Asebter amenzawi

Imazanen bɣan ad tettwaḥrez tezmert n tiɣin n medden

LEZZAYER TAMANEɣT – Gren-d yimazanen tiɣri deg Ugraw Aɣerfan Aɣelnaw ass n ttlata akken ad ttwaddmen akk yiḥezziben i uḥraz d usseǧhed n tezmert n tiɣin n medden d uḥuddu-nsen seg leɣla s uḥbas n uɣelluy n wazal n udinaṛ.

Deg yiwet n temlilit n Umni ay d-yellan i lmend n ussukku n tiṭ n Usenfar n Lqanun n Tedrimt n 2016, nnan-d yimazanen (nuwwab) d akken yessefk ad d-yili ussetrer (ɛaṣrana) n tbankiwin ay yellan ass-a deg tegnit ay iɛedda zzman ɣef leḥsab n wakken tella tdamsa, yerna assetrer-a yessefk ad d-yili akken ad zemrent tbankiwin ad ḥekment deg uwliwel n ṛaselmal yerna ad ḥebsent asserwel n yidrimen ibeṛṛaniyen.

Yenna-d umazan Aouad Lahmer n ukabar n Terni n Uslelli Aɣelnaw d akken yessefk ad yeḥbes uɣelluy n wazal n udinaṛ adzayri i uḥraz n tezmert n tiɣin n uɣerman (muwaṭin), yerna yenna-d d akken adinaṛ adzayri yesṛuḥ 30% seg wazal-nnes tagara-a.

Ma d amazan imzireg (mustaqil) Abdelhalim Abdelouahab, iger-d tiɣri i tbankiwin akken ad fkent idrimen i yisseftiyen ay d-yessadafen lfayda i tmurt s umata.

Tamazant n Ukabar n Yixeddamen, Nadia Yafsah, twet-d, seg yidis-nnes, deg kra n yiḥezziben n Usenfar n Lqanun n Tedrimt n 2016, ladɣa wid yerzan timerniwt deg ssuma n kra n teẓwar (ṭaqat) am trisiti d userɣu (waqud), yerna tessumer-d ad d-tili leɣrama ad txelliṣen yimeṛkantiyen.

Imazanen niḍen ḥetteten-d akken ad qqimen yisenfaren n usnefli (tanmiya) ay yessefra uwanak ad ten-yeg i lmend n uḥraz n unnerni adamsan d usnulfu n yimukan n uxeddim.

Gren-d daɣ tiɣri i ussugget n wussisen (maǧhudat) i usseṛced n uṣerref n yidrimen n uwanak war ma iḍurr waya nnfeɛ n medden.