ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵣⵣⴰⵢⴻⵔ: ⵜⵉⵎⴻⵔⵏⵉⵡⵜ ⴷⴻⴳ ⵙⵙⵓⵎⴰⵜ ⵜⴻⵡⵡⴻⴹ ⵖⴻⵔ 5,1 % ⴷⴻⴳ ⵓⵙⴻⴳⴳⴰⵙ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵏⵢⴰ (ⵡⴰⵜⵉⵔⴰ) ⵏ ⵜⵎⴻⵔⵏⵉⵡⵜ ⴷⴻⴳ ⵙⵙⵓⵎⴰⵜ ⴷⴻⴳ ⵓⵙⴻⴳⴳⴰⵙ ⵜⴻⵡⵡⴻⴹ ⵖⴻⵔ 5,1% ⴷⴻⴳ ⵜⴰⵍⵍⵉⵜ ⴳⴰⵔ ⵏⵡⴻⵎⴱⴻⵕ 2014 ⴷ ⵜⵓⴱⴻⵕ 2015 ⵎⴰ ⵏⵇⵓⵔⴻⵏ-ⵉⵜⵜ ⵏⵡⴻⵎⴱⴻⵕ 2013-ⵜⵓⴱⴻⵕ 2014, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⵓⴷⵉⵡⴰⵏ ⴰⵖⴻⵍⵏⴰⵡ ⵏ ⵜⴰⴷⴷⴰⴷⴰⵏⵉⵏ (ⵉⵃⵚⴰ’ⵉⵢⵢⴰⵜ).

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵎⴻⵔⵏⵉⵡⵜ ⵏ ⵙⵙⵓⵎⴰⵜ ⵏ ⵓⵙⵙⵓⴷⴻⵔ (ⵉⵙⵜⵉⵀⵍⴰⴽ) ⴷⴻⴳ ⵜⵓⴱⴻⵕ ⵏ 2015, ⵜⴻⵍⵍⴰ-ⴷ ⵜⵎⴻⵔⵏⵉⵡⵜ ⵏ 3,6%.

ⴰⵙⵡⵉⵔ ⴰⵍⴻⵎⵎⴰⵙ ⵏ ⵙⵙⵓⵎⴰⵜ ⵏ ⵜⵓⵞⵞⵉⵜ ⵢⴻⵔⵏⴰ ⵙ 1,4% ⴷⴻⴳ ⵜⵓⴱⴻⵕ ⵏ 2015 ⵎⴰ ⵏⵇⵓⵔⴻⵏ-ⵉⵜ ⵖⴻⵔ ⵜⵓⴱⴻⵕ ⵏ 2014, ⴷⵖⴰ ⵜⴻⵍⵍⴰ-ⴷ ⵜⵎⴻⵔⵏⵉⵡⵜ ⵏ 5,51% ⴷⴻⴳ ⵢⵉⴼⴰⵔⵉⵙⴻⵏ (ⵎⴰⵏⵜⵓⴵⴰⵜ) ⵏ ⵜⵓⵞⵞⵉⵜ ⵏ ⵜⴼⴻⵍⵍⴰⵃⵜ, ⵎⴰ ⴷ ⵙⵙⵓⵎⴰⵜ ⵏ ⵢⵉⴼⴰⵔⵉⵙⴻⵏ ⵉⵣⴻⴳⵣⴰⵡⴻⵏ ⵏ ⵜⴼⴻⵍⵍⴰⵃⵜ ⵜⴻⵏⵇⴻⵙ ⵙ 2,41%.

ⵙⵙⵓⵎⴰ ⵏ ⵙⵙⴻⵍⵄⴰ ⴰⵢ ⴷ-ⵢⴻⵜⵜⵡⴰⵅⴻⴷⵎⴻⵏ ⵜⴻⵔⵏⴰ ⵙ 6,1%, ⵎⴰ ⴷ ⵜⵉⵏ ⵏ ⵢⵉⵎⴻⵥⵍⴰ (ⵅⴰⴷⴰⵎⴰⵜ) ⵜⴻⵔⵏⴰ ⵙ 4,86%.

