ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⵉⵡⴻⵏ ⵏ ⵚⵚⴻⵏⴼ ⵏ ⵓⵜⵉⴽⵉ ⵏ ⵜⵎⴰⵛⵉⵏⵜ ⴷⴻⴳ ⵡⴰⴽⴽ ⵜⴰⵎⵓⵔⵜ ⵙⴻⴳ ⵢⴻⵏⵏⴰⵢⴻⵔ ⵏ 2016

ⵄⵉⵏ ⵜⵉⵎⵓⵛⴻⵏⵜ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵓⵎⴻⵙⵏⵉ (ⵏⴰⵇⵍ), ⴱⵧⵓⴷⵊⴻⵎⴰ ⵜⴰⵍⴰⵉ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵄⵉⵏ ⵜⵉⵎⵓⵛⴻⵏⵜ ⴷ ⴰⴽⴽⴻⵏ ⵢⵉⵡⴻⵏ ⴽⴰⵏ ⵏ ⵚⵚⴻⵏⴼ ⵏ ⵢⵉⵜⵉⴽⵉⵢⴻⵏ ⵏ ⵜⵎⴰⵛⵉⵏⵜ ⴰⴷ ⵢⵓⵖⴰⵍⴻⵏ ⴰⴷ ⵢⴻⵜⵜⵡⴰⵙⵙⴻⵇⴷⴰⵛ ⴷⴻⴳ ⵜⵎⵓⵔⵜ ⵙⴻⴳ ⵢⴻⵏⵏⴰⵢⴻⵔ ⵏ 2016 ⴷ ⴰⵙⴰⵡⴻⵏ.

ⴰⵜⵉⴽⵉ-ⴰ ⴰⴷ ⵢⴻⵙⵄⵓ ⴰⵟⴰⵙ ⵏ ⵍⴼⴰⵢⴷⴰⵜ ⵉ ⵢⵉⵎⵙⵉⴽⵍⴻⵏ (ⵎⵓⵙⴰⴼⵉⵔⵉⵏ), ⵢⴻⵔⵏⴰ ⴰⵢⴰ ⵢⴻⵍⵍⴰ-ⴷ ⴷ ⴰⵃⵔⵉⵛ ⵙⴻⴳ ⵓⵙⵙⴻⵜⵔⴻⵔ (ⵄⴰⵚⵔⴰⵏⴰ) ⵏ ⵜⴽⴻⴱⴱⴰⵏⵉⵜ ⵜⴰⵖⴻⵍⵏⴰⵡⵜ ⵏ ⵓⵎⴻⵙⵏⵉ ⵙ ⵓⴱⵔⵉⴷ ⵏ ⵡⵓⵣⵣⴰⵍ (ⵙⵏⵜⴼ) ⵉ ⵍⵎⴻⵏⴷ ⵏ ⵓⵙⵙⴻⵏⵇⴻⵙ ⵏ ⵔⵔⴻⴽⴱⴰ ⵡⴰⵔ ⴰⵅⴻⵍⵍⴻⵚ ⴷⴻⴳ ⵜⵎⴰⵛⵉⵏⵉⵏ ⵏ ⵜⴽⴻⴱⴱⴰⵏⵉⵜ-ⴰ ⴰⵢⴷⴻⴳ ⵅⴻⴷⴷⵎⴻⵏ 14000 ⵏ ⵢⵉⵅⴻⴷⴷⴰⵎⴻⵏ.

« ⴰⵢⴰ ⴷ ⵓⴳⵓⵔ ⴰⵎⴻⵇⵔⴰⵏ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⴷ-ⵏⴻⵔⵔ ⵖⴻⵔ-ⵙ ⴷⴷⴻⵀⵏ-ⵏⵏⴻⵖ ⴰⴽⴽⴻⵏ ⵉⵡⴰⵜⴰ. ⵢⴻⵙⵙⴻⴼⴽ ⴰⴷ ⵜⴻⵙⵄⵓ ⴰⵎⴻⴷⵅⵓⵍ ⴰⵢⵢⴻⵙ ⴰⴷ ⵜⴻⵜⵜⴻⴳ ⵛⵛⵖⴻⵍ-ⵏⵏⴻⵙ ⵉ ⵍⴼⴰⵢⴷⴰ ⵏ ⵎⴻⴷⴷⴻⵏ ⵢⴻⵔⵏⴰ ⴰⴷ ⵜⴻⵙⵙⴻⴼⵔⵓ ⴰⴷ ⵜⴻⵙⵙⵓⵍⵀⵓ ⴰⵅⴻⴷⴷⵉⵎ-ⵏⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⵏⴻⵖⵍⴰⴼ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⴷ ⵜⵖⴻⵎⵙⴰ ⴷⴻⴳ ⵢⵉⵊⵉⴼⴻⵕ ⵏ ⵜⴻⵔⵣⵉ ⵏ ⵓⵎⴰⵀⵉⵍ ⴷⴻⴳ ⵜⵡⵉⵍⴰⵢⵜ-ⴰ.

