Asebter amenzawi
MC Wehṛan tenḍerr seg wid ay d-yezzin fell-as
LEZZAYER TAMANEɣT – Yebṭel usleɣmay afṛensis Jean-Michel Cavalli leɛqed-nnes s tin n umsefham d MC Wehṛan, yerna yenna-d ass n lexmis d akken taɣlamt-a n Temɣunt 1ut n tcirt n uḍar tenḍerr seg yimdanen « n diri » ay d-yezzin fell-as, am wakken ay d-yenṣeḥ « ad ttwabeddlent lɛeqleyyat » akken ad tuɣal teɣlamt-a ad trebbeḥ.
« Taɣlamt n MC Wehṛan d taɣlamt tameqrant, maca nesḥissif imi assefrek-nnes (tasyir) diri-t ɣef lǧal n rekku n wid ay d-yezzin fell-as. Yessefk ad beddlent lɛeqleyyat akken ad d-yili ussirem ad tuɣal teɣlamt-a ɣer rrbeḥ », ɣef wakken ay d-yenna Cavalli deg usmel n « Mouloudia.com » ay iqerben ɣer teɣlamt-a tawehṛanit yiwen kan wass deffir ma yebṭel leɛqed-nnes.
« Kkiɣ 15 n wayyuren deg MC Wehṛan, yerna ttwaliɣ tallit-a tesɛa azal ladɣa imi taɣlamt-a ɣer-s aṭas aya seg wasmi ur terkid ara. Nekk umareɣ (feṛḥeɣ) aṭas s ttejṛiba-a, ladɣa deffir ma ttekkaɣ deg uxeddim akken ad d-tas teɣlamt-a d tis 3 deg telɣuɣa n tsemhuyt (mawsim) yezrin, yerna d aya ay d-yerran taɣlamt-a ɣer unrar n teɣlamin tuẓwirin deg Tefriqt deffir ma tɣab seg-s 11 n yiseggasen », ɣef wakken ay d-yenna Cavalli ay ixedmen d asleɣmay n teɣlamt taɣelnawt n Lezzayer deg 2007.
Cavalli yesleɣma yagi taɣlamt n Nîmes Olympique (tamɣunt tis 2, Fṛansa), sakkin yebda axeddim d MC Wehṛan deg Tubeṛ n 2014, mi tella teɣlamt-a gar tneggura deg usettef n useggas-nni. Yessaweḍ Cavalli ad d-yessali aswir n teɣlamt-a ɣer umkan wis 3 deg tgara n telɣuɣa yezrin, yerna d aya ay yeǧǧan MC Wehṛan ad tettekki deg Teqbuct n Tefriqt n Tcirt n Uḍar ay d-yetteddun.
Maca taɣlamt-a tuẓwirt n utaram (lɣerb) n tmurt iɛawed yeɣli uswir-nnes deg tsemhuyt-a deffir ma tewwi-d aṭas n lexṣarat deg 13 n wussan imezwra n telɣuɣa taɣelnawt. Ass-a, MC Wehṛan attan deg umkan wis 11 deg usettef s 15 n tenqiḍin, yerna terbeḥ ala 3 n temliliyin, deg wakud aydeg teffeɣ s tgadda (taɛadul) d 6 n temliliyin yerna texṣer 4 n temliliyin niḍen. Taɣlamt-a tuɣ-itent deg temḥaddit, yerna d aya ay tt-yeǧǧan ad tečč 21 n yiswan. S waya, taɣlamt-a tesɛa tamḥaddit tis snat n diri akk deg Temɣunt Tamezwarut deffir temḥaddit n RC Laṛebɛa ay yeččan 23 n yiswan.
Cavalli yeffeɣ seg MC Wehṛan deffir ma terbeḥ teɣlamt-a taxṣimt-nnes n NA Ḥusin Day s 1 ɣer 0 ass n ssebt deg Lezzayer Tamaneɣt, yerna yenna-d usleɣmay-a d akken seg wasmi ay yebda axeddim d teɣlamt n Wehṛan, werǧin tettwerna deg temdint-nnes.