Asebter amenzawi

Wid ad yeffɣen lantrit ur d-ttuɣalen wiyaḍ deg yimukan-nsen

LEZZAYER TAMANEɣT – Yenna-d uneɣlaf n uxeddim, Mohamed El Ghazi, ass n ssebt dakken wid ad yeffɣen lantrit seg kra n yimukan n uxeddim yeqqnen ɣer tedbelt, « ur d-ttuɣalen ara wiyaḍ deg umkan-nsen ».

« Wid ad yawin lantrit deg kra n yimukan n uxeddim n tedbelt n menwala ur d-ttuɣalen ara wiyaḍ deg umkan-nsen, ladɣa deg wayen yerzan amkan n umeggi (ɛawn) n tedbelt », ɣef wakken ay d-yenna Mass El Ghazi deg yiwen n umyager aɣelnaw ay d-yellan d yinemhalen n uxeddim n twilayin.

Yenna-d uneɣlaf dakken imir-a, aḥric n twuri tanagdudt (waḍif ɛumumi) yesɛa 2,5 n yimelyunen n yinawuren (muwaḍḍafin), yerna iwekked-d dakken aya iɛedda i uswir agraɣlan, yerna Ldzayer ad teḥwiǧ kan 1,5 d amelyun n yixeddamen deg twuri tanagdudt.

Yenna-d Mass El Ghazi, seg yidis niḍen dakken yumar (yefṛeḥ) s umḍan n yixeddimen ay d-yettwasnulfan deg useggas n 2015, yerna yella-d lehhu ibanen deg uḥric-a ɣef leḥsab n 2014.

Aseggas n 2015 yessumar (yessefṛaḥ) daɣ deg wayen yerzan assebded n tkebbaniyin timeẓyanin s ttawilat n uɛawen n uxeddim (Tanegga Taɣelnawt n Uɛawen n Ussemres n Yilemẓiyen – ANSEJ) d Usenduq Aɣelnaw n Usenkid n Trebbawt (CNAC), ɣef wakken ay d-yenna, yerna aya « yetteg-d ifadden ».