Asebter amenzawi

Tikebbaniyin timeẓyanin d tlemmasin: 8% seg-sent ay iḥebbsen deg useggas

LEZZAYER TAMANEɣT – Tikebbaniyin timeẓyanin d tlemmasin ay iḥebbsen deg Lezzayer wwḍent ɣer 8%, ma d amḍan (ɛadad) n tkebbaniyin timaynutin ay la d-yettnulfun simal la irennu, ɣef wakken ay d-tenna ass n lexmis deg Lezzayer Tamaneɣt tmarut tamatut n uɣlif n temguri (ṣinaɛa), Rabea Kherfi.

« Amḍan n tkebbaniyin timeẓyanin d tlemmasin yekka i 900.000 deg Lezzayer yerna simal la rennunt ttnulfunt-d s tɣawla seg useggas ɣer wayeḍ, ma d tid ay la yettmettaten yettezzi ufmiḍi-nsent (nisba) gar 7 d 8%, yerna akka ay tella ula d talemmast tamaḍlant », ɣef wakken ay d-tenna Massa Kherfi deg yijifeṛ n Unmager Aɣelnaw n Ubdaɛ d Yiglan Idamsanen.

D acu kan, tenna-d daɣ Massa Kherfi d akken ula ma llant 900.000 n tkebbaniyin timeẓyanin d tlemmasin deg Lezzayer, aya ur d-yettkafi ara ɣef leḥsab n yimezdaɣen ay yellan deg tmurt yerna yusa-d waya « ddaw tlemmast tamaḍlant (mutawassiṭ ɛalami) ».

ɣef leḥsab-nnes, Lezzayer tesɛa « tizemmar d timeqranin » akken ad tessiweḍ ɣer tlemmast tamaḍlant, ladɣa s ussifses ay yessafses unabaḍ isurifen i yilemẓiyen akken ad d-sbedden tikebbaniyin.

Tenna-d Massa Kherfi, seg yidis niḍen, d akken ayen ay yesɛan azal, taswiɛt-a, maci d timerniwt n umḍan n tkebbaniyin wanag d aḍman n tmeddurt-nsent.

Tenna-d daɣ d akken yessefk ad tesɛu Lezzayer anagraw (niḍam) aɣelnaw n ubdaɛ i lmend n usnerni n tkebbaniyin d ussidef n tmurt ɣer tdamsa tumḍint (raqmiyya).

ɣef waya ay d-yesnulfa uɣlif Arraz Aɣelnaw n Usnulfu i lfayda n yilemẓiyen ay d-yesnulfuyen tiɣawsiwin timaynutin, yerna arraz n useggas-a ad yettunefk deg 7 Dujembeṛ ay d-yetteddun, ɣef wakken ay d-tenna.