ⵉⴼⴰⵔⵉⵙⴻⵏ ⵏ ⵜⵓⵞⵞⵉⵜ ⵏ ⵍⵍⵙⴰⵙ ⵏⴻⵇⵙⴻⵏ ⴷⴻⴳ ⵜⵓⴱⴻⵕ, ⴷⵖⴰ ⵜⴻⵏⵇⴻⵙ-ⴷ ⵍⴱⴰⵟⴰⵟⴰ ⵙ 29,3%, ⵜⵉⵎⴻⵍⵍⴰⵍⵉⵏ ⵙ 24,37%, ⵎⴰ ⴷ ⵉⴳⵓⵎⵎⴰ (ⵍⴼⴰⴽⵢⴰ) ⵉⵔⴻⵅⵙⴰⵙⴻⵏ ⵏⴻⵇⵙⴻⵏ-ⴷ ⵙ 18% ⵖⴻⴼ ⵍⴻⵃⵙⴰⴱ ⵏ ⵜⵓⴱⴻⵕ ⵏ 2014.

ⴰⵏⵇⴰⵙ ⴰⵎⴻⵇⵔⴰⵏ ⴷⴻⴳ ⵙⵙⵓⵎⴰⵜ ⵢⴻⵍⵍⴰ-ⴷ ⴷⴻⴳ ⵓⵃⵔⵉⵛ ⵏ ⵜⵉⵙⵙⵉⵜⵉⵏ ⵓⵔ ⵢⴻⵙⵄⵉⵏ ⵉⵖⵉⵙⴻⵎ (ⴽⵓⵃⵓⵍ) ⵙ 9,26%, ⵉⴳⵓⵎⵎⴰ ⵉⵔⴻⵅⵙⴰⵙⴻⵏ (6,26%), ⴰⵖⵔⵓⵎ ⴷ ⵢⵉⵎⴻⵏⴷⵉ (6,2%), ⴰⴽⵙⵓⵎ ⵏ ⵓⵢⴰⵣⵉⴹ (6,1%) ⴷ ⵢⵉⵙⴻⵍⵎⴰⵏ ⵉⵔⴻⵅⵙⴰⵙⴻⵏ (3,34%) ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴷⵉⵡⴰⵏ.

ⵉ ⵓⵙⵎⴻⴽⵜⵉ, ⵍⵇⴰⵏⵓⵏ ⵏ ⵓⵙⵙⵎⴰⴷ ⵏ ⵜⴻⴷⵔⵉⵎⵜ ⵏ 2015 ⵢⴻⵙⵙⴻⴼⵔⴰ ⴰⴷ ⴷ-ⵜⵉⵍⵉ ⵜⵎⴻⵔⵏⵉⵡⵜ ⵏ 4% ⴷⴻⴳ ⵙⵙⵓⵎⴰⵜ ⵉ ⵓⵙⴻⴳⴳⴰⵙ-ⴰ (ⵎⴰ ⴷ ⵍⵇⴰⵏⵓⵏ ⴰⵎⴻⵣⵡⴰⵔⵓ ⵏ ⵜⴻⴷⵔⵉⵎⵜ ⵢⴻⵙⵙⴻⴼⵔⴰ, ⵏⴰⵇⴰⵍ, ⴰⴷ ⴷ-ⵜⵉⵍⵉ ⵜⵎⴻⵔⵏⵉⵡⵜ ⵏ 3%).

ⵎⴰ ⴰⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⵏ 2016 ⵢⴻⵙⵙⴻⴼⵔⴰⵢ ⴰⴷ ⴷ-ⵜⵉⵍⵉ ⵜⵎⴻⵔⵏⵉⵡⵜ ⴷⴻⴳ ⵙⵙⵓⵎⴰ ⵏ 4% ⵉ ⵓⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ.

ⴷⴻⴳ 2014, ⵜⵉⵎⴻⵔⵏⵉⵡⵜ ⴷⴻⴳ ⵙⵙⵓⵎⴰⵜ ⵜⴻⵡⵡⴻⴹ ⵖⴻⵔ 2,9%. ⵎⴰ ⴷⴻⴳ 2013, ⵜⴻⵡⵡⴻⴹ ⵖⴻⵔ 3,3%.