Asebter amenzawi

Yessefk uɛawed n tmuɣli deg ussegmi deg twilayin n unẓul

TIBESKERT – Aɛawed n tmuɣli deg ussegmi deg twilayin n unẓul (ǧanub) « yessefk ad d-yili i usselhu n ulmad n yibalmuden d rrbeḥ-nsen deg uɣerbaz », ɣef wakken ay d-iwekked ass n letniyen deg Tbeskert umaswaḍ (mufattic) amatu n uɣlif n ussegmi aɣelnaw, Nedjadi Messeguem.

Deg yiwen n usarag amnaḍan (ǧihawi) ay d-yellan deg uɣerbaz alemmas n Bachir-Bennacer ɣef « Tsuddest tasensegmant deg tneɣrit », yenna-d Nedjadi Messeguem d akken tarrayin (ṭuruq) ay la yettwaḍfaren ass-a deg usselmed deg twilayin n unẓul yessefk ad d-yili uɛawed n tmuɣli deg-sent « akken ad yettwaṣeggem wayen aydeg xuṣṣent, ladɣa deg wayen yerzan asselmed n tusnakt (riyaḍiyyat), tutlayt taɛṛabt d tutlayin tibeṛṛaniyin ».

Timlilit-a ay d-yellan gar yimaswaḍen n « uḥric yettwaḥettmen » (aɣerbaz amenzu d uɣerbaz alemmas) tella-d d aḥric seg « uṣeggem » n usselmed ay d-yebdan deg 2003, ɣef wakken ay d-yenna Mass Messeguem, am wakken ay d-iwekked d akken yessefk umaswaḍ ad yuɣal d « amazzay (xabir) deg uxeddim asensegman (bigaɣuǧi) ».

Asarag-a n 3 n wussan la t-ttḍafaren yimazzayen isdawanen ay la yemmeɛawanen d yimaswaḍen n uswir amenzu d ulemmas ay ixeddmen deg 11 n twilayin n tmurt, yerna ti d tiwilayin n Tbeskert, Leɣwaṭ, Nnɛama, Tamenɣest, Adrar, Waregla, Wad Suf, Beccaṛ, Tinduf, Taɣerdayt d Illizi.