ⵉⵡⴻⴽⴽⴻⴷ-ⴷ ⴷⴰⵖ ⴱⵧⵓⴷⵊⴻⵎⴰ ⵜⴰⵍⴰⵉ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵙⵙⴻⴱⵖⴻⵙ (ⵜⴰⵛⴵⵉⵄ) ⵏ ⵎⴻⴷⴷⴻⵏ ⴰⴽⴽⴻⵏ ⴰⴷ ⵔⴻⴽⴽⴱⴻⵏ ⴷⴻⴳ ⵜⵎⴰⵛⵉⵏⵜ, ⵉⵎⵉ ⵜⴰⵎⴰⵛⵉⵏⵜ ⴷ « ⵜⵜⴰⵡⵉⵍ ⵢⴻⵜⵜⵇⴰⴷⴰⵔⴻⵏ ⵜⴻⵣⴷⴻⴳ ⵏ ⵜⵡⴻⵏⵏⴰⴹⵜ ⵢⴻⵔⵏⴰ ⵜⴻⵣⵎⴻⵔ ⴷⴰⵖ ⴰⴷ ⵜⴻⵜⵜⵡⴰⵙⵙⴻⵇⴷⴻⵛ ⴷⴻⴳ ⵓⵎⴽⴰⵏ ⵏ ⵢⵉⴽⴰⵎⵢⵓⵏⴻⵏ ⴷ ⵢⵉⵙⴰⴽⴰⵍⴻⵏ (ⵃⴰⴼⵉⵍⴰⵜ) ⴰⵢ ⵢⴻⵜⵜⴻⴷⴷⵓⵏ ⴷⴻⴳ ⵢⵉⴱⵔⵉⴷⴻⵏ ⵢⴻⵔⵏⴰ ⵜⵜⴳⴻⵏ-ⴷ ⴷⴻⴳ-ⵙⴻⵏ ⵓⴳⵓⵔⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷⵖⴰ ⵢⴻⵙⵎⴻⴽⵜⵉ-ⴷ, ⴷⴻⴳ ⵜⴻⴳⵏⵉⵜ-ⴰ, ⴷ ⴰⴽⴽⴻⵏ ⴰⵀⵉⵍ ⴰⵖⴻⵍⵏⴰⵡ ⴰⵢ ⵍⴰ ⵢⴻⵜⵜⵡⴰⴹⴼⴰⵔⴻⵏ ⵉⵎⵉⵔ-ⴰ ⴷ ⵡⵉⵏ ⴰⵢⴷⴻⴳ ⴰⴷ ⵜⵜⵡⴰⴱⵏⵓⵏ 12.500 ⵏ ⵢⵉⴽⵉⵍⵓⵎⵉⵜⵔⴻⵏ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⴳⴰⵔ-ⴰⵙⴻⵏ 2300 ⵏ ⵢⵉⴽⵉⵍⵓⵎⵉⵜⵔⴻⵏ ⵍⴰ ⵜⵜⵡⴰⴱⵏⴰⵢⴻⵏ ⵉⵎⵉⵔ-ⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⴰⴳⴻⵏ (ⵎⴰⵔⵚⴰ) ⵏ ⵚⵚⵢⴰⴷⴰ ⵏ ⵢⵉⵙⴻⵍⵎⴰⵏ ⵏ ⴱⵏⵉ ⵚⴰⴼ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⵍⴰ ⴷ-ⵜⴻⵜⵜⵉⵍⵉ ⵜⴻⵣⵔⴰⵡⵜ (ⴷⵉⵔⴰⵙⴰ) ⵉ ⵓⵙⵙⵉⴼⵙⴻⵙ ⵏ ⵓⵙⵙⴻⴷⴷⵓ ⵏ ⵢⵉⵙⵓⴳⴰⵏ ⴰⴽⴽⴻⵏ ⴰⴷ ⴼⴰⴽⴻⵏ ⵍⴻⵄⵢⵓⴱ ⵢⴻⵍⵍⴰⵏ ⴷⴻⴳ ⵓⵏⵔⴰⵔ-ⴰ. « ⴰⵙⵙⴻⴼⵔⴻⴽ-ⴰ (ⵜⴰⵙⵢⵉⵔ) ⴰⴷ ⵢⴻⴼⴽ ⴰⵣⴰⵍ ⵉ ⵢⵉⵚⴻⵢⵢⴰⴷⴻⴳ ⵏ ⵢⵉⵙⴻⵍⵎⴰⵏ ⵉⵎⵉ ⵍⴻⵎⵎⴻⵔ ⵎⴰⵛⵉ ⴷ ⵏⵉⵜⵏⵉ, ⵍⴱⴻⵏⵢⴰⵏ-ⴰ ⵓⵔ ⵢⴻⵜⵜⵉⵍⵉ ⴰⵔⴰ. ⴰⵙⴻⵏⴼⴰⵔ-ⴰ ⵏ ⵓⵙⵙⴻⴼⵔⴻⴽ ⴰⴷ ⴷ-ⵉⵃⴰⵣ ⴷⴰⵖ ⴰⵙⵙⴻⵎⵖⴻⵔ ⵏ ⵓⵎⴻⴷⵅⵓⵍ ⵏ ⵓⵙⴰⴳⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵡⵉⵍⴰⵢⵉⵏ ⵜⵉⵏⴻⵙⵎⵉⴳⴰⵍⵉⵏ (ⵎⴰⵏⴷⵓⴱⴰ) ⵜⵉⵎⴰⵢⵏⵓⵜⵉⵏ ⵏ ⵓⵏⵥⵓⵍ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⴰⴷ ⴷ-ⵉⵍⵉⵏ ⴷⴻⴳ-ⵙⴻⵏⵜ ⵢⵉⵙⴻⵏⴼⴰⵔⴻⵏ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⴰⴽⴽⴻⵏ ⴰⴷ ⵏⵏⴻⵔⵏⵉⵏⵜ ⵜⴻⵎⵏⴰⴹⵉⵏ-ⴰ ⴰⵢⴷⴻⴳ ⵢⴻⵍⵍⴰ ⵍⵅⵉⵔ ⵢⴻⵅⴹⴰⵏ ⴰⵒⵉⵜⵕⵓⵍ ⴷ ⵍⴳⴰⵣ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵖⴻⵍⵍⴻⵜ.