Asebter amenzawi

Assekcem n twelhiwin tiɣelnawin deg yidlisen n uɣerbaz

LEZZAYER TAMANEɣT – Tenna-d tneɣlaft n ussegmi aɣelnaw, Nouria Benghebrit, ass n ssebt deg Lezzayer Tamaneɣt, dakken aɣlif n ussegmi aɣelnaw ad d-yebdu assefɛel n yiwen n wahil n ussegmi d ameṛkanti i lmend n « ussidef n twelhiwin tidelsanin tiɣelnawin deg yidlisen n uɣerbaz, ladɣa deg yidlisen n umezruy d ussegmi islaman ».

« Ahilen n ussegmi d yidlisen n uɣerbaz ur ttɛeḍḍilen ara ad ttwasmeṛkantin s tɣawsiwin yeqqnen ɣer tgemmi taɣelnawt tadelsant », ɣef wakken ay d-tenna Massa Benghebrit, deg yiwet n tinawt (xiṭab) ay d-tenna i lmend n beddu n usarag aɣelnaw ɣef Ccix Ɛebdeṛṛeḥman Atɛalbi d usfugel n umulli wis 600 n ussebded n uɣerbaz-nnes.

Dɣa tenna-d tneɣlaft s tumert (lfeṛḥ), deg usarag-a ay d-tga Tiddukla n Sidi Ɛebdeṛṛeḥman Atɛalbi, dakken « Unesco testeɛṛef s yizumal [idzayriyen] mi tessadef ismawen n 3 n yimassanen idzayriyen gar yimdanen ay d-yufraren akk deg umaḍal ». Asarag-a yella-d i usmal (tarqiya) n tgemmi yerna tettekka deg-s tseqqamut taɣelnawt tadzayrit n Unesco.

Imassanen ayyes testeɛṛef Unesco d Ccix Ḥmed Lɛalawi Amestɣanmi, yellan d amedya n umsuref (tasamuḥ) gar ledyan, Ccix Ɛebledqader Meǧǧawi, d amazzag deg tutlayt taɛṛabt d Ccix Ɛebdeṛṛeḥman Atɛalbi, ay d-yefkan aṭas i talsa deg yinurar n tmussni d yidles, ɣef wakken ay d-tenna tneɣlaft.

« Lezzayer d tamurt tawḥidt ay yesɛan 3 n wudmawen ayyes testeɛṛef Unesco ɣef wayen ayyes d-ttekkan deg tgemmi taggagant (fikriyya) d tdelsant n umaḍal », ɣef wakken ay d-tenna.

Deg wayen yerzan asarag aɣelnaw n Ccix Ɛebdeṛṛeḥman Atɛalbi, yeckeṛ-d uneɣlaf n tɣawsiwin n ddin, Mohamed Aissa, dduṛ ameqran ay yurar Ccix Ɛebdeṛṛeḥman Atɛalbi deg uzraɛ n tmussni deg tmetti tadzayrit, yerna yenna-d dakken amdan-a d « akerwa yerna d aselmad ».