴱⴰⵏⴽⵉⵡⵉⵏ ⴰⴷ ⵃⴻⴽⵎⴻⵏⵜ ⴷⴻⴳ ⵓⵡⵍⵉⵡⴻⵍ ⵏ ⵕⴰⵙⴻⵍⵎⴰⵍ ⵢⴻⵔⵏⴰ ⴰⴷ ⵃⴻⴱⵙⴻⵏⵜ ⴰⵙⵙⴻⵔⵡⴻⵍ ⵏ ⵢⵉⴷⵔⵉⵎⴻⵏ ⵉⴱⴻⵕⵕⴰⵏⵉⵢⴻⵏ.
ⵢⴻⵏⵏⴰ-ⴷ ⵓⵎⴰⵣⴰⵏ ⴰⵧⵓⴰⴷ ⵍⴰⵀⵎⴻⵔ ⵏ ⵓⴽⴰⴱⴰⵔ ⵏ ⵜⴻⵔⵏⵉ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵃⴱⴻⵙ ⵓⵖⴻⵍⵍⵓⵢ ⵏ ⵡⴰⵣⴰⵍ ⵏ ⵓⴷⵉⵏⴰⵕ ⴰⴷⵣⴰⵢⵔⵉ ⵉ ⵓⵃⵔⴰⵣ ⵏ ⵜⴻⵣⵎⴻⵔⵜ ⵏ ⵜⵉⵖⵉⵏ ⵏ ⵓⵖⴻⵔⵎⴰⵏ (ⵎⵓⵡⴰⵟⵉⵏ), ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⴷⵉⵏⴰⵕ ⴰⴷⵣⴰⵢⵔⵉ ⵢⴻⵙⵕⵓⵃ 30% ⵙⴻⴳ ⵡⴰⵣⴰⵍ-ⵏⵏⴻⵙ ⵜⴰⴳⴰⵔⴰ-ⴰ.
ⵎⴰ ⴷ ⴰⵎⴰⵣⴰⵏ ⵉⵎⵣⵉⵔⴻⴳ (ⵎⵓⵙⵜⴰⵇⵉⵍ) ⴰⴱⴷⴻⵍⵀⴰⵍⵉⵎ ⴰⴱⴷⴻⵍⵧⵓⴰⵀⴰⴱ, ⵉⴳⴻⵔ-ⴷ ⵜⵉⵖⵔⵉ ⵉ ⵜⴱⴰⵏⴽⵉⵡⵉⵏ ⴰⴽⴽⴻⵏ ⴰⴷ ⴼⴽⴻⵏⵜ ⵉⴷⵔⵉⵎⴻⵏ ⵉ ⵢⵉⵙⵙⴻⴼⵜⵉⵢⴻⵏ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵍⴼⴰⵢⴷⴰ ⵉ ⵜⵎⵓⵔⵜ ⵙ ⵓⵎⴰⵜⴰ.
ⵜⴰⵎⴰⵣⴰⵏⵜ ⵏ ⵓⴽⴰⴱⴰⵔ ⵏ ⵢⵉⵅⴻⴷⴷⴰⵎⴻⵏ, ⵏⴰⴷⵉⴰ ⵢⴰⴼⵙⴰⵀ, ⵜⵡⴻⵜ-ⴷ, ⵙⴻⴳ ⵢⵉⴷⵉⵙ-ⵏⵏⴻⵙ, ⴷⴻⴳ ⴽⵔⴰ ⵏ ⵢⵉⵃⴻⵣⵣⵉⴱⴻⵏ ⵏ ⵓⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⵏ 2016, ⵍⴰⴷⵖⴰ ⵡⵉⴷ ⵢⴻⵔⵣⴰⵏ ⵜⵉⵎⴻⵔⵏⵉⵡⵜ ⴷⴻⴳ ⵙⵙⵓⵎⴰ ⵏ ⴽⵔⴰ ⵏ ⵜⴻⵥⵡⴰⵔ (ⵟⴰⵇⴰⵜ) ⴰⵎ ⵜⵔⵉⵙⵉⵜⵉ ⴷ ⵓⵙⴻⵔⵖⵓ (ⵡⴰⵇⵓⴷ), ⵢⴻⵔⵏⴰ ⵜⴻⵙⵙⵓⵎⴻⵔ-ⴷ ⴰⴷ ⴷ-ⵜⵉⵍⵉ ⵍⴻⵖⵔⴰⵎⴰ ⴰⴷ ⵜⵅⴻⵍⵍⵉⵚⴻⵏ ⵢⵉⵎⴻⵕⴽⴰⵏⵜⵉⵢⴻⵏ.
ⵉⵎⴰⵣⴰⵏⴻⵏ ⵏⵉⴹⴻⵏ ⵃⴻⵜⵜⴻⵜⴻⵏ-ⴷ ⴰⴽⴽⴻⵏ ⴰⴷ ⵇⵇⵉⵎⴻⵏ ⵢⵉⵙⴻⵏⴼⴰⵔⴻⵏ ⵏ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⴰⵢ ⵢⴻⵙⵙⴻⴼⵔⴰ ⵓⵡⴰⵏⴰⴽ ⴰⴷ ⵜⴻⵏ-ⵢⴻⴳ ⵉ ⵍⵎⴻⵏⴷ ⵏ ⵓⵃⵔⴰⵣ ⵏ ⵓⵏⵏⴻⵔⵏⵉ ⴰⴷⴰⵎⵙⴰⵏ ⴷ ⵓⵙⵏⵓⵍⴼⵓ ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ.
ⴳⵔⴻⵏ-ⴷ ⴷⴰⵖ ⵜⵉⵖⵔⵉ ⵉ ⵓⵙⵙⵓⴳⴳⴻⵜ ⵏ ⵡⵓⵙⵙⵉⵙⴻⵏ (ⵎⴰⴵⵀⵓⴷⴰⵜ) ⵉ ⵓⵙⵙⴻⵕⵛⴻⴷ ⵏ ⵓⵚⴻⵔⵔⴻⴼ ⵏ ⵢⵉⴷⵔⵉⵎⴻⵏ ⵏ ⵓⵡⴰⵏⴰⴽ ⵡⴰⵔ ⵎⴰ ⵉⴹⵓⵔⵔ ⵡⴰⵢⴰ ⵏⵏⴼⴻⵄ ⵏ ⵎⴻⴷⴷⴻⵏ.
