Asebter amenzawi
Iseḥrawiyen wejden ad ɛawden tamuɣli ma xeṣṛent lemcawṛat
CHAHID EL-HAFED (imaziren n yizrazaɣen) – Yenna-d ugensas n Terni n Polisario ɣer Yiɣlanen Yeddukklen, Ahmed Boukhari, ass n ljemɛa dakken aɣref aṣeḥrawi « yewjed ad iqabel s kra n tegnit ad d-yettwaḥettmen fell-as », ma ur terbiḥ ara tiddit n ferru n temsalt-nnes s talwit, am wakken ay d-yerna dakken « ma tessɣer Meṛṛuk iɣef-nnes s urgal n ubrid i talwit, tamehla (idara) taṣeḥrawit ad tɛawed ad twali tamuɣli-nnes tasuddsant (istratiǧiyya) » akken ad tessiweḍ ɣer yiswi-nnes: azarug.
Deg yiwen n udiwenni ay iga d Tnegga n Yisalan n Ldzayer deg yijifeṛ n umyager d umazun (mabɛut) udmawan n umaru amatu n Yiɣlanen Yeddukklen i Uneẓruf Utrim, Christopher Ross, deg yimaziren n yizrazaɣen, yenna-d Mass Boukhari dakken « idis aṣeḥrawi yewjed ad yebdu lemcawṛat-nni wuɣur ay d-ɣran Yiɣlanen Yeddukklen, ladɣa imi ay yeḍḍef yidis-a deg ferru n temsalt-a s talwit », maca yerna-d dakken « aɣref aṣeḥrawi yewjed ad iqabel s kra n tegnit ad d-yettwaḥettmen fell-as ma ur yerbiḥ ara ferru n taluft-a s talwit ».
Imḍebber-a aṣeḥrawi iwekked-d, seg yidis niḍen, dakken « aɛewwiq ameqran » ay ireglen abrid i usduqqes n lemcawṛat ɣef taluft taṣeḥrawit nettat d « assɣar ay yessɣer yidis ameṛṛuki iɣef-nnes s tigit ay yugi takti n lemcawṛat ».
« Ma tessɣer Meṛṛuk iɣef-nnes yerna tkemmel tergel abrid i tifrat s talwit, tamehla taṣeḥrawit ad tt-terr tmara ad tɛawed ad twali tamuɣli-nnes tasuddsant akken ad d-taf ttawilat iwatan akken ad tessiweḍ ɣer yiswi-nnes agejdan: azarug (istiqlal) d yiriri n tnaya (siyada) n uɣref aṣeḥrawi deg wakk iḥricen n wakal-nnes », ɣef wakken ay d-yenna.
Nnig waya, yenna-d dakken iban « Meṛṛuk ur tqebbel ara s nneyya zeddigen ussisen (maǧhudat) n Yiɣlanen Yeddukklen » i lmend n unadi n tifrat n talwit i temsalt taṣeḥrawit.
Mass Boukhari iger-d tiɣri i « yimḍebbren imeṛṛukiyen akken ad ǧǧen tikta n ussemɣer n wakal », yerna « s kra n ccɣel n ussemɣer n wakal yellan mgal uzref n ugguccelman (taqrir al-maṣir) n uɣref aṣeṛhawi la yetteddu kan ɣer lexṣara ».
